އިރާނުން އޮކްޓޯބަރު 1، ގައި އިޒްރޭލަށް 200 ބެލެސްޓިކް މިސައިލް ފޮނުވާލައިގެން ދިން ވަރުގަދަ ހަމަލާގެ ރައްދުގައި އިޒްރޭލުން އިރާނުގެ އަސްކަރީ މަރުކަޒުތަކަށް އަމާޒުކޮށް ރޭ މިސައިލް ހަމަލާތަކެއް ދީފި އެވެ.

ރިޕޯޓްތައް ބުނާ ގޮތުން އެ ހަމަލާގައި އިރާނުގެ އެއާ ޑިފެންސް ސިސްޓަމުން ގިނަ މިސައިލްތަކެއް ހުއްޓުވި ނަމަވެސް، ބައެއް ސަރަހައްދުތަކުން ގޮވުމުގެ އަޑު އިވުނެވެ.

އެކަމަކު އިރާނަށް ލިބުނު ގެއްލުންތަކުގެ ތަފުސީލެއް މިހާތަނަށް ސާފުވެފައެއް ނުވެ އެވެ. އަދި އެއްވެސް ގެއްލުމެއް ލިބިފައިވާކަން އިރާނުން ކަށަވަރު ކޮށްދީފައެއް ނުވެ އެވެ.

"އަހަރުމެން އިރާނުގެ އަސްކަރީ ތަންތަނަށް އަމާޒުކޮށް ހަމަލާތަކެއް ދިނިން. އެ ހަމަލާތައް ދިނީ އިރާނުން ދިން ހަމަލާތަކުގެ ރައްދުގައި. ހަމަލާތައް މިހާރު ވަނީ ނިމިފައި،" އިޒްރޭލުގެ އަސްކަރިއްޔާއިން ބުންޏެވެ.

އިޒްރޭލުން ބުނީ އިރާނުގެ 20 ތަނަކަށް އަމާޒުކޮށް ހަމަލާ ދިން ކަމަށެވެ. ނަމަވެސް އިރާނުން ބުނީ ހަމަލާތައް އަމާޒުކުރީ ތިން ޕްރޮވިންސަކަށް ކަމަށެވެ.

ހަމަލާތައް ދިން ވަގުތު އިރާނާއި އިޒްރޭލުގެ އިތުރުން ޖޯޑަންގެ ވައިގެ ސަރަހައްދު ބަންދު ކުރި އެވެ.

އިޒްރޭލުން ހަމަލާ ދީފިނަމަ ރައްދުގައި ހަމަލާތަކެއް ދޭނެ ކަމުގެ އިންޒާރު އިރާނުން އޮތީ ކުރިން ދީފަ އެވެ. އެހެންކަމުން، އިރާނަށް ދިން ހަމަލާތަކުގެ ރައްދުގައި އިޒްރޭލަށް ހަމަލާ ދޭނެ ކަމަށް ބެލެވެ އެވެ.