ރުފިޔާ ކާޑުތަކުން ކުރެވޭ ޑޮލަރު މުއާމަލާތްތައް އެއްކޮށް ކަނޑާލިތާ ދެ މަސްފަހުން، ރާއްޖެއިން ބޭރުގައި ކިޔަވާ ދިވެހި ދަރިވަރުންގެ ކާޑު ލިމިޓް 1،200 ޑޮލަރަށް ބޮޑު ކުރަން ބޭންކް އޮފް މޯލްޑިވްސް (ބީއެމްއެލް) އިން ނިންމީ އެ ބޭންކަށް ކޮން ގޮތަކުން ލިބުނު ޑޮލަރުގެ ތަނަވަސްކަމަކާ ގުޅިގެންތޯ ކުރީގެ ރައީސް އަބްދުﷲ ޔާމީނު ސުވާލު އުފައްދަވައިފި އެވެ.

ޕީއެންއެފް އިން ރޭ ބޭއްވި ޖަލްސާއެއްގައި ވާހަކަދައްކަވަމުން ޔާމީނު ވިދާޅުވީ، އޮގަސްޓު 25، ގައި ޑޮލަރު މުއާމަލާތްތައް އެއްކޮށް ކަނޑާލަން ނިންމި ފަހުން މި ހިނގި ދެ މަސްދުވަހުގެ ތެރޭ ބީއެމްއެލްއަށް އައި ހަމައެކަނި ބަދަލަކީ ކުރިން ހުރި ކާލް ސްޓުމަކް އިސްތިއުފާދެއްވުމާ ގުޅިގެން އެ މަގާމަށް ދިވެއްސަކު އައްޔަންކުރުން ކަމަށެވެ.

"ޑޮލަރު ވަތް ތަނެއް އެއްވެސް ހިސާބަކުން ފެންނާކަށް ނެތް. ސަރުކާރުން ފިޔަވަޅުތަކެއް އަޅައިފި ޑޮލަރު މާރުކުރަންޖެހޭ ކަމަށް. އެކަމު އޭގެ ރާހަތެއް ބީއެމްއެލް އަކަށް ނުކުރާނެ. މިހާރު އެ އަދަދު އެ ބޮޑުކޮށްލީ 1،200 ޑޮލަރަށް،" އެމަނިކުފާނު ވިދާޅުވި އެވެ.

ރުފިޔާ އެކައުންޓުތަކަށް ޑޮލަރު ސަޕޯޓު އެއްކޮށް ކަނޑާލަން ނިންމި ސަބަބާއި އޭގެ ދެ މަސް ފަހުން ކިޔަވާކުދިންގެ ޑޮލަރު ލިމިޓު މަތިކުރަން ނިންމީ ކޮން ސަބަބަކާހުރެކަން ބީއެމްއެލްއިން ރައްޔިތުންނަށް ކިޔައިދޭން ޖެހޭނެ ކަމަށް ވެސް ޔާމީނު ވިދާޅުވި އެވެ.

"ޑިޕޮޒިޓަރުން އަތަކުން އެހާ ލާރިއެއް ނުލިބޭނެ. ޑިޕޮޒިޓަރުން ތިބީ އިންތިހާއަށް ތާށިވެފަ. ހުރިހާ ވިޔަފާރިތަކެއް މިތިބީ ބަނގުރޫޓުވެފަ. އިނދަޖެހިފަ،" އެމަނިކުފާނު ވިދާޅި އެވެ.

"އެމްއެމްއޭ އަކުން ބީއެމްއެލްއަށް ވިއްކި ޑޮލަރެއް ނުފެނޭ. އެމްއެމްއޭއިން މިހާރު ވެސް އެ އުޅެނީ އެސްޑީއެފް އިން ލާރި ނަގައިގެން،"

އޭގެ އިތުރުން، ޑޮލަރު ވައްދާ "ކަހީނަކު" ބީއެމްއެލްގެ ތެރޭގައި އުޅޭ ކަމަށް ވިދާޅުވެ ޔާމީނު ވަނީ މަޒާޖީ ގޮތެއްގައި ގައުމީ ބޭންކަށް ފާޑުވިދާޅުވެފަ އެވެ.

އޮގަސްޓު 25، ގައި ޑޮލަރުން ކުރެވޭ މުއާމަލާތްތަަކަށް ގެނައި ބަދަލު ހަމަ އެ ދުވަހު ބޭންކުން ބަދަލުކުރި އެވެ. އެކަން ކުރީ ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން އެމްއެމްއޭއިން އަންގައިގެންނެވެ.

ޑޮލަރު ލިމިޓަށް ގެނައި ބަދަލަކީ ބީއެމްއެލްއިން އިދިކޮޅު ސިޔާސީންނާ ގުޅިގެން ގެންނަން އުޅުނު މާލީ ބަގާވާތެއް ކަމަށް ސަރުކާރުން ތުހުމަތުކުރި އެވެ. އަދި ފުލުހުން އެ މައްސަލަ ތަހުގީގު ކުރާ ކަމަށް ވެސް ބުންޏެވެ. ނަމަވެސް މިއަދާ ހަމައަށް މި މައްސަލާގައި އެއްވެސް މީހާކާ ސުވާލު ނުކުރާ ކަަމަށް، ތަހުގީގު ކުރިއަށް ގޮސްފައިވާ ހިސާބު ސާފުކުރަން ސުވާލު ކުރާ ކޮންމެ ފަހަރެއްގައި ފުލުހުން އަންނަނީ ބުނަމުންނެވެ.

ރާއްޖެއިން ބޭރުގައި ކިޔަވާ ކުދިންނަށް ޑޮލަރު ނެގޭނެ އަދަދު 1،200 އިތުރުކުރުމަށް ސަރުކާރުން ޑިސެންބަރު މަހު ވައުދުވެފައިވި ނަމަވެސް އެކަން ނުުކުރެވެ އެވެ. މިކަން ނުކޮށްދީގެން ބީއެމްއެލްގެ ބޯޑަށް ވެސް ބަދަލުތަކެއް ގެނަ އެވެ.