ތުރުކީގެ ޓާކިޝް އޭރޯސްޕޭސް އިންޑަސްޓްރީ (ޓީއޭއައި) ގެ ހެޑްކުއާޓާސްއަށް ހަތިޔާރު އެޅި ބަޔަކު ވަދެ ދިން ހަމަލާއެއްގައި 5 މީހުން މަރާލައިފި އެވެ.

ރިޕޯޓްތައް ބުނާ ގޮތުން އެ ހަމަލާގައި ޒަހަމްވި މީހުންގެ އަދަދު ވަނީ 22 އަށް އަަރައިފަ އެވެ.

ހަމަލާ ދިން ސަރަހައްދުގައި އެ ވަގުތު ބަޑީގެ އަޑުތައް ގުގުމާލައި ގޮވުމުގެ އަޑުތަކެއް ވެސް އިވުނު ކަމަށް ރިޕޯޓްތައް ބުންޏެވެ.

ތުރުކީގެ އިންޓީރިއާ މިނިސްޓަރު އަލީ ޔާލިކަޔާ "އެކްސް" ގައި ވިދާޅުވީ ހަތިޔާރު އަޅައިގެން ހަމަލާ ދިން ދެ މީހުން މަރާލާފައިވާ ކަމަށެވެ. ހަތިޔާރު އެޅި މީހުންގެ ތެރޭގައި އަންހެނަކާއި ފިރިހެނަކު ހިމެނެ އެވެ.

ރަޝިއާގައި ހުންނަވައިގެން ތުރުކީގެ ރައީސް ތައްޔިބް އުރުދުޣާން ވިދާޅުވީ ދިން ޓެރަރިސްޓް ހަމަލާ ހަރުކަށި އިބާރާތުން ކުށްވެރި ކުރާ ކަމަށެވެ.

އެ ހަމަލާގެ ޒިންމާ މިހާތަނަަށް އެއްވެސް ބަޔަކު ނަގާފައެއް ނުވެ އެވެ. އަދި އެކަމުގައި ހަރަކާތްތެރިވީ ކޮން ގައުމެއްގެ ބައެއް ކަމެއް ވެސް މިހާތަނަށް އެނގިފައެއް ނުވެ އެވެ.