ބޫޓާނުގައި މިހާރު ކުރިއަށްދާ ޓީ20 ކުއަޑްރަންގިއުލާ ކްރިކެޓް މުބާރާތުގެ ސެމީ ފައިނަލުގައި ބޫޓާން އަތުން ހަތް ވިކެޓުން މޮޅުވެ، ރާއްޖެ މުބާރާތުގެ ފައިނަލަށް ދަތުރުކޮށްފި އެވެ.

މުބާރާތުގެ ލީގު ބުރުގައި ބޫޓާނުން ވަނީ ރާއްޖެ އަތުން ހަތަރު ވިކެޓުން މޮޅުވެފަ އެވެ. ބޫޓާނުގެ ދަނޑު ހުޅުވަން ބާއްވާ މުބާރާތުގެ ފައިނަލުގެ ފުރަތަމަ ޖާގަ ތައިލެންޑުން ހޯދާފައިވާއިރު، ލީގު ބުރުގެ ދެ ވަނަ އާއި ތިން ވަނަ ޓީމުގެ މެދުގައި ކުޅުނު ސެމީ ފައިނަލް މެޗުން މިއަދު ރާއްޖެ މޮޅުވީ، ހަތް ވިކެޓުންނެވެ.

ޓޮސް ދިމާވުމުން ބޫޓާނުން ނިންމީ ކުޅެން އަރާށެވެ. އެ ގޮތުން، 20 އޯވަރު ހަމަވިއިރު، އެ ޓީމުން ވަނީ އަށް ކުޅުންތެރިން ނުބައިވެގެން 122 ލަނޑު ހަދައިފަ އެވެ. އެ ޓީމުން އެންމެ ރަނގަޅު ކުޅުމެއް ދެއްކީ، 33 ބޯޅައިން 40 ލަނޑު ހެދި ރަންޖުން ޑޯޖީ އެވެ. މި އިނިންގްސްގައި ރާއްޖޭގެ، އިބްރާހިމް ރިޒާން ތިން ވިކެޓް ނެގިއިރު، އިބްރާހިމް ނަޝާތު ދެ ވިކެޓް ނެގި އެވެ.

ޖަވާބުގައި ރާއްޖޭން ކުޅެން އަރައި، ޓީމުގެ ކެޕްޓަން، ޔޫސުފް އަޒްޔާން ފަރުހަތު ވަނީ 52 ބޯޅައިން 51 ލަނޑު ހަދައިފަ އެވެ. މިއީ، އަޒްޔާން މި ފަހަރުގެ މުބާރާތުގައި ހެދި ދެ ވަނަ ހާފް ސެންޗަރީ އެވެ.

އަދި ރާއްޖެ ޓީމުގެ އިސްމާއިލް އަލީ ވަނީ 20 ބޯޅައިން 33 ލަނޑު ހަދައިފަ އެވެ.

ބައިނަލްއަގުވާމީ ކްރިކެޓަށް 2003 ވަނަ އަހަރު ނުކުތް ބޫޓާނުން ފުރަތަމަ މެޗު ކުޅުނީ ރާއްޖެއާ ދެކޮޅަށެވެ. މުބާރާތެއްގައި ކުޅުނު އެ މެޗުން ރާއްޖެ މޮޅުވިއިރު، ޓީ20 ގައި ބޫޓާނުން ފުރަތަމަ ފެނިގެންދިޔައީ، 2019 ގެ ސައުތު އޭޝިއަން ގޭމްސްގެ ކްރިކެޓްގަ އެވެ. އެ ފަހަރު ރާއްޖޭން ވަނީ ބޫޓާން ބަލިކޮށްފަ އެވެ.

އަންނަ ހުކުރު ދުވަހު ރާއްޖޭން ފައިނަލުގައި ތައިލެންޑާ ކުޅޭއިރު، ލީގު ބުރުގައި އެ ޓީމު އަތުން ބަލިވީ 44 ލަނޑުންނެވެ.