މިނިސްޓްރީ އޮފް ކްލައިމެޓް ޗޭންޖް, އެންވާރަމަންޓު އެންޑް އެނާޖީގެ ސްޓޭޓް މިނިސްޓަރެއްގެ މަގާމުގައި ހުންނެވި އިބްރާހިމް ނިޒާމް އެ މަގާމުން ވަކިކޮށްފި އެވެ.

"އަދަދު" ނޫހަށް ކަށަވަރު ކުރެވިފައިވާ ގޮތުގައި އޭނާ އެ މަގާމުން ވަކިކުރީ މިއަދު އެވެ. އޭނާ ބަލަހައްޓަވަމުން ގެންދެެވީ އެ މިނިސްޓްރީގެ އެންވާރަމަންޓު ޑިޕާޓުމަންޓު ކަމަށް ވެބްސައިޓުން ދައްކަ އެވެ.

އޭނާ އެ މަގާމުގައި ހުންނެވީ މީދޫ ދާއިރާގެ މެންބަރު އަހްމަދު ސިޔާމް މުހައްމަދުގެ މޯލްޑިވްސް ޑިވެލޮޕްމަންޓު އެލަޔަންސް (އެމްޑީއޭ) ގެ ސްލޮޓެއްގަ އެވެ. އެމްޑީއޭއަކީ މި ސަރުކާރުގެ ކޯލިޝަން ޕާޓްނަރެކެވެ. ރިޔާސީ އިންތިހާބުގެ ދެވަނަ ބުރުގައި އެ ޕާޓީން ތާއިދުކުރީ ރައީސް ޑރ. މުހައްމަދު މުއިއްޒު އެވެ.

ރައީސް މުއިއްޒުގެ ސަރުކާރުން އައްޔަނުކުރި ސިޔާސީ މުވައްޒަފުންގެ ޖުމުލަ އަދަދު އަދިވެސް ނޭނގެ އެވެ. އެހެން އެކަން އޮއްވައި ހަރަދު ކުޑަކުރުމުގެ ގޮތުން 228 ސިޔާސީ މުވައްޒަފުން ވަކިކުރަން ވަނީ ނިންމާފަ އެވެ. މިއީ އޭގެ ތެރޭގައި ހިމެނޭ ސިޔާސީ މުވައްޒަފެއްކަން އަދި ކަށަވަރު ނުކުރެވެ އެވެ.

ނޮވެމްބަރު 17 2023 އިން މެއި 1, 2024 އާ ހަމައަށް އެ މިނިސްޓްރީގައި 47 ސިޔާސީ މުވައްޒަފުން ތިބިކަން އެނގެ އެވެ. އޭގެ ފަހުން އައްޔަނުކުރި އަދި ވަކިކުރި މީހުންގެ އަދަދު ހާމަކޮށްފައި ނުވެ އެވެ.