މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ) އާއި ޓޫރިޒަމް މިނިސްޓްރީއިން އިންތިޒާމުކޮށްގެން ބާއްވާ ފަތުރުވެރިކަމާ ބެހޭ މަހާސިންތާ 2024 މިއަދު ފަށައިފި އެވެ.

ކްރޮސްރޯޑްސްގައި ކުރިއަށްދާ އެ މަހާސިންތާގައި ފަތުރުވެރިކަމާ ބެހޭ އެކި ދާއިރާތަކުން 150 އަށް ވުރެ ގިނަ މީހުން ބައިވެރިވެ އެވެ.

އޭގެ ތެރޭގައި ރިސޯޓުތަކާއި ގެސްޓްހައުސް، ލިވައަބޯޑް، ލޯކަލް ޓުއަރިޒަމްގައި ހަރަކާތްތެރިވާ ފަރާތްތަކާއި ޓްރެވަލް އެޖެންޓުންނާއި ފަތުރުވެރިކަމާ ބެހޭ ޖަމިއްޔާތައް އަދި ޓްރެވަލް މީޑިއާތައް ހިމެނެ އެވެ.

އެމްއެމްޕީއާރްސީ އިން ބުނީ އެ މަހާސިންތާގެ މަގްސަދަކީ ރާއްޖޭގެ ފަތުރުވެރިކަން އިތުރަށް ކުރިއެރުވުމަށްޓަކައި ކުރެވިދާނެ ކަންތައްތަކާ ބެހޭގޮތުން ދާއިރާގެ ފަރާތްތަކާއި މަޝްވަރާކޮށް، އާ ހިޔާލުތަކާއި ވިސްނުންތައް ދަނެގަތުން ކަމަށެވެ.

ފަތުރުވެރިކަމަށް އާ ސެގްމަންޓްތައް ތައާރަފު ކުރުމަށް މަޝްވަރާކޮށް، ޕެނަލް ޑިސްކަޝަނަކާއި ގްރޫޕް ޑިސްކަޝަންތައް ވެސް މަހާސިންތާގައި ކުރިއަށް ގެންދަން ވަނީ ހަމަޖެހިފަ އެވެ.

އެ މަހާސިންތާގައި ފަތުރުވެރިކަމާ ބެހޭ މިނިސްޓަރު އިބްރާހިމް ފައިސަލް އަދި އެމްއެމްޕީއާރްސީގެ މެނޭޖިން ޑިރެކްޓަރު ޝިއުރީ އިބްރާހިމް އާއި އެމްއެމްޕީއާރްސީގެ ޗެއާޕާސަން އަބްދުﷲ ގިޔާސް ބައިވެރިވެވަޑައިގަންނަވަ އެވެ.