އޮޑިޓާ ޖެނެރަލްގެ އޮފީހުގެ ހަރަދުތައް ހަމަޖެއްސުމުގެ ގޮތުން އަންނަ އަހަރު އެ އޮފީހަށް 114 މިލިއަން ރުފިޔާގެ ބަޖެޓެއް ދިނުމަށް ރައްޔިތުންގެ މަޖިލީހުން މިއަދު ފާސްކޮށްފި އެވެ.

މި މައްސަލަ ދިރާސާކުރީ މާލިއްޔަތު ކޮމިޓީންނެވެ. އެ ކޮމިޓީން ނިންމީ ރިކަރަންޓު ހަރަދަށް 80,497,372ރ. އަދި ޕީއެސްއައިޕީގެ ގޮތުގައި އެ އޮފީހަށް 34,000,000ރ. ހަމަޖެއްސުމަށެވެ. އެހެންކަމުން, އެއީ 114,497,312ރ. ގެ ބަޖެޓެކެވެ.

މަޖިލިސް ޖަލްސާގައި މިއަދު ނެގި ވޯޓުގައި މާލިއްޔަތު ކޮމިޓީން ފޮނުވި ރިޕޯޓު ފާސްކުރީ 75 މެންބަރުންގެ އިއްތިފާގުންނެވެ.

އޭޖީ އޮފީހުގެ އާ އިމާރާތް އެޅުމުގެ މަސައްކަތް 2022 ގައި ކޮންޓްރެކްޓްކޮށް މިވަގުތު ވެސް ދަނީ ހިނގަމުންނެވެ. އެ އިމާރާތް ނިންމުމަށް 34 މިލިއަން ރުފިޔާ ބަޖެޓުގައި ވަނީ ޖަހާފަ އެވެ.

އެ އޮފީހުގެ ހިންގުމުގެ ހަރަދަށް މިދިޔަ އަހަރަށް ވުރެ އަންނަ އަހަރު 11 މިލިއަން ރުފިޔާ ވަނީ އިތުރަށް ބަޖެޓުކޮށްފަ އެވެ.