ކޮމަންވެލްތު ގައުމުތަކުގެ އިސްވެރިންގެ މެދުގައި ކޮންމެ ދެ އަހަރަކުން އެއް އަހަރު ބާއްވާ ބައްދަލުވުމަށް ރައީސް ޑރ. މުހައްމަދު މުއިއްޒުގެ ބަދަލުގައި ނައިބުރައީސް ހުސެއިން މުހައްމަދު ލަތީފް ސަމޯއާއަށް މިއަދު ފުރާވަޑައިގެންފި އެވެ.

ރައީސް އޮފީހުން ބުނީ ނައިބުރައީސް ހުސެއިން އާއެކު ސަރުކާރުގެ މަތީ ފަންތީގެ ވަފުދެއް ވެސް އެ ދަތުރުގައި ބައިވެރިވެވަޑައިގަންނަވާ ކަމަށެވެ.

މާދަމާއިން ފެށިގެން އަންނަ ހޮނިހިރު ދުވަހުގެ ނިޔަލަށް ކުރިއަށް ދާ އެ ބައްދަލުވުމުގެ ގިނަ ދަންފަޅިތަކުގައި ބައިވެރިވެވަޑައިގެން ގިނަ ބަޔާންތަކެއް ނައިބުރައީސް ހުސެއިން ދެއްވުމަށް ނިންމަވާފައިވާ ކަމަށް ރައީސް އޮފީހުން ބުންޏެވެ.

އާންމުކޮށް ކޮމަންވެލްތުގެ ހުރިހާ ގައުމެއްގެ ވެސް އިސްވެރިން ބައިވެރިވެވަޑައިގަންނަވާ އެ ބައްދަލުވުމުގައި މީގެ ކުރިން ރާއްޖޭގެ ފަރާތުން ވެސް އާންމުކޮށް ބައިވެރިވެވަޑައިގެންފައި ވަނީ ރައީސުންނެވެ. އެގޮތުން ކުރީގެ ރައީސް މައުމޫން އަބްދުލްގައްޔޫމާއި ރައީސް މުހައްމަދު ނަޝީދު އާއި ރައީސް އިބްރާހިމް މުހައްމަދު ސޯލިހު އެ ބައްދަލުވުމުގައި ބައިވެރިވެވަޑައިގެން ރާއްޖެ ތަމްސީލު ކުރެއްވި އެވެ.

ކޮމަންވެލްތު އިސްވެރިންގެ ބައްދަލުވުމަކީ ބައިނަލްއަގުވާމީ ފެންވަރެއްގައި އިގުތިސާދީ، މޫސުމީ އަދި ސަލާމަތީ ގޮންޖެހުންތަކާ ކުރިމަތިލުމަށް އެކުގައި މަސައްކަތް ކުރުމަށް މެންބަރު ގައުމުތަކަށް ލިބޭ ފުރުސަތެކެވެ.

ރައީސް އޮފީހުން ބުނީ މި ބައްދަލުވުން ވެގެންދާނީ ކޮޕް-29 ގެ ކުރިން ދެމެހެއްޓެނިވި ތަރައްގީ އާއި މޫސުމަށް އަންނަ ބަދަލުތަކާ ގުޅުންހުރި ފިޔަވަޅުތަކާމެދު މަޝްވަރާ ކުރުމަށް ލިބޭ ފުރުސަތަކަށް ކަމަށެވެ.