ރާއްޖޭގައި މިހާރު ކުޅެމުން އަންނަ ފުޓްސަލް ވެސް ވަނީ ވަރަށް ބޮޑަށް ބަދަލުވެފައި ކަމަށާއި މި ފަހަރު ކްލަބް ވެމްކޯއާ ގުޅި އެ ޓީމާ އެކު ކްލަބް މޯލްޑިވްސް ކަޕް ކާމިޔާބު ކުރެވުނީ ޗެލެންޖެއް ނަގައިގެން ރަނގަޅަށް ކުރެވުނު މަސައްކަތުން ކަމަށް މުހައްމަދު އައްޒާމް ބުނެފި އެވެ.

ރާއްޖޭގައި ބޭއްވޭ އެންމެ ގިނަ ދުވަސްވީ އެންމެ ބޮޑު ފުޓްސަލް މުބާރާތް، ކްލަބް މޯލްޑިވްސް ކަޕްގެ ޗެމްޕިއަންކަން އައްޒާމް ވަނީ ހަތަރު ފަހަރު ހޯދައިފަ އެވެ. މޯލްޑިވްސް ޕޯޓްސް ލިމިޓެޑް (އެމްޕީއެލް)އާ އެކު، 2012 އާއި 2013 ވަނަ އަހަރު ހޯދުމަށް ފަހު، 2022 ވަނަ އަހަރު ޓީމު ފެނަަކައާ އެކު ހޯދި އެވެ. އަދި މި އަހަރު މި ވަނީ ކްލަބް ވެމްކޯއާ ގުޅުމަށް ފަހު ހޯދައިފަ އެވެ.

އައްޒާމް އަކީ ކްލަބް މޯލްޑިވްސް ކަޕް، ތަފާތު ތިން ޓީމެއްގައި ހުރެ ހޯދި ހަމައެކަނި ކުޅުންތެރިޔާ އެވެ.

"ވަރަށް މަސައްކަތް މިއީ. ތިން ޓީމަކަށް މި ތިން ޓީމު ކުޅެނީ. ވަރަށް މަސައްކަތް، މި ޓީމު (ވެމްކޯ) ހަގީގަތުގައި މަސައްކަތުގެ ރޭޓް ވަރަށް ރަނގަޅު. އޭގެ ނަތީޖާ އަހަރެމެންނަށް މި ތަށި މި ލިބުނީ. އެހެން ކަހަލަ އެކްސްޕީރިއަންސެއް އެހެން ގޮތަކަށް ބުނާނަަަމަ މި ލިބުނީ، ދެން، އަލްހަމްދުލިއްލާހި. ރަނގަޅު ދެން." ރޯޑް ރެކްރިއޭޝަން ކްލަބް (އާރްއާރްސީ) އަތުން ފަހަތުން އަރައި، 4-1 އިން މޮޅުވި ފައިނަލް މެޗަށް ފަހު، އައްޒާމް، "އަދަދު ސްޕޯޓްސް" އަށް ދިން އިންޓަވިއުއެއްގައި ބުންޏެވެ.

ފައިނަލް މެޗަށް ފަހު ވެމްކޯ ކުޅުންތެރިންނާ އެކު އައްޒާމް އުފާފާޅުކުރަނީ.--- ފޮޓޯ: އިމޭޖަސް.އެމްވީ

ފުޓްސަލްގައި 10 އަކަށް ވުރެ ގިނަ އަހަރު އެންމެ މަތީ ފަންތީގައި ކުޅުނު އައްޒާމް ބުނީ ކުރިން ކުޅެމުން އައި ފުޓްސަލް މިހާރު މި ވަނީ ވަރަށް ބޮޑަށް ބަދަލުވެފައި ކަމަށެވެ.

"އަސްލު ކުރިއާ އަޅާބަލާއިރު ވަރަށް ޗޭންޖް (ބަދަލުވެއްޖެ). މިހާރު މޫވްމަންޓް ވަރަށް ގިނައިން ގެންނަން ޖެހޭ. ކުރިން ވެއްޖިއްޔާ ތަންކޮޅެއް ސިމްޕަލް ފުޓްސަލްއެއް ކުޅެނީ. އެހެން ގޮތަކަށް ބުނާނަމަަ ބޮޑު ފުޓްބޯޅައާ ގާތްގަނޑަކަށް އެއް ކަހަލަ ގޮތަކަށް ކުރިން ކުޅެނީ. އެކަމަކު މިހާރު އެ އަންނަނީ ޗޭންޖްވަމުން، މޫވްމަންޓް ގެންނަން ޖެހޭ، ހުރިހާ ގޮތަކުން ފިޓްވާން ޖެހޭ. އެހެންވީމަ އަސްލު ޗޭންޖް މިހާރު ފުޓްސަލް މަސައްކަތް ކުރަން ޖެހޭ ވަރު ވެސް ގިނަ،" އައްޒާމް ބުންޏެވެ.

ވެމްކޯގެ ކޯޗު އަހުމަދު ތޯހާ އާއި އެ ޓީމުން ފައިނަލް މެޗުގައި ކެޕްޓަން ބޭންޑް އަޅައިގެން ކުުޅުނު، އިސްމާއިލް ވަޖީހު (ވައްޖެ) އަދި މުބާރާތުގެ އެންމެ މޮޅު ކުޅުންތެރިޔާ، އަބްދުﷲ ޖުނައިދު (ޖެންނޭ) ވެސް ވަނީ މި ފަހަރު އެ ޓީމަށް އައްޒާމް ލިބުމަކީ، ތަށި ދިފާއުކުރަން ކުރާ މަސައްކަތަށް ލިބުނު ހިތްވަރެއް ކަމަށް ފާހަގަކޮށްފަ އެވެ.

ވެމްކޯއާ ގުޅެން ލިބުނު ފުރުސަތުގެ ބޭނުންހިފަން ނިންމީ ކިހިނެއްތޯ އައްޒާމްއާ ސުވާލު ކުރެވުނެވެ.

"އަސްލު ހަގީގަތުގައި ރަނގަޅު ޓީމެއް ދޯ. އިތުރު ޗެެލެންޖެއް. ޓީމު އަސްލު ހަގީގަތުގައި އެންމެން ކުރި މަސައްކަތޭ ބުނެވޭނީ،" އައްޒާމް ބުންޏެވެ.