ބޫޓާނުގައި މިއަދު ފެށި ޓީ20 ކުއަޑްރަންގިއުލާ ކްރިކެޓް މުބާރާތުގައި ރާއްޖޭން ކުޅުނު ފުރަތަމަ މެޗުގައި، އިންޑޮނޭޝިއާ އަތުން 23 ލަނޑުން މޮޅުވެއްޖެ އެވެ.

ރާއްޖޭން ޖަވާބުގައި ކުޅެން އަރައި، ކުޅެމުންދަނިކޮށް، ވިއްސާރަ ވުމާ ގުޅިގެން، ޑީއެލްސީ މެތަޑް އިން ބަލައި، ރިވައިސްކުރީ އެވެ. އެއާ އެކު، ރާއްޖޭން މޮޅުވީ ކަަމަށް މެޗު ކަނޑައެޅީ އެވެ.

ބޫޓާނުގެ ދަނޑު ހުޅުވަން ކުޅޭ މި މުބާރާތުގެ މިއަދުގެ މެޗުގައި، ޓޮސް ދިމާވީ އިންޑޮނޭޝިއާ އަށެވެ. އިންޑޮނޭޝިއާ އިން ކުޅެން އަރައި، 19.2 އޯވަރު ތެރޭ ހުރިހާ ކުޅުންތެރިން ނުބައިވެގެން ހެދީ 95 ލަނޑެވެ. މި އިނިންގްސްގައި، ރާއްޖޭގެ އަލީ ޝުނާން ހަތަރު ވިކެޓު ނެގިއެވެ. އަދި ރަނގަޅު ފޯމެއްގައި ހުރި، ލީމް ޝަފީގް ވަނީ ތިން ވިކެޓު ނަގައިފަ އެވެ.

ޖަވާބުގައި ކުޅެން އަރައި ރާއްޖޭން 12 އޯވަރު ތެރޭ ދެ ކުޅުންތެރިން ނުބައިވެގެން 75 ލަނޑު ހަދާފައިވަނިކޮށް، އެ ވަގުތު ވިއްސާރަ ވުމާ އެކު، މެޗު މެދުކަނޑާލީ އެވެ. އަދި އަލުން ފަށަން ކުރި މަސައްކަތުގައި ޑިލޭތަކެއް އަންނާތީއާ އެކު، މެޗު އިތުރަށް ކުރިއަށް ނުގެންދެވިގެން ނިންމާލީ، މި އިނިންސްގައި ރާއްޖޭން ހާސިލްކުރަން ޖެހޭ ޓާގެޓް 53 ލަނޑަށް ރިވައިސްކޮށްފަ އެވެ.

މި މެޗުގައި ރާއްޖޭގެ ޓީމުގައި ހިމެނިގެން، ޒުވާން ކުޅުންތެރިޔާ، އިބްރާހިމް ޝައުފް ދެއްކި ކުޅުމާ އެކު، އުންމީދު ވަނީ އާ ވެފަ އެވެ. އޭނާ ވަނީ 29 ބޯޅައިން 26 ލަނޑު ހަދައިފަ އެވެ. ރާއްޖެ އަށް ދެ ވަނަ އަށް އެންމެ ގިނަ ލަނޑު ހަދައިދިނީ ޓީމުގެ ކެޕްޓަން، އަޒްޔާން ފަރުހަތު އެވެ. އޭނާ ވަނީ 19 ބޯޅައިން 18 ލަނޑު ހަދައިފަ އެވެ.

ރާއްޖޭން މުބާރާތުގައި ކުޅޭ ދެ ވަނަ މެޗުގައި ކުޅޭނީ ބޫޓާންއާ އެވެ. ބޫޓާން ވަނީ މިއަދު ތައިލެންޑް އަތުން ބަލިވެފަ އެވެ. ރާއްޖޭން 2019 ވަނަ އަހަރުގެ ސައުތު އޭޝިއަން ގޭމްސްގައި ބޫޓާން ބަލިކުރި އެވެ.