ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރު، ގުރުއާން ތަފްސީރު ކުރައްވައި ލިޔުއްވި ތިންވަނަ ފޮތް މިއަދު ނެރުއްވައިފި އެވެ.

މަހާޒް ފޭސްބުކްގައި ވިދާޅުވީ ފޮތަކަށް ފަހު ފޮތެއް ނެރެވުމަކީ ލިބިވަޑައިގަންނަވާ އުފަލެއް ކަމަށާއި ލިބެމުންދާ އެއްބާރުލުމަށް ޝުކުރު އަދާ ކުރާ ކަމަށެވެ.

"އަހަރެއްހައި ދުވަހުގެ މުއްދަތުގައި ކީރިތި ގުރުއާނުގެ ދެބައިކުޅަ އެއްބައިގެ ހުލާސާ ތަފްސީރު ކިޔުންތެރިންނާ ހަމައަށް ފޯރުކޮށް ދެވުނީ. މިކަމަށްޓަކައި އަދިވެސް އެއްފަހަރު ކީރިތި ﷲއަށް ޝުކުރުވެރިވަން،" މަހާޒްގެ ބްލޮގުގައި ވިދާޅުވެފައިވެ އެވެ.

މަހާޒްގެ ބްލޮގުގައި ވިދާޅުވީ ހުލާސާ ތަފްސީރުގެ ތިން ވަނަ ވޮލިއުމަކީ މިހާތަނަށް ލިޔެވުނު ބައިތަކުގެ ތެރެއިން އެންމެ ގަޔާވެގެން ލިޔެވުނު ބައި ކަމަށާއި އެ ވޮލިއުމް ފެށިގެން އަންނަނީ ގުރުއާނުގެ ހަ ވަނަ ފޮތުން ކަމަށެވެ.

ހުލާސާ ތަފްސީރުގެ އެހެން ވޮލިއުމްތަކެކޭ އެއްގޮތަށް ތިންވަނަ ވޮލިއުމް ވެސް ލިބެން ހުރީ ނޮވެލްޓީ ބުކްޝޮޕުންނާއި އެ ތަނުގެ ވެބްސައިޓުންނެވެ.

ޖުމްލަ 476 ސަފުހާ ހިމެނޭ ގުރުއާން ތަފްސީރުގެ އަގަކީ 420ރ. އެވެ. ނަމަވެސް އޮކްޓޯބަރު 26، ގެ ނިޔަލަށް ކުރިއަށްދާ ނޮވެލްޓީ ބުކް ފެއާއިން އެ ފޮތް 357ރ. އަށް ލިބެ އެވެ.

މަހާޒް ކީރިތި ގުރުއާނުގެ ހުލާސާ ތަފްސީރުގެ ފުރަތަމަ ވޮލިއުމް (ފުރަތަމަ ފަސް ފޮތުގެ ތަފްސީރު) ޝާއިރުކުރީ މިދިޔަ އަހަރުގެ އޮކްޓޯބަރު 17، ގަ އެވެ.