ފައިނަލުގައި ރޯޑް ރެކްރިއޭޝަން ކްލަބް (އާރްއާރްސީ) އަތުން 4-1 އިން މޮޅުވެ، ކްލަބް މޯލްޑިވްސް ކަޕްގެ ތަށި ކްލަބް ވެމްކޯ އިން ދިފާއުކޮށްފި އެވެ.

ވެމްކޯ ޓީމުން ދެ ފައިނަލުގައި ވެސް މޮޅުވީ އާރްއާރްސީއާ ވާދަކޮށެވެ. މިދިޔަ އަހަރުގެ ފައިނަލުގައި ކުރިހޯދީ 5-3 އިންނެވެ.

ވެމްކޯ އިން ތިން ވަނަ ފަހަރަށް ކްލަބް މޯލްޑިވްސް ކަޕްގެ ފައިނަލަށް މިރޭ ނުކުތްއިރު، މިއީ ޖެހިޖެހިގެން އެ ޓީމުގެ ދެ ވަނަ ފައިނަލު ކުޅުނު ފުރަތަމަ ފަހަރު ވެސް މެ އެވެ. ކްލަބް މޯލްޑިވްސް ކަޕްގެ ތަށި ދިފާއުކުރި ހަތަރު ވަނަ ޓީމުގެ ޝަރަފް ވެމްކޯ އިން މި ވަނީ ހޯދައިފަ އެވެ. އެންމެ ފަހުން ކްލަބް މޯލްޑިވްސް ކަޕްގެ ތަށި ޓީމަކަށް ދިފާއުކުރެވުނީ މީގެ ނުވަ އަހަރު ކުރިން އެކަން ހާސިލްކުރި އެސްޓީއޯ އެވެ. އެސްޓީއޯ އިން 2014 އާއި 2015 ވަނަ އަހަރު ތަށި ހޯދި އެވެ. އޭގެކުރިން، އެމްޕީއެލް އިން 2012 އާއި 2013 ވަނަ އަހަރު ހޯދިއިރު، އެމްއޭސީއެލް އިން 2007 އާއި 2008 ވަނަ އަހަރު ތަށި އުފުލާލި އެވެ.

ރެެހެންދި ފުޓްސަލް ދަނޑުގައި މިރޭ ކުޅުނު ފައިނަލް މެޗުގައި އާރްއާރްސީން ލީޑުނެގީ އަބްދުﷲ މިދުހަތު ފަހުމީ (ބިޗަޑް) ޖެހި ގޯލުންނެވެ. ފުރަތަމަ ހާފު ނިމުމުގެ ކުރިން، އާރްއާރްސީ ކޮޅަށް ވެމްކޯގެ އިބްރާހިމް މަހުދީ (ފޭދޫ އިއްބެ) ވަނީ ގޯލެއް ޖަހައި އެއްވަރުކޮށްފަ އެވެ.

ވެމްކޯގެ އަލީ ރިޒާ (ކ) އާއި ފޭދޫ އިއްބެ އުފާފާޅުކުރަނީ.---- ފޮޓޯ: އިމޭޖަސް.އެމްވީ

ދެ ވަނަ ހާފުގައި ކުޅެން އަރައި، ވެމްކޯ އިން ވަރަށް ބޮޑަށް ތަޖުރިބާގެ ބޭނުންކުރި އެވެ. އެ ގޮތުން، އެ ޓީމުގެ އީރާންގެ ކުޅުންތެރިޔާ، އަލީ ރިޒާ ދިން ބޯޅައަކުން، އަލީ ޝިޔާހު (ޝިޔާ) ވަނީ ގޯލު ޖަހައި ލީޑުނަގައިީދީފަ އެވެ. އާރްއާރްސީ އަށް ގޯލު ޖަހަން ލިބުނު ފުރުސަތުތަކުގައި އިސްމާއިލް މުނީޒް އާއި ބިޗަޑް އަށް ލިބުނު ފުރުސަތުތަކުގައި ބޭނުން ނުކުރެވުނެވެ.

ނަތީޖާއަކަށްވީ، ޝިޔާ އިތުރު ދެ ގޯލު ޖަހައި، ހެޓްރިކް ފުރިހަމަކޮށް މެޗުން އެ ޓީމު މޮޅުކޮށްދިނުމެވެ.

ފައިނަލް މެޗުގެ މޮޅު ކުޅުންތެރިއަކީ، ވެމްކޯގެ އަލީ ރިޒާ އެވެ. ކިންގް އޮފް ފުޓްސަލް އަށް އެ ޓީމުގެ އަބްދުﷲ ޖުނައިދު (ޖެންނޭ) ހޮވުނުއިރު، އެންމެ މޮޅު ކޯޗަކީ އެ ޓީމުގެ އަހުމަދު ތޯހާ އެވެ. އެންމެ އުންމީދީ ކުޅުންތެރިއަކީ މޯލްޑިވިއަންގެ އަހުމަދު އަފްލާޒް އެވެ. ފެއާ ޕްލޭ ޓީމަކަށް ދިވެހި ސިފައިންގެ ކްލަބް ހޮވުނުއިރު، ފެއާ ޕްލޭ ކުޅުންތެރިއަކީ ސްޓެލްކޯގެ އަހުނަފު ރަޝީދު (އަހުއްކޮ) އެވެ.

ޑްރީމް ޓީމުގައި ހިމެނެނީ، ވެމްކޯގެ ޝިޔާ، ޖެންނޭ އަދި ކީޕަރު އަބްދުﷲ ޒިމާމްގެ އިތުރުން، އާރްއާރްސީގެ އަލީ ހާފިޒް (ހާއްޕެ) އާއި ބިޗަޑް އެވެ. މުބާރާތުގައި 10 ގޯލު ޖަހައިގެން، އެންމެ ގިނަ ގޯލު ޖެހި ކުޅުންތެރިއަކީ އާރްއާރްސީގެ ބިޗަޑް އެވެ.

އެންމެ ރަނގަޅަށް ސަޕޯޓްކުރި ޓީމަކަށް މި ފަހަރު ވެސް ހޮވުނީ އާރްއާރްސީ އެވެ.