ރާއްޖޭގައި އިންޑިއާގެ އަސްކަރީ އުޅަނދު އޮޕަރޭޓް ކުރުން ހުއްޓާލައި، އެގައުމުގެ ސިފައިން ފޮނުވައިލަން ވީ ވައުދާ ހިލާފަށް، އެގައުމުގެ އަސްކަރީ އުޅަނދުތަކެއް ގެންނަން ސަރުކާރުން އެއްބަސްވެއްޖެ އެވެ.

ރައީސް ޑރ. މުހައްމަދު މުއިއްޒު އިންޑިއާއަށް މިހާރު ކުރައްވާ ރަަސްމީ ދަތުރުގައި އެގައުމުގެ ބޮޑުވަޒީރު ނަރެންދުރާ މޯދީއާ ބައްދަލުކުރައްވައި، ދެބޭފުޅުން ކުރެއްވި މަޝްވަރާއަށް ފަހު، ރައީސް އޮފީހުން އިއްޔެ ޝާއިއުކުރި ޖޮއިންޓް ޕްރެސް ރިލީޒްގައި ވާ ގޮތުން، އިންޑިއާގެ އަސްކަރީ އުޅަނދުތައް ފޯރުކޮށްދޭނީ ކަނޑުމަގުން ރާއްޖޭގެ ސަލާމަތާއި ރައްކާތެރިކަން ބެލެހެއްޓުމުގައި އެމްއެންޑީއެފްގެ ގާބިލުކަން އިތުރުކުރުމަށެވެ.

އިންޑިއާއިން ރާއްޖެއަށް އަސްކަރީ އުޅަނދުތައް ފޯރުކޮށްދޭން ދެ ސަރުކާރުން އެއްބަސްވި އިރު އެގައުމުގެ ތިން އުޅަނދެެއް ރާއްޖޭގައި މިހާރު ވެސް އެބަ އޮތެވެ. އެއީ ޑޯނިއާ މަތިންދާބޯޓާއި ދެ ހެލިކޮޕްޓަރެވެ.

އެހެން ނަމަވެސް ވެރިކަމަށް ވަޑައިގަންނަވަން ކުރެއްވި ކެމްޕެއިނުގައި ރައީސް ޑރ. މުހައްމަދު މުއިއްޒު ވައުދުވެވަޑައިގެންނެވީ އިންޑިއާ ސިފައިން ރާއްޖޭން ފޮނުވައިލުމަށެވެ. އެ ވައުދު ފުއްދުމުގެ ގޮތުން އިންޑިއާގެ އުޅަނދުތައް އޮޕަރޭޓްކުރަން ވަނީ މަދަނީ މީހުން ގެނެސްފަ އެވެ.

މިފަހަރުގެ އެއްބަސްވުމުގެ ދަށުން އާ އުޅަނދުތަކެއް ފޯރުކޮށްދޭނީ ކަމެއް، ނުވަތަ މިހާރު ހުރި އުޅަނދުތައް އޮޕަރޭޓްކުރަން އަލުން ސިފައިން ފޮނުވާނީ ކަމެއް އަދި ނޭނގެ އެވެ.

ޖޮއިންޓް ޕްރެސް ރިލީޒްގައިވާ ގޮތުން ރާއްޖޭގެ ސަރަހައްދު ބެލެހެއްޓުމުގެ ގާބިލުކަން އިތުރުކުރުމުގެ ގޮތުން ރާޑަރު ސިސްޓަމްތަކާއި އެހެނިހެން އިކްއިޕްމެންޓް ފޯރުކޮށްދޭން ވެސް އިންޑިއާއިން ރާއްޖެއާ އެކު އެއްބަސްވުމަކަށް އަ އެވެ.

އިންޑިއާގެ އުޅަނދުތައް ރާއްޖޭގައި އޮޕަރޭޓް ކުރުމާއި ސިފައިން ތިބުމަކީ ޕީޕީއެމް/ޕީއެންސީ އިދިކޮޅުގައި އޮތް އިރު އެންމެ ބޮޑަށް ދެކޮޅު ހެދި ކަންތަކެވެ. "އިންޑިއާ އައުޓް" ގެ ނަމުގައި އެ ދެޕާޓީން ވަރުގަދަ ސިޔާސީ ހަރަކާތެއް ވެސް ހިންގި އެވެ.

ރައީސް މުއިއްޒު ވެސް އެ ކެމްޕެއިނުގައި ބައިވެރިވެޑައިގެން، ވެރިކަމަށް ވަޑައިގެންނެވީ އެ ސިޔާސަތާ އެކުގަ އެވެ. އެ ސިޔާސަތާ އެއްގޮތަށް އިންޑިއާ ސިފައިން ފޮނުވައިލީ މިދިޔަ މޭމަހު އެވެ.