އިންޑިއާ ސަރުކާރުން މިދިޔަ އަހަރު ރާއްޖޭގެ ކޯސްޓުގާޑަށް ހަދިޔާކުރި ސީޖީއެސް ހުރަވީ މަރާމާތު ކުރަން އިންޑިއާއަށް ގެންދަން ހަމަޖެހިފައިވާކަން އެ ގައުމުން އިއުލާނު ކޮށްފި އެވެ.

ހުރަވީ މަރާމާތަށް ގެންދަން ނިންމާފައިވާކަން އިއުލާނު ކުރީ އިންޑިއާއަށް ރައީސް ޑރ. މުހައްމަދު މުއިއްޒު މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެއްބަސްވި ކަންކަމުގެ ލިސްޓުގަ އެވެ. އިންޑިއާ ސަރުކާރުން އެއްބަސްވީ ދެ ގައުމުގެ ދެމެދުގައި އޮންނަ ގުޅުމުގައި ތެރެއިން ހިލޭ އެ ހިދުމަތް ދިނުމަށެވެ.

އެމްއެންޑީއެފްގެ މީޑިއާ އޮފިޝަލް ވިދާޅުވީ ކޮންމެ 18 މަހަކުން ކަހަލަ ގޮތަކަށް ކޯސްޓުގާޑުން ބޭނުން ކުރާ އުޅަނދުތައް ސާވިސް ކުރާ ކަމަށެވެ.

"އެންމެފަހުން ހަދިޔާ ކުރެވުނު އުޅަނދު، ދެން މީގައި މި އިންނަނީ ސާވިސްއަށް ގެންދަންޖެހޭ ސާކަލްއެއް، ގާތްގަނޑަކަށް 18 މަސް ފުރުނީމަ ކޮންމެ އުޅަނދެއް ވެސް ގެންގޮސް ސާވިސް ކުރާނީ، އެ އުސޫލުގެ ތެރެއިން ހަމަ، ގެންދަން ހަމަޖެހިފައި އޮތީ،" އެމްއެންޑީއެފްގެ މީޑިއާ އޮފިޝަލް ވިދާޅުވި އެވެ.

"ރީފިޓިން އަކީ މަރާމާތެއް ނޫން، މިކަހަލަ ބޮޑެތި އުޅަނދުތައް ވަކި ވަރަކަށް ދުއްވާފައި އޭތި ޖެހޭނެ ސާވިސް ކުރަން، އެ ސާވިސްއަށް ހަމަ ހުރިހާ އުޅަނދެއް ވެސް ގެންދާނެ."

ކޯސްޓުގާޑުން މިހާރު ބޭނުންކުރާ ސީޖީއެސް ހުރަވީ އަކީ އެ ނަމުގައި ކުރިން ބޭނުން ކުރަމުން އައި އުޅަނދުގެ ބަދަލުގައި އިންޑިއާއިން ހަދިޔާ ކުރި އުޅަނދެކެވެ.

އެ އުޅަނދުތައް ރާއްޖެއިން ރީފިޓު ނުކުރެވެނީ ރާއްޖޭގައި އެފަދަ ހިދުމަތެއް ދެވޭނެ އަސްކަރީ ޑޮކެއް ނެތުމުންނެވެ. އުތުރު ތިލަފަޅުގައި އަސްކަރީ ބަނދަރެއް ގާއިމު ކުރުމުގެ މަސައްކަތް މިދިޔަ ސަރުކާރުން ކުރި އެވެ. ނަމަވެސް މި ސަރުކާރުގެ އިސްވެރިންގެ ގޮތުގައި ތިބި މީހުން އޭރު ތުހުމަތު ކުރީ އެއީ އިންޑިއާ ސިފައިން ބައިތިއްބަން ހަދާ އަސްކަރީ މަރުކަޒެއް ކަމަށެވެ.

ވެރިކަމަށް އައުމަށްފަހު މި ސަރުކާރުން ވަނީ އުތުރުތިލަފަޅުގައި ދަނޑުހައްދަން ނިންމައިފަ އެވެ.