ލަންޑަން (އޮކްޓޫބަރު 1) - ޗެމްޕިއަންސް ލީގުގައި މިރޭ އާސެނަލާ ދެކޮޅަށް ކުޅޭ މެޗުގެ ޕީއެސްޖީ ސްކޮޑުން އޮސްމާން ޑެމްބެލޭ ބާކީކުރީ ޒާތީކަމެއް އުޅޭތީ ނޫން ކަމަށް ޕީއެސްޖީގެ ކޯޗު ލުއިސް އެންރީކޭ ބުނެފި އެވެ.

ރިޕޯޓްތައް ބުނާގޮތުން، 27 އަހަރުގެ ޑެމްބެލޭ އާއި އެންރީކޭއާ ދެމެދު މައްސަލަ ޖެހުނީ މިދިޔަ ހުކުރު ދުވަހު ފްރެންޗް ލީގުގައި، ރެނެސް އަތުން ޕީއެސްޖީ މޮޅުވި މެޗުގައި ހިނގައިދިޔަ ކަމަކުންނެވެ. އެއީ، އެ މެޗުގައި، ޑެމްބެލޭ ބަދަލުކުރަން ނިންމި ނިންމުމާ ހެދި، އޭނާ ހިތްހަަމަނުޖެހިގެން އެންރީކޭއާ މެދު މުއާމަލާތުކުރި ގޮތުންނެވެ.

އާސެނަލްގެ އެމިރޭޓްސް ސްޓޭޑިއަމްގައި ކުޅޭ މެޗަށް ޕީއެސްޖީން ނެގި ސްކޮޑުގައި ޑެމްބެލޭ ނުހިމެނީ އަހުލާގީ މައްސަލައެއްގެ ސަބަބުން ކަމަށް އެ ކްލަބުން ވަނީ މައުލޫމާތުދީފަ އެވެ.

ނޫސްވެރިންގެ ބައްދަލުވުމުގައި ސުވާލުކުރުމުން، އެންރީކޭ ބުނީ، މުޅި ޓީމުގެ ހައްގުގައި ނިންމަން ޖެހޭ ނިންމުން ނިންމަން އަބަދުވެސް ފަސްނުޖެހޭނެ ކަމަށެވެ.

"ޓީމުގެ ކަންކަމަށް އިހުތިރާމްކޮށް، ޓީމާ އެކީ ކުރިއަށްދާން ފަސް ނުޖެހޭނަމަ، އޭގެ މާނަ އަކީ އެ ކުޅުންތެރިއަކު އެ ހުރީ މެޗު ކުޅެން ތައްޔާރީ ހާލަތެއްގައެއް ނޫނޭ. އަހަރެން ބޭނުންވަނީ އަހަރެންގެ ހުރިހާ ކުޅުންތެރިން ތައްޔާރަށް ހުންނަން ކޮންމެ ހާލަތަކަށް ވެސް. އެ ވިސްނުމުގައި ބަލާއިރު އޭނަ (ޑެމްބެލޭ) ހުރީ ތައްޔާރަކަށް ނޫން،" އެންރީކޭ ބުންޏެވެ.

"އަހަރެމެން ދެމެދުގައި މައްސަލައެއް، ޒާތީ ކަމެއް، އެއްވެސް ކަމެއް ނެތް. އެހެން ދައްކާ ވާހަކަ ތަކުގައި ހަގީގަތެއް ނެތް. މި ދެކެވެނީ ކުޅުންތެރިއަކު އަދާކުރަންޖެހޭ ޒިންމާއެއްގެ ވާހަކަ. އަހަރެން ގޮތް ނިންމަނީ މުޅި ޓީމާ މެދު ވިސްނާފައި،"

ކީލިއަން އެމްބާޕޭ ދިޔަ ފަހުން، ޕީއެސްޖީގެ އެޓޭކްގެ އެންމެ އިސް ކުޅުންތެރިއަކީ، ޑެމްބެލޭ އެވެ. އެކަމަކު، އޭނާ ނެތި އާސެނަލާ ދެކޮޅަށް ޕީއެސްޖީން ނުކުންނާނީ ވަރަށް "ކެރިގެން ރަނގަޅު ނަތީޖާއެއް ހޯދަން" ކަމަށް އެންރީކޭ ބުނެފައިވެ އެވެ.