ކުރިން ފޮރިން މިނިސްޓަރުގެ މަގާމުގައި ހުންނެވި މޫސާ ޒަމީރު އިއްޔެ ފިނޭންސް މިނިސްޓަރަކަށް ހަމަޖެއްސީ ފިނޭންސް މިނިސްޓަރުކަމުގައި އެހައިތަނަށް ހުންނެވި ޑރ. މުހައްމަދު ޝަފީގު އިސްތިއުފާ ދެއްވުމުން ކަމަށް ސަރުކާރުން ހާމަކޮށްފި އެވެ.

ކެބިނެޓަށް އިއްޔެ ގެނައި ބަދަލު އިއުލާނުކުރުމަށް ފަހު ރައީސް އޮފީހުގެ ވެބްސައިޓުގައި ޝާއިއުކުރި ހަބަރުގައި ބުނި ގޮތުގައި ޝަފީގު އިސްތިއުފާ ދެއްވީ އިއްޔެ އެވެ.

އެހެން ނަމަވެސް އޭނާ އިސްތިއުފާ ދެއްވި ސަބަބާ ބެހޭ ގޮތުން ސަރުކާރުން ވަކި އެއްޗެއް ނުބުނެ އެވެ. އެކަމާ ބެހޭ ގޮތުން އޭނާ ވެސް އަދި ވާހަކައެއް ނުދައްކަވަ އެވެ.

ސަރުކާރުގެ މިނިސްޓަރީތަކަށް ބޮޑެތި ބަދަލުތަކެއް ގެނެސް، ފޮރިން މިނިސްޓަރަކަށް ހުންނެވި، މޫސާ ޒަމީރު ފިނޭންސް މިނިސްޓަރީއަށް ބަދަލު ކުރައްވައި، ހެލްތު މިނިސްޓަރަކަށް ހުންނެވި އަބްދުﷲ ހަލީލު ފޮރިން މިނިސްޓަރީއަށް ބަދަލު ކުރައްވައި، ރައީސް އޮފީހުގެ ޕަބްލިކް ޕޮލިސީ ސެކްޓަރީގެ މަގާމުގައި ހުންނެވި އަބްދުﷲ ނާޒިމް ހެލްތު މިނިސްޓަރުގެ މަގާމަށް އައްޔަނުކުރެއްވުމުން އެ ބޭފުޅުން އިއްޔެ މަގާމުގެ ހުވާ ކުރެއްވި އެވެ.

ސަރުކާރުގެ މިނިސްޓަރީތަކަށް ބަދަލުތަކެއް ރައީސް މި ގެންނެވީ ދައުލަތުގެ މާލީ ހާލަތު އިންތިހާއަށް ގޯސްވެފައިވާ ދަނޑިވަޅެއްގަ އެވެ. ނަމަވެސް މި ބަދަލުތަކާއި މާލީ ހާލަތާ އެއްވެސް ގުޅުމެއް އޮތް ކަމެއް ނޭނގެ އެވެ.