މެންޗެސްޓާ (އޮކްޓޫބަރު 1) - މެންޗެސްޓާ ޔުނައިޓެޑްގެ ކޯޗުކަމުން ވަކިނުކުރާނެ ކަމުގެ ޔަގީންކަން އެބައޮތް ކަމަށް އެ ޓީމުގެ ކޯޗު އެރިކް ޓެން ހާގް ބުނެފި އެވެ.

އިނގިރޭސި ޕްރިމިއާ ލީގުގައި މި ސީޒަނުގައި ޔުނައިޓެޑުން ނެރެމުން އަންނަ ދަށް ނަތީޖާތަކުގެ ސަބަބުން ޓެން ހާގް އަށް އެ ކުލަބްގެ ސަޕޯޓަރުންގެ ފާޑުކިޔުން ވަނީ އަމާޒުވެފަ އެވެ. އެކަމަކު، އެ ފާޑުކިޔުންތަކަށް ނުބާލާނެ ކަމަށާއި އެކުގައި މަސައްކަތްކޮށްގެން ކާމިޔާބު ހޯދާނެ ކަމަށް މީގެ ކުރިން ވެސް ޓެން ހާގް ވަނީ ބުނެފަ އެވެ.

ލީގުގައި މި ހަފްތާގައި އަމިއްލަ ދަނޑުގައި، ޓޮޓެންހަމް އަތުން 3-0 ގެ ނަތީޖާ އަކުން ޔުނައިޓެޑް ބަލިވި މެޗަށް ފަހު އަމާޒުވަމުން އަންނަ ފާޑުކިޔުންތަކަށް ރައްދުދީ ޓެން ހާގް ބުނީ، ޔުނައިޓެޑް ކޯޗުކަމުން ވަކި ނުކުރާނެ ކަމުގެ ޔަގީންކަން އޭނާ އަށް އޮތް ކަމަށެވެ.

ޓެން ހާގް ބުނީ, ޔުނައިޓެޑުން މަސައްކަތް ކުރަނީ ޓީމެއް "ބިލްޑް" ކުރަން ކަމަށެވެ. އަދި ޓީމެއް އަލުން ބިލްޑް ކުރުމަކީ ވަގުތު ނަގާ ކަމެއް ކަމަށާއި، އެ ވަގުތު ޔުނައިޓެޑަށް ބޭނުންވާ ކަމަށެވެ. އަދި މި ކަމުގައި ޔުނައިޓެޑްގެ ކުޅުންތެރިންނާ މެނޭޖުމަންޓް އަދި ކޯޗިން ސްޓާފުން އެކުގައި މަސައްކަތް ކުރަމުން އަންނަ ކަމަށް ޓެން ހާގް ބުންޏެވެ.

"އަހަރެން ކޯޗުކަމުން ވަކިކުރާނެ ކަމާމެދު ނުވިސްނަން. ޔުނައިޓެޑްގެ މުޅި ޓީމުން މަސައްކަތް ކުރަނީ އެކަތިގަނޑަކަށްވެ, ހާލަތު ބަދަލުކުރުމަށް.." ޓެން ހާގް ބުންޏެވެ.

ކުރިން އަޔަކްސް އަށް ކޯޗުކޮށްދިން، ޓެން ހާގް ބުނީ ޔުނައިޓެޑުން މި ފަހުން ނެގި ހުރިހާ ނިންމުމެއް ނިންމާފައިވާނީ އެންމެން އެކަތިގަނޑަކަށްވެ, އެންމެންގެ ހިޔާލުގެ މައްޗަށް ކަމަށެވެ.

އިނގިރޭސި މީޑިއާ ރިޕޯޓްތައް ބުނާގޮތުން، ޓެން ހާގް ވަކިކޮށްފިނަަމަ، ވަގުތީ ކޯޗެއްގެ ޒިންމާ ހަވާލުކުރުމުގެ ފުރުސަތު ބޮޑީ އެސިސްޓަންޓް ކޯޗު ރޫޑް ވޭން ނިސްޓަލްރޫއީ އެވެ.