ބޭންކް އޮފް މޯލްޑިވްސްގެ މުވައްޒަފަކު އެ ބޭންކުގެ ކަސްޓަމަރުންގެ އެކައުންޓުތަކުން 480,000ރ. އަށްވުރެ ގިނަ ފައިސާ ނެގުމުން ހިޔާނާތްތެރިވުމުގެ ދައުވާ ސާބިތުވެ އޭނާގެ މައްޗަށް 40 ގަޑިއިރު މުޖުތަމައުއަށް ހިދުމަތް ކުރުމަށް ކްރިމިނަލް ކޯޓުން ހުކުމްކޮށްފި އެވެ.

ކްރިމިނަލް ކޯޓުން އެގޮތަށް ބ. އޭދަފުށި, ހިޔާވަހި, އަލީ މާޒިން އަށެވެ. ސެޕްޓެމްބަރު 2012, އިން ފެށިގެން އޮކްޓޯބަރު 2021, ގެ ނިޔަލަށް އޭނާ މަސައްކަތް ކުރީ ބީއެމްއެލްގެ ކަސްޓަމާ ސާވިސް އެސިސްޓަންޓެއްގެ ގޮތުގަ އެވެ.

އެ ކުށް އޭނާ ކުރީ މެއި 14, 2021 އިން ސެޕްޓެމްބަރު 23, 2021 އާ ދެމެދު ކަން، ހުކުމުން އެނގެ އެވެ. އެ މުއްދަތުގައި އެކި ދުވަސް މަތިން 13 ކަސްޓަމަރެއްގެ މައުލޫމާތު ބޭންކުގެ ސިސްޓަމުން ބަދަލުކޮށް, ކަސްޓަމަރުންގެ ހުއްދަ ނެތި އެ ކަސްޓަމަރުންގެ ހުއްދަ ނެތި ކަސްޓަމަރުންގެ އިންޓަނެޓް ބޭންކިން ރަޖިސްޓްރީކޮށް އޭނާ ވަނީ ފައިސާ ނަގައިފަ އެވެ.

އެގޮތުން, ޖުމުލަ 482,611ރ. އެ އެކައުންޓްތަކުން އޭނާ ނެގި އެވެ. އެ ފައިސާ އޭނާ ބޭނުންކުރީ ސައްހަ ނޫން ކްރެޑިޓް ކާޑު ޕޭމަންޓުގެ ގޮތުގައި އާއި ފޮރެކްސް ޓްރާންސެކްޝަންތަކާއި އަމިއްލަ އެކައުންޓަށް ޖަމާކޮށްގެންނެވެ.

ހިޔާނާތުގެ ދައުވާއަަށް އޭނާ އިއުތިރާފުވުމާ ގުޅިގެން 40 ގަޑިއިރު މުޖުތަމައުއަށް ހިދުމަތް ކުރުމުގެ އިތުރުން ޖޫރިމަނާގެ ގޮތުގައި 56,200ރ. ދެއްކުމަށް ކްރިމިނަލް ކޯޓުން ވަނީ ހުކުމްކޮށްފަ އެވެ.