މެންޗެސްޓާ (ސެޕްޓެމްބަރު 27) - މި ސީޒަނުގައި މިހާތަނަށް މެންޗެސްޓާ ޔުނައިޓެޑުން ދައްކަމުން އަންނަ ކުޅުމާއި މެޗުތަކުގައި ނެރޭ ނަތީޖާތަކާ މެދު އަމާޒުވަމުން އަންނަ ފާޑުކިޔުންތައް ބަލައިގަނެ، ޓީމެއްގެ ގޮތުގައި އެކަންކަމާ ކުރިމަތިލައި ހާލަތު ބަދަލުކުރަން ޖެހޭ ކަމަށް ޔުނައިޓެޑްގެ ކޯޗު އެރިކް ޓެން ހާގް ބުނެފި އެވެ.

ޔުނައިޓެޑުން އެންމެ ފަހުން ކުޅުނު ދެ މެޗުން ވެސް މޮޅުވެފައިނުވެ އެވެ. އިނގިރޭސި ޕްރިިމިއާ ލީގުގައި ލަނޑެއް ނުޖެހި، 0-0 އިން ކްރިސްޓަލް ޕެލަސްއާ އެއްވަރުވިއިރު، ޔޫރޮޕާ ލީގުގައި އަމިއްލަ ދަނޑުގައި ޓްވެންޓޭއާ ވަނީ 1-1 އިން އެއްވަރުވެފަ އެވެ.

އެ މެޗަށް ފަހު، ޓެން ހާގަށް އަމާޒުވި ސުވާލަކީ، ޔުނައިޓެޑަށް އެއް ފެންވަރެއްގައި ކުޅުން ދަމަހައްޓައި ނަތީޖާ ނުނެރެވުން ގުޅިފައި އޮތީ މެންޓަލިޓީގެ މައްސަލައަކާތޯ އެވެ.

ޓެން ހާގް ބުނީ، އަސްލު މައްސަލަތައް ހޯދައި، ކަންކަން ރަނގަޅުކުރުމުގެ ޒިންމާ އޮތީ އޭނާ ބޮލުގައި އެޅިފައި ކަމަށާއި ހާލަތު ރަނގަޅު ކުރުމުގެ މަސައްކަތް ކުރަމުން އަންނަ ކަމަށެވެ.

"ހަގީގަތް ގަބޫލުކުރަން ޖެހޭ. އަހަރެމެންނަށް އަމާޒުވާ ފާޑުކިޔުންތައް ވެސް ބަލައިގަންނަންޖެހޭ. އަހަންނަށް ޔަގީންކަން ދެވިދާނެ މެންޓަލިޓީގެ މައްސަލައެއް ނޫން މި އުޅެނީ. މިއީ ޓީމު އެކުގައި ކުރިއަށް ދިއުމުގައި ކުރިމަތިވާ ކަންތައްތައް. މި ކަންކަން މި ކިޔަނީ އަހަރެން ވެސް ހިމަނައިގެން. އަމިއްލަ ނަފްސާ މެދު އަހަރެން ވެސް ވިސްނަންޖެހޭ. ލޯގަނޑު ކުރިމަތީގައި ހުރެ އަހަރެން ވެސް ރަނގަޅަށް ބަލާލަން ޖެހޭ މި ކަންކަމާ މެދު އަހަރެންގެ ވިސްނުން ވެސް،" ޓެން ހާގް ބުންޏެވެ.

ކުރިއަށް އޮތް ތިން މެޗަކީ ޔުނައިޓެޑްގައި ޓެން ހާގްގެ ކުރި މަގު ނިންމުމުގައި އިސް ދައުރެއް އަދާކުރާނެ މެޗުތަކެކެވެ. އެއީ ލީގުގައި ޓޮޓެންހަމް ހޮޓްސްޕާސް އާއި އެސްޓަން ވިލާއާ ދެކޮޅަށް ޔުނައިޓެޑުން ކުޅޭ މެޗުތަކާއި ޔޫރޮޕާ ލީގުގައި ޕޯޓޯއާ ބައްދަލުކުރާ މެޗެވެ.