ފިޝަރީޒް މިނިސްޓްރީގެ ޑެޕިއުޓީ މިނިސްޓަރުން ހިމެނޭ ވަފުދެއް ގއ. ދާންދޫއަށް ދިޔުމުން، އެ ރަށުގެ މަސްވެރިން އިހުތިޖާޖުކޮށް މިނިސްޓްރީގެ އެ ޓީމު ރަށުން ފޮނުވާލައިފި އެވެ.

ދާންދޫއިން "އަދަދު" އާ ވާހަކަ ދެއްކި މަސްވެރިޔަކު ބުނީ މަސްވެރިންނަށް ދޭން ޖެހޭ އެތައް ލައްކަ ރުފިޔާއެއް ސަރުކާރުން ނުދީ އެބަހުރި ކަމަށާއި އެ ފައިސާ ނުދެނީސް މިނިސްޓްރީގެ އެއްވެސް ވަފުދެއް ރަށަށް އެރުމުގެ ފުރުސަތު ނުދޭނެ ކަމަށެވެ.

"މަސްވެރިން ވަނީ އެ މީހުން ރަށަށް އަރުވަން ފުރުސަތު ނުދީ އަނބުރާ ފޮނުވާލާފައި. މަސްވެރިން ބުނީ މަސްވެރިންނަށް ދޭން ޖެހޭ ފައިސާ އެބަހުއްޓޭ ލައްކައިން. އެ ފައިސާ ނުދީ މަސްވެރިން ކައިރިއަށް އަންނާނެ ކަމެއް ނެތޭ މަސްވެރިން ބުނީ،" އޭނާ ބުންޏެވެ.

ސަރުކާރުން މަސްވެރިންނަށް ވެފައިވާ ވައުދާ އެއްގޮތަށް ކިރާފައި ހުރި މަހަށްވާ ފައިސާ ދޫނުކޮށް ދިގުލައިގެންދާތީ މަސްވެރިން ކަންބޮޑުވާކަން ފާހަގަކޮށް އޭނާ ބުނީ މަސްވެރިން ތިބީ ދަރަނިވެރިވެފައި ކަމަށެވެ.

މި ނޫހަށް އެނގިފައިވާ ގޮތުގައި އެ ވަފްދު ދާންދޫއަށް ދިޔައީ މަސް ދޯނި ފަހަރުގައި ލޮނު ފެނުން މަސް ފިނިކުރާ ނިޒާމު ގާއިމު ކުރުމުގެ މަޝްރޫއާ ބެހޭ މައުލޫމާތު ދިނުމަށެވެ.

މަސްވެރިންނަށް ދޭން ޖެހޭ ފައިސާ ދޫނުކުރާތީ މީގެ ކުރިން މަސްވެރިން މުޒާހަރާ ކުރުމުން، ސަރުކާރަށް ޕްރެޝަރު ބޮޑުވެގެން އެއްފަހަރާ ހުރިހާ ފައިސާ ދޫކުރި އެވެ.

މަސްވެރިންނަށް ސަރުކާރުން ދޭ ފައިސާތައް ލަސްވެގެން ދެ ހަފްތާ ތެރޭގައި ޖަމާކޮށްދޭނެ ކަމަށް ސަރުކާރުން އޭރު ބުނި ނަމަވެސް، ފައިސާ ދޫނުކޮށް މިހާރު ދެ މަސްވަރު ވެފައިވާ ކަމަށް މަސްވެރިން ބުންޏެވެ.