ސަރުކާރުގެ ކުންފުނިތަކާއިމސިވިލް ސާވިސްގެ ވަޒީފާއިން ގާނޫނާ ހިލާފަށް ވަކި ކުރާ މުވައްޒަފުންނަށް އިދިކޮޅު މޯލްޑިވިއަން ޑިމޮކްރެޓިކް ޕާޓީ އިން ގާނޫނީ އެހީތެރިކަން ފޯރުކޮށްދޭން މިއަދު ނިންމައިފި އެވެ.

އެމްޑީޕީން ނެރުނު ނޫސް ބަޔާނެއްގައި ބުނީ ރައީސް ޑރ. މުހައްމަދު މުއިއްޒުއަށް ތާއީދު ނުކުރާ މުވައްޒަފުންނަށް ސިޔާސީ ގޮތުން ބިރުދައްކައި، ވަޒީފާތަކުން ވަކިކުރާތީ އަޅަންޖެހޭ ގާނޫނީ ފިޔަވަޅުތައް އަޅަން އެ މުވައްޒަފުންނަށް އެހީތެރިވާނެ ކަމަށެވެ.

"ސިޔާސީ ސަބަބުތަކަށްޓަކައި ވަޒީފާތަކުން ވަކިކުރަމުންދާތީ އެކަމުގައި އަޅަންޖެހޭ ގާނޫނީ ފިޔަވަޅުތައް އެޅުމުގައި އެ މުވައްޒަފުންނަށް އެހީތެރިވުމަށް އެމްޑީޕީން ވަނީ ނިންމާފައި،" އެމްޑީޕީން ބުންޏެވެ.

ގާނޫނީ އެހީތެރިކަން ބޭނުންވާ މީހުން [email protected] އަށް މެއިލް ކޮށްގެން ނުވަތަ 7341637 ނަންބަރަށް ވައިބާ ކޮށްގެން މައުލޫމާތު ހިއްސާ ކުރަން އެމްޑީޕީން އެދެ އެވެ.

ސަރުކާރުގެ މިނިސްޓްރީތަކާއި ސަަރުކާރު ކުންފުނިތަކުން މުވައްޒަފުންގެ ސިޔާސީ ފިކުރަށް ބަލައި ވަޒީފާތަކުން ވަކި ކުރާ މައްސަލަ އިތުރުވަމުން އަންނަ ކަމަށް އެމްޑީޕީން ބުނެ އެވެ.

ސަރުކާރުގެ މާލީ ހާލަތު ދަށްވުމުން އެންމެ އާދައިގެ މުވައްޒަފުން ވަކިކޮށް، ސަރުކާރަށް ސިޔާސީ މުވައްޒަފުން ނަގާ އަދަދު އިތުރުކުރާ ކަމަށް ވެސް އިދިކޮޅު ޕާޓީން ވަނީ ބުނެފަ އެވެ. ސަރުކާރުން މިހާތަނަށް ސިޔާސީ މުވައްޒަފުންގެ އަދަދު ހާމަކޮށްފައެއް ނުވެ އެވެ.