އެމެރިކާގެ ކުރީގެ ރައީސް ޑޮނަލްޑް ޓްރަމްޕަށް އިއްޔެ ބަޑިން ހަމަލާދޭން އުޅުނު ރަޔާން ވެސްލީ ރޫތު 58، ގެ މައްޗަށް ހާދިސާ ހިނގިތާ 24 ގަޑިއިރު ތެރޭގައި ދައުވާ އުފުލައިފި އެވެ.

ޓްރަމްޕަށް ހަމަލާދޭން އުޅުނީ ފްލޮރިޑާގައި ހުންނަ ގޯލްފް ރިސޯޓެއްގައި ހުންނަވަނިކޮށް 365 މީޓަރާއި 457 މީޓަރާ ދެމެދު ދުރުމިނުގައި އޭކޭ-47 ސްޓައިލް ރައިފަލްއެއް ބޭނުންކޮށްގެންނެވެ. އެ ހަމަލާ ނާކާމިޔާބުކޮށްލީ ސީކްރެޓް ސާވިސްއިންނެވެ.

"ކުށުގެ ރެކޯޑު އޮންނަ ރޫތުގެ މައްޗަށް ދައުވާ އުފުލާފައި ވަނީ ކުށްވެރިޔަކަށްވެ ހުރެ ބަޑިއެއް ގެންގުޅުމުގެ ދައުވާ އާއި ފޮހެފައިވާ ސީރިއަލް ނަންބަރު ޖެހި ބަޑިއެއް ގެންގުޅުމުގެ ދައުވާ،" ރިޕޯޓްތައް ބުންޏެވެ.

ރޫތުގެ މައްޗަށް ބަޑި ގެންގުޅުމުގެ ދައުވާތަކުގެ އިތުރުން އެހެނިހެން ދައުވާތައް ކުރުމަށް ވެސް ތައްޔާރުވަމުން އަންނަ ކަމަށް ރިޕޯޓްތައް ބުނެ އެވެ.

ހަމަލާއާ ގުޅޭ ގޮތުން ޓްރަމްޕް ވިދާޅުވީ އޭނާއަށް އެއްވެސް އަނިޔާއެއް ނުވެ ގަދަވެ ސަލާމަތުން ހުރި ކަމަށާއި ކުރާ މަސައްކަތް ހުއްޓުވަން މީހުން ކުރާ ކަންކަމާއެކު ދުވަހަކު ވެސް ފަހަތަށް ނުޖެހޭނެ ކަމަށެވެ.

ހަމަލާ ދޭން އުޅުމުން އެމެރިކާ ސަރުކާރުން ވަނީ އެކަން ކުށްވެރިކޮށް، އެމެރިކާގައި އެއްވެސް ކަހަލަ އަނިޔާވެރި އަމަލެއް ހިތްވަރު ނުދޭނެ ކަމަށް ބުނެފަ އެވެ.

ޓްރަމްޕްއަށް ޖުލައި، 13 ގައި ވެސް ބަޑިން ވަނީ ހަމަލާދީފަ އެވެ. އެ ހަމަލާގައި ޓްރަމްޕްގެ ކަންފަތަށް ކޮންމެވެސް ވަރެއްގެ ޒަހަމްތަކެއް ލިބުނެވެ. ނަމަވެސް އެ ހަމަލާދިން މީހާއަށް ސީކްރެޓް ސާވިސްއިން ވަނީ ހަމަލާދީ ވަގުތުން މަރާލާފަ އެވެ.

އަންނަ ނޮވެމްބަރު 5، ގައި ބާއްވާ އެމެރިކާގެ އިންތިހާބުގައި ޓްރަމްޕްއާ ވާދަކުރައްވަނީ ޑިމޮކްރެޓްސްގެ ކެންޑިޑޭޓު އެމެރިކާގެ ނައިބުރައީސް ކަމަލާ ހެރިސް އެވެ.