މި މަހު ބޭއްވި އެމެރިކާގެ ރިޔާސީ އިންތިހާބު ކާމިޔާބުކުރައްވައި ދެވަނަ ދައުރު ކަށަވަރު ކުރައްވާފައިވާ ރައީސް ޑޮނަލްޑް ޓްރަމްޕުގެ މައްޗަށް މެއި މަހު ސާބިތުވި ކުށުގެ މައްސަލައިގައި ހުކުމް އިއްވުން މުއްދަތެއް ނެތް ގޮތަށް ފަސްކޮށްފި އެވެ.

ޓްރަމްޕު، 78, ގެ މައްޗަށް ސާބިތުވީ އޭނާ ޖިންސީ ގުޅުމެއް ބޭއްވި ޕޯން ސްޓާ، ސްޓޯމީ ޑެނިއަލްސް އަށް ފައިސާ ދީ އެ ގުޅުމުގެ ވާހަކަ އޮއްބާލަން މަސައްކަތްކުރި ކަމުގެ ދައުވާ އެވެ. އެކަން ފޮރުވަން ޓްރަމްޕު 2016 ގެ އިންތިހާބުގެ ކެމްޕޭނު ތެރޭގައި ވިޔަފާރީގެ ލިޔެކިޔުންތަކެއް ބަދަލުކުރިކަން ވެސް ވަނީ ސާބިތުވެފަ އެވެ.

ނިއު ޔޯކުގައި ކުރިއަށްދާ މި މައްސަލައިގެ ހުކުމް ކުރުން މީގެ ކުރިންވެސް ފަސްކުރި އެވެ. އިންތިހާބަށް އަސަރުކޮށްފާނެ ކަމަށް ބަލައި އެފަހަރު ހުކުމް ކުރުމުގެ އަޑުއެހުން ތާވަލުކުރީ ނޮވެމްބަރު 26، އަށެވެ. ނަމަވެސް އެ އަޑުއެހުން ކެންސަލްކޮށް ހުކުމް ކުރުން ފަސްކުރިއިރު ދެން އަޑުއެހުން ބާއްވާނެ ދުވަހެއް ކަނޑައަޅާފައެއް ނުވެ އެވެ.

މި ދައުވާގެ މަސައްކަތް މަޑުޖައްސާލައި، އިންތިހާބީ ރައީސަކަށް ހުކުމް ކުރުމާމެދު ގޮތެއް ނިންމުމަށް ޓްރަމްޕުގެ ވަކީލުންނާއި ދައުވާ ކުރާ ފަރާތުގެ ވަކީލުންވެސް ވަނީ އެއްބަސްވެފަ އެވެ. މިއީ މީގެ ކުރިން ދިމާވެފައިވާ ގާނޫނީ ހާލަތެއް ނޫންކަމަށް އެ ގައުމުގެ ނޫސްތަކުން ރިޕޯޓުކުރެ އެވެ.

އެމެރިކާގެ ގާނޫނުއަސާސީއަށް ރިއާޔަތްކޮށް އެ ގައުމުގެ ޑިޕާޓްމަންޓު އޮފް ޖުޑީޝަރީން ބުނާގޮތުން ރައީސަކަށް ދައުވާ ކުރުމަކީ ގާނޫނީ ބާރު ލިބިދޭ ކަމެއް ނޫނެވެ. އެހެން ކަމުން ޖެނުއަރީ 20، 2025 ގައި ޓްރަމްޕު ދެވަނަ ދައުރަކަށް ހުވާ ކުރުމާއެކު މި އަޑުއެހުމަށް ވާނެ ގޮތަކާމެދު ވަނީ އެތައް ސުވާލެއް އުފެދިފަ އެވެ.

ޓްރަމްޕު އަދި އޭނާގެ ވަކީލުން ބުނަނީ މިއީ ސިޔާސީ ގޮތުން އޭނާގެ މައްޗަށް ކޮށްފައިވާ ދައުވާއެއް ކަމަށެވެ. ދައުވާ ކުރީ ޑިމޮކްރެޓިކް ޕާޓީއަށް ނިސްބަތްވާ ނިއު ޔޯކުގެ ޑިސްޓްރިކް އެޓާނީ އެކެވެ.

މި ކަންކަމަށް ބަލައި ދައުވާ ބާތިލުކޮށް މައްސަލަ އެއްކޮށް އޮއްބާލުމަށް ޓްރަމްޕުގެ ވަކީލުންގެ ޓީމުން ދަނީ މަސައްކަތް ކުރަމުންނެވެ.