ދިވެހި ބަހާއި ސަގާފަތާ ބެހޭ ވުޒާރާގައި މަސައްކަތް ކުރާ ސިވިލް ސާވަންޓުންގެ ވަޒީފާގެ މަސްއޫލިއްޔަތުތައް އޮޅުންބޮޅުންވެ މަސައްކަތް ކުރަން ދަތިވެފައިވާ ކަމަށް ބުނެ އެ މިނިސްޓްރީގެ ބައެއް މުވައްޒަފުން ސިވިލް ސާވިސް ކޮމިޝަނަށް ހުށަހަޅާފައިވާ ޕެޓިޝަނުގައި ފާހަގަ ކޮށްފައިވާ މުވައްޒަފަކީ ވަރަށް ރަނގަޅަށް ފަރުވާތެރިކަމާ އެކު މަސައްކަތް ކުރާ މުވައްޒަފެއް ކަމަށް މިނިސްޓަރު އާދަމް ނަސީރު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެެއްވަމުން މިނިސްޓަރު ނަސީރު ވިދާޅުވީ އެ ވުޒާރާގެ މުވައްޒަފުންތަކެއް ސިވިލް ސާވިސްއަށް ހުށަހަޅާފައިވާ ޕެޓިޝަނުގައި ހުރި ޝަކުވާތައް ހިފައިގެން އޭނާއާ ހަމައަށް ރަސްމީކޮށް އެއްވެސް މުވައްޒަފަކު ނުދާ ކަމަށެވެ. ނަމަވެސް ޕެޓިޝަނުގައި ނަން ފާހަގަކޮށްފައިވާ މުވައްޒަފަކީ ވަރަށް ފަރުވާތެރި ކަމާއެކު ބުރަކޮށް މަސައްކަތް ކުރާ މުވައްޒަފެއް ކަމަށް ނަސީރު ވިދާޅުވި އެވެ.
"ސީދާ ވަކި ބޭފުޅަކަށް އަމާޒުވެފައި އޮތީމަ އޭނާއާ ބެހޭ ގޮތުން ދަންނަަވަން އޮތީ ހަމަ ވަރަށް ބުރަކޮށް ހަވާލު ކުރެވުނު ކޮންމެ މަސައްކަތެއް ވަރަށް ރަނގަޅަށް ގަޑިއަށް ނިންމަވާ ފަރުވާތެރި މުވައްޒަފެކޭ، ރަނގަޅަށޭ މަސައްކަތް ކުރައްވަމުން ގެންދަވަނީ،" އާދަމް ނަސީރު ވިދާޅުވި އެވެ.
ދިވެހި ބަހާއި ތަރިކައާ ބެހޭ ވުޒާރާގެ މުވައްޒަފުންތަކެއް ސޮއިކޮށް ސިވިލް ސާވިސް ކޮމިޝަނަށް ހުށަހެޅި ޕެޓިޝަންގެ ކޮޕީއެއް މިހާރު ސޯޝަލް މީޑިއާގައި ދައުރުވަމުން ދާއިރު، އެ ޕެޓިޝަނުގައި ބުނެފައި ވަނީ އެ ވުޒާރާގެ މުވައްޒަފުންގެ ހައްގުތަކަށް ބެލުމެއް ނެތި ހަމަހަމަކަމުގެ އުސޫލުން ބޭރުން ވަޒީފާގެ މަސްއޫލިއްޔަތުތަކާއި ވާޖިބުތަކަށް ބެލުމެއް ނެތި ގަނާ ކުރުމުގެ އުސޫލުން އެވަގުތަކު ބޭނުންވާ ފަރާތެއް ލައްވައި ބޭނުންވާ ކަމެއް އެ ވުޒާރާގެ ބައެއް ވެރީން ކުރަމުންދާ ކަމަށެވެ.
ޕެޓިޝަނުގައި ހާއްސަކޮށް ފާހަގަކޮށްފައި ވަނީ އެ މިނިސްޓަރީގެ އެކްޓިން ޕީއެސްގެ މަގާމުގައި ހުންނެވި، ޑިރެކްޓާ ޖެނެރަލް، އާތިކާ އިބްރާހީމްގެ ނަމެވެ.
މިއަދު އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރު ނަސީރު ވިދާޅުވީ އެ މިނިސްޓަރީގެ މުވައްޒަފުންނަކީ ވަރަށް ބުރަކޮށް މަސައްކަތް ކުރާ ބައެއް ކަމަށާއި ޕެޓިޝަނުގައި ނަން ފާހަގަކޮށްފައި އޮތް އާތިކާގެ ދަށުން ވެސް 80 އަށްވުރެ ގިނަ މުވައްޒަފުން މަސައްކަތް ކުރަމުންދާ ކަމަށެވެ.
"މި މަސައްކަތުގައި ވަރަށް އަވަދިނެތި ވަރަށް ބުރަކޮށް ވަރަށް ޒިންމާދާރުކޮށް މަސައްކަތް ކުރައްވާ އެތައް މުވައްޒަފުންނެއް އެބަތިއްބެވި، ގާތްގަނޑަކަށް މިހާރު ހުންނެވި އެކްޓިން ޕީއެސްގެ ބެއްލެވުމުގެ ދަށުގައި 80 ވަރަކަށް މުވައްޒަފުން އެކި ގުނަވަންތަކާ އެކީގައި އެބަ ހިމެނޭ، 80 އަށްވުރެ ވެސް ގިނަވާނެ، އެހެންވީމާ އަޅުގަނޑުމެންގެ ތެރޭގައި ވަރަށް ބުރަކޮށް މަސައްކަތް ކުރައްވާ މުވައްޒަފުން އެބަތިއްބެވި،" ނަސީރު ވިދާޅުވި އެވެ.
އޭނާ ވިދާޅުވީ އެ މައްސަލަ މިހާރު އޮތީ ސިވިލް ސާވިސްގައި ކަމަށް ވާތީ ދެން އެކަމާ ގުޅިގެން ވާހަކަ ދައްކާނީ އެ ކޮމިޝަނުން ކަމަށާއި އެކަމާ ގުޅޭ ގޮތުން އިތުރަށް ދަންނަވާނެ އެއްޗެއް ނެތް ކަމަށެވެ.
"ތިކަން އަޅުގަނޑާ ހަމައަށް ރަސްމީކޮށް އައިސްފައި ނެތުމާއި އަދި ތިޔަ ވިދާޅުވީ މިހާރު ސިވިލް ސާވިސްގައޭ އެ މައްސަލަ އޮތީ، ދެން އެހެން ކަމަށްވަންޏާ ދެން އެކޮޅުން ދެއްތޯ އެއަށް ވާހަކަ ދައްކަވާނީ، އަޅުގަނޑު ދަންނަވާނެ އެއްޗެއް ނެތް،" ނަސީރު ވިދާޅުވި އެވެ.
ސޯޝަލްމީޑިއާގައި އާންމުވެފައިވާ ޕެޓިޝަނުގައި ދިވެހި ބަހާއި ތަރިކައާ ބެހޭ މިނިސްޓަރީގެ މުވައްޒަފުން ޖުމުލަ 11 ޝަކުވާއެއް ފާހަގަކޮށްފައިވެ އެވެ.
އެގޮތުން އެ މިނިސްޓަރީގައި މަސައްކަތް ކުރާ ސަޕޯޓު މުވައްޒަފުންނަކީ އެ މިނިސްޓަރީގެ ބައެއް މަގާމުތައް ފުރުއްވާ ބޭފުޅުންނަށް ސައި ތައްޔާރުކޮށްދޭން އެކަށީގެންވާ ބައެއް ނޫން ކަމަށް ބުނެ މިނިސްޓަރީގެ އިދާރީ މުވައްޒަފުން ލައްވައި ގަދަކަމުން ސައި ތައްޔާރު ކުރުވާ ކަމުގެ ޝަކުވާ އާއި އެއް ފަންތިއެއްގެ މުވައްޒަފުންނަށް މަސައްކަތް ހަވާލު ކުރުމުގައި ތަފާތު ކުރުން ގެންގުޅުމުގެ އިތުރުން ބަންދު ދުވަސްތަކާއި ރަސްމީ ވަގުތު ނޫން ވަގުތުތަކުގައި ވެސް މަސައްކަތަށް ނެރުމަށް މަގާމުގެ ނުފޫޒު ބޭނުންކޮށް ރަހުމުކުޑަކޮށް މުއާމަލާތު ކުރާ ކަމަށް ތުހުމަތު ކޮށްފައިވެ އެވެ.
އޭގެ އިތުރުން، ނަހަމަ ގޮތުގައި މަގާމުގެ ބޭނުންކޮށް، ވަކިވަކި މުވައްޒަފުންނާ ޒާތީ ގޮތުން ޖައްސައިލުމާއި ރަސްމީ ގަޑީގައި އޮފީހުގެ މުވައްޒަފުން ނޫން މީހުން އޮފީހަށް ވައްދައި، މަސައްކަތުގައި ޝާމިލުކޮށްގެން ގެންގުޅުމާއި މިނިސްޓަރީގެ ރިޕޯޓިން ހައިރާކީ އޮޅޭ ގޮތަށް މަސައްކަތް ހަވާލު ކުރާ ކަމަށް ވެސް ތުހުމަތު ކޮށްފައިވެ އެވެ.
ހަމައެހެންމެ، މުވައްޒަފުންނަށް އެންގުމަކާ ނުލައި ވަކި ސަބަބެއް ބަޔާން ކުރުމެއް ނެތި ހަމަޖެހިފައިވާ އުސޫލުތަކުގެ ބޭރުން ވަކި ފަރާތެއް އަންގައިގެން ކަމަށް ބުނެ މުވައްޒަފުން ވަޒީފާގެ މަސްއޫލިއްޔަތުތަކުން އެކަހެރި ކުރުމާއި ގަވާއިދާ ހިލާފަށް އަމަލު ކުރަން މުވައްޒަފުންނަށް މަޖުބޫރު ކުރާ ކަމަށް ވެސް ޕެޓިޝަނުގައި ތުހުމަތު ކޮށްފައިވެ އެވެ.
މި ހިނގާ ސެޕްޓެމްބަރު 11، ވަނަ ދުވަހުގެ ސިވިލް ސާވިސްއަށް ފޮނުވާފައިވާ އެ ޕެޓިޝަނާ ގުޅޭ ގޮތުން ސިވިލް ސާވިސްއިން މިހާތަނަށް އެއްވެސް އެއްޗެއް ނުބުނެ އެވެ.
