ނޭޕްލްސް، އިޓަލީ (ސެޕްޓެމްބަރު 16) - އިޓާލިއަން ލީގުގައި ރޭ ރޮމެލޫ ލުކާކޫ ތަފާތު ދައްކައި 4-0 އިން ކަލިއަރީ އަތުން ނަޕޯލީ މޮޅުކޮށްދިންއިރު، އެންމެ ފަހުގެ ޗެމްޕިއަން، އިންޓަ މިލާން މޮންޒާއާ ދެކޮޅަށް ކުޅުނު މެޗުން 1-1 އިން އެއްވަރުވެއްޖެ އެވެ.

ޗެލްސީ ދޫކޮށް ނަޕޯލީ އަށް ބަދަލުވެ ކުޅުނު ދެ ވަނަ މެޗުގައި ލަނޑެއް ޖެހުމުގެ އިތުރުން ލުކާކޫ ވަނީ ދެ ލަނޑު ޖަހަން ފުރުސަތު ވެސް ތަނަވަސްކޮށްދީފަ އެވެ.

ލުކާކޫ، ނަޕޯލީގެ ތިން ވަނަ ގޯލު ޖެހުމުގެ ކުރިން ފުރަތަމަ ދެ ގޯލު ޖަހަން، ޖިއޮވާނީ ޑި ލޮރެންޒޯ އާއި ކްވިޗާ ކްރަވަޝްކޭލިއާގެ ލަނޑުތަކަށް ފުރުސަތު ހޯދައިިދިނީ ލުކާކޫ އެވެ.

ނަޕޯލީގެ ފަހު ގޯލު ޖެހީ، އިތުރު ވަގުތުގައި އަލެސަންދްރޯ ބުއޯންޖިއޯރްނޯ އެވެ. މި މެޗުގައި، ނަޕޯލީ ޓީމަށް، ސްކޮޓްލެންޑްގެ ދެ ކުޅުންތެރިން ކަމަށްވާ ސްކޮޓް މެކްޓޮމިނޭ އާއި ބިލީ ގިލްމޯ ވަނީ ކުޅެފަ އެވެ. މިއީ، މެންޗެސްޓާ ޔުނައިޓެޑް ދޫކޮށް ދިޔަ، މެކްޓޮމިނޭ އާއި ބްރައިޓަން އިން ނަޕޯލީ އަށް ބަދަލުވި، ގިލްމޯ އެ ޓީމަށް ކުޅެދިން ފުރަތަމަ މެޗެވެ.

އެންމެ ފަހުގެ ޗެމްޕިއަން، އިންޓަ ކޮޅަށް ރޭ އަމިއްލަ ދަނޑުގައި ކުޅުނު މޮންޒާ އިން ލީޑުނެގީ، 81 ވަނަ މިނިޓްގަ އެެވެ. މި ލަނޑު ޖެހީ، ބަދަލަކަށް ކުޅެން އެރި ޑެނީ މޮޓާ އެވެ. އިންޓަ ބަލިވާން ދަނިިކޮށް ސަލާމަތްވީ، 88 ވަނަ މިނިޓްގައި ޑެންޒެލް ޑަމްފްރީސް ލަނޑު ޖަހައި އެއްވަރުކުރުމުންނެވެ.

ނަޕޯލީ އެއް ވަނައިގައި އޮތީ ހަތަރު މެޗުން ނުވަ ޕޮއިންޓާ އެކު އެވެ. އިންޓަ ދެ ވަނައިގައި އޮތީ ހަތަރު މެޗުން އަށް ޕޮއިންްޓް ހޯދައިގެންނެވެ.

ލީގުގައި މި ހަފްތާގައި އޭސީ މިލާނުން ވަނީ 4-0 އިން ވެނެޒިއާ ބަލިކޮށްފަ އެވެ. އެމްޕޮލީ އާއި ޔުވެންޓަސް ވަނީ ލަނޑެއް ނުޖެހި 0-0 އިން އެއްވަރުވެފަ އެވެ.