ރާއްޖޭގައި އިއްޔެ ފެށި ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) ވޮލީބޯލް ކުލަބު ޗެމްޕިއަންޝިޕުގައި ޕޮލިސް ކުލަބުން ކުޅުނު ފުރަތަމަ މެޗުގައި ތަޖިކިސްތާންގެ ވޮލީބޯލް ކްލަބް ޑިއަމެޑްގެ މައްޗަށް ސީދާ ތިން ސެޓުން ކުރިހޯދައި މޮޅަކުން މުބާރާތް ފަށައިފި އެވެ.

ޒުވާނުންގެ މަރުކަޒު އެތެރޭ ކޯޓުގައި ރޭ ކުޅުނު މި މެޗުގައި, ޕޮލިހުން ޑިއަމެޑްގެ މައްޗަށް ކުރިހޯދީ ސީދާ ތިން ސެޓުންނެވެ. މި މެޗުގެ ސެޓުތައް ގެންދިޔައީ, 25-16، 25-14 އަދި 25-19 އިންނެވެ.

އަނިޔާގެ ސަބަބުން މި މެޗުގައި ޕޮލިސް ކުލަބްގެ އެންމެ އިތުބާރު ކުޅުންތެރިޔާ އާމިނަތު ޝަހާ ޝާމިން ނުކުޅެ އެވެ. ޝަހާ ވަނީ މި މަހު ރާއްޖޭގައި ބޭއްވި ކާވާ ވިމަންސް ޗެމްޕިއަންޝިޕުގައި ގައުމީ ޓީމާއެކު ތަފާތު މޮޅަށް ކުޅެ, އެ މުބާރާތުގެ ބެސްޓް އޮޕަސިޓް ޕްލޭޔާގެ މަގާމު ހޯދާފަ އެވެ.

މި މެޗުގެ ފުރަތަމަ ސެޓު ފަށައިގެން ވާދަވެރި ކުޅުމެއް ފެނިގެންދިޔަ ނަމަވެސް ސެޓުގެ ވަކި ހިސާބަކުން ޕޮލިހުން ވަނީ ގޭމުގެ ތެރެއަށް ރަނގަޅަށް ވަދެ ޑިއަމެޑްގެ މައްޗަށް ބޮޑު ލީޑެއް ނަގާފަ އެވެ. އެ ލީޑާއެކު, ޕޮލިހުން ސެޓު ނިންމާލީ 25-16 އިންނެވެ. މި ސެޓުގައި ޕޮލިހުގެ ހައްވާ ރާޝިދާގެ މޮޅު ސާވިސްތަކުން ގިނަ ޕޮއިންޓްތަކެއް ހޯދި އެވެ.

ދެވަނަ ސެޓުގައި ޑިއަމެޑް ޓީމު ފެނިގެންދިޔައީ އާދައިގެ ގޮތަކަށެވެ. އޭގެ ފައިދާ ޕޮލިހުން ނަގާ މި ސެޓު ވަނީ ފަސޭހަކަމާއެކު 25-14 އިން ގެންގޮސްފަ އެވެ.

މެޗުގެ ތިންވަނަ ސެޓުގައި ޕޮލިސް ކުލަބުގެ ފަރާތުންވެސް ގިނަ ގޯސްތަކެއް ފެނިގެންދިޔަ އެވެ. އެކަމަކު އެ ޓީމުގައި ތިބި ތަޖުރިބާކާރު ކުޅުންތެރިން ވަނީ ސެޓުގެ ފަހު ކޮޅު މޮޅަށް ކުޅެ, 25-19 އިން ސެޓު ގެންގޮސްފަ އެވެ.

މި މުބާރާތުގައި ފަސް ގައުމަކުން ހަ ކުލަބު ވާދަކުރެ އެވެ. އެއީ ރާއްޖޭގެ ޕޮލިސް ކުލަބާއި ކުލަބު ވެމްކޯގެ އިތުރުން ނޭޕާލުގެ ޕޮލިސް ކުލަބާއި، ސްރީ ލަންކާގެ އެއާ ފޯސް އާއި، އުޒްބެކިސްތާންގެ ހުމޯ ވޮލީބޯލް ކުލަބު އަދި ތަޖިކިސްތާންގެ ވޮލީބޯލް ކުލަބު ޑިއަމެޑް އެވެ.