ޑްރަގް އެންފޯސްމަންޓާއި ކައުންޓާ ނާކޮޓިކްސް އިންޓެލިޖެންސް އަދި ނޯތު ޕޮލިސް ފުލުހުން ގުޅިގެން ޅ. ހިންނަވަރާއި ޅ. ނައިފަރުގައި ހިންގި މަސްތުވާތަކެތީގެ އޮޕަރޭޝަނެއްގައި ފަސް މީހަކު އިއްޔެ ހައްޔަރުކޮށްފި އެވެ.

ފުލުހުން ބުނީ އެ އޮޕަރޭޝަނުގައި 12 ތަނެއް ބަލައި ފާސްކުރުމުގެ ތެރެއިން 86.26 ގްރާމުގެ މަސްތުވާތަކެތި ކަމަށް ބެލެވޭ އެއްޗެހިތަކެއް ފެނިފައިވާ ކަމަށާއި އަދި 293،000ރ. އާއި ޑޮލަރުގެ އިތުރުން ޔޫރޯ ވެސް ފެނިފައިވާ ކަމަށެވެ.

އޮޕަރޭޝަންގައި ހައްޔަރުކުރި ފަސް މީހުން:

1. ޅ. ހިންނަވަރު، އަގީދުގެ، ހުސެއިން އީސާ ފުޅު، 48.
2. ޅ. ހިންނަވަރު، މިދިލިމާގެ، އަހުމަދު މުހައްމަދު، 36.
3. ޅ. ނައިފަރު، ޑޭޒީހިޔާ، އަބްދުﷲ ޒަކަރިއްޔާ، 46.
4. ޅ. ހިންނަވަރު، ފެހިގެ، މުހައްމަދު އިރުޝާދު، 35.
5. އދ. މަހިބަދޫ، ކުޅިބަލާގެ، ފާތިމަތު ރީމާ، 44.

ފުލުހުން ބުނީ އެ ފަސް މީހުންގެ އިތުރުން އެހެން މީހުން ވެސް ބަލާ ފާސްކޮށްފައިވާ ކަމަށެވެ.

ހައްޔަރުކުރި ފަސް މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ހުސެއިން އީސާފުޅު އަދި އަހުމަދު މުހައްމަދު ހަތް ދުވަހަށް ބަންދުކޮށްފައިވާ ކަމަށް ފުލުހުން ބުންޏެވެ.

އޭގެއިތުރުން ފުލުހުން ބުނީ އަބްދުﷲ ޒަކަރިއްޔާ 15 ދުވަހަށް، ފާތިމަތު ރީމާ 12 ދުވަހަށް އަދި މުހައްމަދު އިރުޝާދު ތިން ދުވަހަށް ބަންދު ކުރުމަށް އަމުރުކޮށްފައިވާ ކަމަށެވެ.

މި މައްސަލަ ތަހުގީގު ކުރަމުންދާ ކަމަށް ފުލުހުން ބުންޏެވެ.