މިދިޔަ އަންގާރަ ދުވަހު ހޮޅުދޫގައި ޒަހަމްތަކަކާއެކު މަރުވެފައި އޮއްވާ ފެނުނު ނިއުލައިފް، ޒަކިއްޔާ މޫސާ، 50، ގެ ހަށިގަނޑުގެ ޓެސްޓުތަކެއް ހެދުމަށް ފަހު އޭނާގެ ހަށިގަނޑު އަނބުރާ އެ ރަށަށް މިއަދު ހެނދުނު ފޮނުވައިލައިފި އެވެ.

ޒަކިއްޔާގެ ހަށިގަނޑު ޓެސްޓުތަކެއް ހެދުމަށް މާލެ ގެނައީ އަންގާރަ ދުވަހުގެ ރޭގެ ވަގުތެއްގަ އެވެ. އޭނާގެ ހަށިގަނޑުގެ ޕޯސްޓްމޯޓަމް ހަދާފައި ނުވާއިރު އިތުރު ތަފްސީލެއް ފުލުހުން ނުދެ އެވެ.

ޒަހަމްތައް ހުރީ ޒަކިއްޔާގެ ކަރުގައި ކަމަށް މަންޒަރު ފެނުނު މީހުން ބުންޏެވެ. އޭނާ ފެނުނުއިރު ކައިރީގައި ވަޅިއެއް އޮތް ކަމަށް މައުލޫމާތު ދިން މީހުން ބުންޏެވެ.

ޒަކިއްޔާގެ މަރުގެ މައްސަލައާ ގުޅިގެން މާލެއިން ފުލުހުންގެ ހާއްސަ ޓީމެއްވެސް ވަނީ ހޮޅުދޫއަށް ގޮސްފަ އެވެ. އެ ޓީމުން މިހާރު ދަނީ މި މައްސަލަ ތަހުގީގު ކުރަމުންނެވެ.

މި މައްސަލައާ ގުޅިގެން އެއްވެސް މީހަކު ހައްޔަރުކޮށްފައި ނުވާ ކަމަށް ފުލުހުން ބުނެ އެވެ.