ލިވަޕޫލް (ސެޕްޓެމްބަރު 9) - ލިވަޕޫލްގެ ކެޕްޓަން، ވާޖިލް ވެން ޑައިކް ވެސް އެ ޓީމުގެ ކޮންޓްރެކްޓް އާ ކުރަން ބޭނުންވާ ކަަމުގެ ޝައުގުވެރިކަން ފާޅުކޮށްފައިވާ ކަމަށް މީޑިއާ ރިޕޯޓްތައް ބުނެފި އެވެ.

ލިވަޕޫލްގެ މުހިންމު ތިން ކުޅުންތެރިން ކަމަށްވާ ވެން ޑައިކް އާއި މުހައްމަދު ސަލާހު އަދި ޓްރެންޓް އަލެކްސަންޑަ އާނޯލްޑް، އެ ކްލަބާ އެކު ހަދާފައިވާ ކޮންޓްރެކްޓް ހަމަވާނީ މި ސީޒަނުގެ ނިޔަލަށެވެ. އެ ތިން ކުޅުންތެރިންނާ އެކު ވެސް ލިވަޕޫލުން މި މަސް ތެރޭގައި ކޮންޓްރެކްޓް އާ ކުރަން މަޝްވަރާތައް ފަށާނެ ކަމަށް މީޑިއާ ރިޕޯޓްތައް ބުނެ އެވެ.

އޭގެ ތެރެއިން، ސަލާހު އާއި ވެން ޑައިކް ހުރީ ކޮންޓްރެކްޓް އާ ކުރަން ތައްޔާރަށް ކަމަށް ރިޕޯޓްތައް ބުނެ އެވެ.

އެ ގޮތުން، ވެން ޑައިކް، 33، ގެ ވިސްނުން ހުރީ، ލިވަޕޫލާ އެކު، ދެ އަހަރުގެ ކޮންޓްރެކްޓެއް ހަދައި، 2026 ވަނަ އަަހަރުގެ ފީފާ ވޯލްޑް ކަޕާ ހަމައަށް އެ ކްލަބްގައި މަޑުކުރުމަށް ކަމަށް ރިޕޯޓްތައް ބުނެ އެވެ. އަދި ވެން ޑައިކް މި ނިންމުން ނިންމީ، ނެދަލެންޑްސްގެ ކޯޗު ރޮނާލްޑް ކޫމަންގެ ވެސް މަޝްވަރާގެ މަތިން ކަމަށް ރިޕޯޓްތައް ބުނެ އެވެ.

ސައުތެމްޓަން ދޫކޮށް، 2018 ވަނަ އަހަރުގެ ޖެނުއަރީގައި ވެން ޑައިކް ލިވަޕޫލަށް ބަދަލުވީ 94 މިލިއަން ޑޮލަރުގެ ޑީލެއްގަ އެވެ. މިއީ އޭރަށް ބަލާނަމަ ޑިފެންޑަރަކަށް ކްލަބަކުން ދިން އެންމެ ބޮޑު ޓްރާންސްފާ ފީ އެވެ. އެންމެ އަގުބޮޑު ޑިފެންޑަރުގެ ގޮތުގައި ލިވަޕޫލާ ގުޅުމަށް ފަހު ވެން ޑައިކް ތަފާތު މޮޅަށް ކުޅުނެވެ. އަދި އިންޑިވިޖުއަލް އެވޯޑްތަކަށް ވެސް ވަނީ ވާދަކޮށްފަ އެވެ.

މި ސީޒަނުގައި، އާނާ ސްލޮޓްގެ ކޯޗުކަމުގައި ލިވަޕޫލުން މޮޅު ކުޅުމެއް ދައްކަމުން އަންނައިރު، ޓީމުގެ ފަހަތުގައި ވެން ޑައިކް ވެސް ކުޅެމުން އަންނަނީ ރަނގަޅު ފޯމެއްގަ އެވެ. ލީގުގެ ތިން މެޗުން ލިވަޕޫލް މޮޅުވީ، ކޮޅަށް ގޯލެއް ނުވަދެ އެވެ.