މެންޗެސްޓާ (ޖެނުއަރީ 5) - އިނގިރޭސި ޕްރިމިއާ ލީގުގައި ރޭ ޗެލްސީން ފަހު ވަގުތު ލަނޑު ޖަހައި، 1-1 އިން އެއްވަރުކޮށް މެންޗެސްޓާ ސިޓީ މޮޅުވިޔަނުދީ ހުއްޓުވިއިރު، ލިވަޕޫލާއި މެންޗެސްޓާ ޔުނައިޓެޑް ކުޅުނު މެޗުތަކުން އެއްވަރުވެއްޖެ އެވެ.

ޔުނައިޓެޑުން ލީޑްސް ޔުނައިޓެޑް ދަނޑުގައި 1-1 އިން އެއްވަރުވިއިރު، ލިވަޕޫލާއި ފުލަމް ވަނީ 2-2 އިން އެއްވަރުވެފަ އެވެ.

ރޭގެ ނަތީޖާތަކަށް ފަހު، އާސެނަލަށް ވަނީ ލީގުގެ އެއް ވަނައިގައި ހަ ޕޮއިންޓުގެ ލީޑެއް ލިބިފަ އެވެ. އާސެނަލަށް 20 މެޗުން 48 ޕޮއިންޓް ލިބިފައިވާއިރު، ޖެހިޖެހިގެން ދެ މެޗުން އެއްވަރުވި ސިޓީ އަށް 20 މެޗުން ލިބިފައިވަނީ، 42 ޕޮއިންޓެވެ. އަދި، ތިން ވަނައިގައި އޮތް އެސްޓަން ވިލާ އަށް ވެސް 20 މެޗުން 42 ޕޮއިންޓް ލިބިފައިވާއިރު، ހަތަރެއްގައި އޮތް ލިވަޕޫލަށް 20 މެޗުން ލިބިފައިވަނީ 34 ޕޮއިންޓެވެ.

ސިޓީގެ އިއްތިހާދު ސްޓޭޑިއަމްގައި ރޭ އެ ޓީމަށް ފުރަތަމަ ހާފުގައި ލީޑުނަގައިދިނީ ޓިޖާނީ ރައިންޑާސް އެވެ. އެކަމަކު، މެޗުގެ އިތުރު ވަގުތުގެ ތެރޭގައި، ޗެލްސީން ވަނީ އެންޒޯ ފެނާންޑޭޒް ޖެހި ގޯލުން އެއްވަރުކޮށްފަ އެވެ. މިއީ، ޗެލްސީގެ ކޯޗުކަމުން އެންޒޯ މަރެސްކާ ވަކިކުރި ފަހުން އެ ޓީމުން ކުޅުނު ފުރަތަމަ މެޗެވެ. މި މެޗުގައި ޗެލްސީ އަށް އިރުޝާދުދިނީ އެ ޓީމުގެ 21 އަހަރުން ދަށުގެ ޓީމުގެ ކޯޗު، ކަލުމް މެކްފާލޭން އެވެ.

ލީގުގައި ރޭ ލީޑްސް އިން އަމިއްލަ ދަނޑުގައި، ބްރެންޑަން އާރޮންސަންގެ ލަނޑުން ލީޑުނެގި ނަމަވެސް، ޔުނައިޓެޑްގެ މަޓެއުސް ކޫންޏާ ވަނީ ލަނޑު ޖަހައި އެއްވަރުކޮށްފަ އެވެ.

އަމިއްލަ ދަނޑުގައި ކުޅުނު ފުލަމް އިން ލިވަޕޫލް ކޮޅަށް ފުރަތަމަ ހާފުގައި ލީޑުނެގީ ހެރީ ވިލްސަން ޖެހި ގޯލުންނެވެ. ފުރަތަމަ އޮފްސައިޑް ކަމަށް ނިންމި ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ގޯލެއް ކަމަށް ނިންމި އެވެ. ލިވަޕޫލުން އެއްވަރުކުރި ލަނޑަކީ ވެސް ވީއޭއާރް އިން ބަލައިފައި ނިންމި ގޯލެކެވެ. އެ ގޮތުން، ފުރަތަމަ ފްލޯރިއަން ވާޓްޒް ޖެހި ގޯލު އޮފްސައިޑް ކަމަށް ނިންމި ނަމަަވެސް، ވީއޭއާރް އިން އެ ނިންމުން ބަދަލުކުރި އެވެ.

ލިވަޕޫލުން ވަނީ އިތުރު ވަގުތުގެ ތެރޭގައި ކޯޑީ ގަކްޕޯ ޖެހި ގޯލުން ލީޑުނަގައިފަ އެވެ. އެކަމަކު، އޭގެ ފަހުން، ހެރިސަން ރީޑް އޭރިއާބޭރުން ޖެހި ހިތްގައިމު ގޯލުން ފުލަމް އިން ވަނީ އެއްވަރުކޮށްފަ އެވެ.

ލީގުގައި ރޭ ބްރެންޓްފޯޑުން 4-2 އިން އެވަޓަން ބަލިކުރިއިރު، ކްރިސްޓަލް ޕެލަސްގެ މައްޗަށް ނިއުކާސަލް އިން ކުރިހޯދީ 2-0 އިންނެވެ. އަދި، ޓޮޓެންހަމް ހޮޓްސްޕާސް ދަނޑުގައި ސަންޑަލެންޑާ ވަނީ 1-1 އިން އެއްވަރުވެފަ އެވެ.