އިވެންޓެއް ޝަރަފުވެރިކޮށް ދެއްވަން މިިނިސްޓަރުން ވަޑައިގަންނަވަން ވާނީ، އަދި މިނިސްޓްރީތަކުން ބާއްވާ އިވެންޓުތަކަށް ޝަރަފުވެރި މެހްމާނުން ހަމަޖައްސަވަން ޖެހޭނީ ރައީސް ޑރ. މުހައްމަދު މުއިއްޒުގެ ހުއްދަ ހޯއްދެވުމަށް ފަހުކަން ހުރިހާ މިނިސްޓަރުންނަށް ރައީސް އޮފީހުން އަންގައިފި އެވެ.

ބައެއް މަސްދަރުތަކުން އަދަދު ނޫހަށް ކަށަވަރުކޮށް ދެއްވި ގޮތުގައި ރައީސް މުއިއްޒުގެ އެންގެވުމެއްގެ ގޮތުގައި އެކަން މިނިސްޓަރުންނަށް، ރައީސް އޮފީހުގެ މިިނިސްޓަރު އަލީ އާރިފު ސޮއި ކުރައްވައި އެންގެވީ މިދިޔަ މަހުގެ ފަހުކޮޅު އެވެ.

ޝަރަފުވެރި މެހްމާނެއްގެ ގޮތުގައި ވަޑައިގަތުމަށް މިނިސްޓަރަކަށް ލިބިވަޑައިގަންނަވާ ދައުވަތު ގަބޫލު ކުރައްވަން ވާނީ ރައީސް އޮފީހަށް އެކަން ލިޔުމުން ހުށަހަޅައި ހުއްދަ ލިބުމަށް ފަހު ކަމަށާއި އަދި މިނިސްޓްރީތަކުން ބާއްވާ އިވެންޓުތަކަށް ޝަރަފުވެރި މެހްމާނުން ހަމަޖެއްސުމުގެ ކުރިން ރައީސް އޮފީހަށް މިހާރު ލިޔަން ޖެހޭ ކަމަށް މަސްދަރުތަކުން ވިދާޅުވި އެވެ.

އެ ހުއްދައަށް އެދެންޖެހޭނީ އިވެންޓު ބޭއްވުމުގެ ހަތް ދުވަސް ކުރިންނެވެ.

އަދަދު ނޫހަށް އެނގިފައިވާ ގޮތުގައި ބައެއް އިވެންޓުތަކަށް ހަމަޖެއްސި ޗީފް ގެސްޓުން، ރައީސް އޮފީހުން ބަދަލުކޮށްފައިވެ އެވެ.