އެސްޓޯނިއާގެ ރައީސް، ޑރ. އަލާ ކާރިސްގެ ދައުވަތަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ ގައުމަށް މިރޭ ފުރާވަޑައިގެންފި އެވެ.

ރައީސް އާއެކު އެސްޓޯނިއާއަށް މަތީ ފަންތީގެ ވަފުދެއް ވަޑައިގެންނެވި އެވެ. މިއީ ރާއްޖޭގެ ރައީސަކު އެސްޓޯނިއާއަށް ވަޑައިގަންނަވާނެ ފުރަތަމަ ފަހަރެވެ.

އަންނަ ބުރާސްފަތި ދުވަހުގެ ނިޔަލަށް ކުރައްވާ އެ ދަތުރުގައި އެ ގައުމުގެ ރައީސާއި ކެބިނެޓުގެ ބައެއް ވަޒީރުންނާ ވެސް ރައީސް މުއިއްޒު ބައްދަލުކުރައްވާނެ އެވެ.

ބަލްޓިކް ގައުމެއްގެ ގޮތުގައި އޮތް އެސްޓޯނިއާއަކީ ޑިޖިޓަލް ޓެކްނޮލޮޖީގެ ދާއިރާއިން ގިނަ ކުރިއެރުންތަކެއް ހޯދާފައިވާ ގައުމެކެވެ. އެ ގައުމުގެ ސަރުކާރުގެ 99 އިންސައްތަ ހިދުމަތް އޮންލައިންކޮށް ހޯދެ އެވެ. އެ ގައުމުގެ ތައުލީމީ ނިޒާމު ވެސް ދުނިޔޭގެ ނިސްބަތުން ކުރީގައި ގުނާލެވެ އެވެ.

ރައީސް އޮފީހުން ބުނީ މި ދަތުރުގެ ބޭނުމަކީ ރާއްޖޭގެ ހިންގުން ޑިޖިޓަލައިޒް ކުރުމަށް ރައީސް ގެންގުޅުއްވާ ވިސްނުމާ އެއްގޮތަށް ކަންކަން މަގުފަހި ކުރުން ކަމަށެވެ. މީގެ ކުރިން އދ. ގަ އާއި އެ ނޫން ވެސް ބައިނަލްއަގުވާމީ ބައްދަލުވުންތަކުގައި ރައީސް ވަނީ ރާއްޖޭގެ ހިންގުން ޑިޖިޓަލައިޒް ކުރުމަށް ގެންގުޅުއްވާ ވިސްނުން ހިއްސާ ކުރައްވައި ވާހަކަދައްކަވައިފަ އެވެ.