ރަސްމީ ދަތުރެއްގައި އެސްޓޯނިއާއަށް ރައީސް ޑރ. މުހައްމަދު މުއިއްޒު ވަޑައިގަތުމުން އެ ގައުމުގެ ރައީސް ޑރ. އަލާ ކާރިސް އެމަނިކުފާނަށް މަރުހަބާ ދަންނަވައިފި އެވެ.

ރައީސް މުއިއްޒު އަދި އެމަނިކުފާނުގެ އަރިހުގައި ދިވެހި ވަފުދެއް އެ ގައުމަށް ވަޑައިގަތީ ކާރިސްގެ ދައުވަތަކަށް ކަމަށް ރައީސް އޮފީހުން ބުނެފައިވެ އެވެ. މި ދަތުރުގައި ރައީސް ފުރާވަޑައިގެންނެވީ ރޭގެ ވަގުތެއްގަ އެވެ.

ރައީސް އޮފީހުން ބުނީ ދިވެހި ވަފުދަށް ރަސްމީކޮށް މަރުހަބާ ކިޔުމަށް ބޭއްވި ރަސްމިއްޔާތު އޮތީ މިއަދު މެންދުރުފަހު އެ ގައުމުގެ ރިޔާސީ ގަނޑުވަރުގައި ކަމަށެވެ.

މި ރަސްމިއްޔާތުގައި ދެ ގައުމުގެ ގައުމީ ސަލާމް ކުޅެ ޝަރަފުގެ ގާޑެއް ވެސް އަރުވާފައިވެ އެވެ.

ބަލްޓިކް ގައުމެއްގެ ގޮތުގައި އޮތް އެސްޓޯނިއާއަކީ ޑިޖިޓަލް ޓެކްނޮލޮޖީގެ ދާއިރާއިން ގިނަ ކުރިއެރުންތަކެއް ހޯދާފައިވާ ގައުމެކެވެ. އެ ގައުމުގެ ސަރުކާރުގެ 99 އިންސައްތަ ހިދުމަތް އޮންލައިންކޮށް ހޯދެ އެވެ. އެ ގައުމުގެ ތައުލީމީ ނިޒާމު ވެސް ދުނިޔޭގެ ނިސްބަތުން ކުރީގައި ގުނާލެވެ އެވެ.

ރައީސް އޮފީހުން ބުނީ މި ދަތުރުގެ ބޭނުމަކީ ރާއްޖޭގެ ހިންގުން ޑިޖިޓަލައިޒް ކުރުމަށް ރައީސް ގެންގުޅުއްވާ ވިސްނުމާ އެއްގޮތަށް ކަންކަން މަގުފަހި ކުރުން ކަމަށެވެ. މީގެ ކުރިން އދ. ގަ އާއި އެ ނޫން ވެސް ބައިނަލްއަގުވާމީ ބައްދަލުވުންތަކުގައި ރައީސް ވަނީ ރާއްޖޭގެ ހިންގުން ޑިޖިޓަލައިޒް ކުރުމަށް ގެންގުޅުއްވާ ވިސްނުން ހިއްސާ ކުރައްވައި ވާހަކަދައްކަވައިފަ އެވެ.