މެންޗެސްޓާ (ސެޕްޓެމްބަރު 3) - މެންޗެސްޓާ ޔުނައިޓެޑްގެ ކޯޗު އެރިކް ޓެން ހާގަށް އެ ޓީމުގެ ކޯޗުގެ މަގާމު ދެމެހެއްޓުމުގައި ބިރެއް ނެތް ކަމަށް އެ ކްލަބުން ބުނެފި އެވެ.

ޔުނައިޓެޑުން މިދިޔަ ސީޒަނުގައި އިނގިރޭސި ޕްރިމިއާ ލީގުގެ އަށް ވަަނައިގައި ނިންމިއިރު، އެ ޓީމުން ވަނީ އެފްއޭ ކަޕްގެ ޗެމްޕިއަންކަން ހޯދައިފަ އެވެ.

ޓެން ހާގަށް ޔުނައިޓެޑްގެ ވަޒީފާ ސަލާމަތްނުކުރެވޭނެ ކަމަށް ފުރަަތަމަ ބެލެވުނު ނަމަވެސް، ފަހުން، އެ ކްލަބުން ކުރިއަށްގެންދިޔަ ރިވިއު އަށް ފަހު، ނިންމީ ޓެން ހާގް މަގާމުގައި ބަހައްޓާށެވެ. އަދި ޓެން ހާގްގެ ކޮންޓްރެކްޓް އިތުރު އެއް އަހަރަށް ޔުނައިޓެޑުން ވަނީ އާ ކޮށްފަ އެވެ.

މި ސީޒަނުގައި އާ ކުޅުންތެރިންނަށް 100 މިލިއަން ޑޮލަރަށް ވުރެ އިތުރަށް ހަރަދުކުރި ނަމަވެސް ޔުނައިޓެޑްގެ ނަތީޖާތަށް ހުރީ އެކަށީގެންވާ ފެންވަރުގައެއް ނޫނެވެ. ޔުނައިޓެޑުން މި ސީޒަނުގައި ކުޅުނު ހަތަރު މެޗުގެ ތެރެއިން ތިން މެޗުން ވަނީ ބަލިވެފަ އެވެ. އެންމެ ފަހުން، ކުޅުނު މެޗުގައި އަމިއްލަ ދަނޑުގައި ވާދަވެރި ލިވަޕޫލް އަތުން 3-0 އިން ބަލިވި މެޗަށް ފަހު ޓެން ހާގަށް ވަނީ ޕްރެޝަރު ބޮޑުވެފަ އެެވެ.

އެކަމަކު، ޔުނައިޓެޑުގެ ޗީފް އެގްޒެކްޓިވް އޮމާރް ބެރާޑާ އާއި ސްޕޯޓިން ޑިރެކްޓަރު، ޑޭން އަޝްވޯތު ދިން އިންޓަވިއުއެއްގައި ބުނެފައިވަނީ، ޓެން ހާގަށް ކްލަބްގެ މެނޭޖްމަންޓުގެ ފުރިހަމަ އިތުބާރު އެބައޮތް ކަމަށެވެ.

މި މަހު 14 ވަނަ ދުވަހު ސައުތެމްޓަން އަތުން ޔުނައިޓެޑް ބަލިވެއްޖެނަމަ، އެ ވެގެންދާނީ، 1986-1987 ވަނަ ސީޒަނަށް ފަހު ޔުނައިޓެޑްގެ އެންމެ ދަށް ފަހަރަށެވެ.