ހުކުރު ދުވަހު މާލެ އަތޮޅު ފިނޮޅަކަށް ދަތުރު ގޮސް އުޅެނިކޮށް ގެއްލުނު މ. އަސަރީހަދާން، ތަސްލީމް މުހައްމަދު، 43، ހޯދަން ޑްރޯން ބޭނުން ނުކުރަނީ އޭނާ ގެއްލުނީ މޫދަށްކަން ކަށަވަރުނުވާތީ ކަމަށް ސިފައިން މިއަދު ބުނެފި އެވެ.

ސިފައިންގެ މީޑިއާ އޮފިޝަލު ވިދާޅުވީ ތަސްލީމް ހޯދުމުގެ އޮޕަރޭޝަން ލީޑުކުރަނީ ފުލުހުން ކަމަށެވެ. މޫދަށް ގެއްލުނުކަން ކަށަވަރު ނުވި ނަމަވެސް ސިފައިންގެ ޑައިވަރުން ވަނީ ފިނޮޅު ވަށައިގެން 5000 އަކަ ފޫޓުގެ ސަރަހައްދެއް ސްނޯކަލް ކޮށްގެން އަދި 3000 އަކަފޫޓު ޑައިވްކޮށްގެން ބަލާފަ އެވެ.

މި އޮޕަރޭޝަނުގައި ޑްރޯން ބޭނުން ނުކުރަނީ ކީއްވެތޯ އެހުމުން ސިފައިންގެ މީޑިއާ އޮފިޝަލު ވިދާޅުވީ، "އެމީހާ ގެއްލިފައިވަނީ މޫދަށްކަން ކަށަވަރު ކުރެވިފައިނުވާތީ، މެރިޓައިމް ސާޗް އެންޑް ރެސްކިއު އިންސިޑެންޓެއްގެ ގޮތުގައި މި ހާދިސާ އަދި ކަނޑައަޅާފައި" ނުވާ ކަމަށެވެ.

ނަމަވެސް، ފީނާ ސްނޯކަލް ކުރީ އެކަމަށް ފުލުހުން އެދުމުން ކަމަށް ވެސް އޭނާ ވިދާޅުވި އެވެ.

މީހަކު ނުވަތަ ބަޔަކު ގެއްލުނު އޮޕަރޭޝަނެއްގައި އެމްއެންޑީއެފް އިން އަންމޭންޑް އޭރިއަލް ވެހިކަލް (ޔޫއޭވީ) ނުވަތަ ޑްރޯންތަކުގެ ބޭނުން މިހާތަނަށް ބޭނުންކުރީ އެންމެ ފަހަރަކު އެވެ. ޑްރޯންތައް އިފުތިތާހު ކުރީ މީގެ ހަ މަސް ކުރިން މާޗް 15، ގަ އެވެ.

ދައުލަތުގެ ސަޕްލިމެންޓަރީ ބަޖެޓުން 37 މިލިއަން ޑޮލަރު ހަރަދުކޮށްގެން ތުރުކީއިން ގެނައި ޑްރޯންތައް ބޭނުންކުރީ މ. ރަތްމަންދޫ ބޭރުން އެޕްރީލް 20، ގައި ގެއްލުނު ދޯންޏެއް ހޯދުމަށެވެ. އެ ބޯޓު ފެނުނީ ޑްރޯން ދުއްވަން ފެށިތާ 14 ގަޑިއިރު ފަހުން ރަތްމަންދޫ ކައިރިންނެވެ.

އޭގެ ފަހުން ހިނގި މިފަދަ ހާދިސާތަކުގައި ޑްރޯން ބޭނުން ކޮށްފައެއް ނުވެ އެވެ. ޑްރޯން ބޭނުން ނުކުރާ ސަބަބު ހޯދަން އެކި ފަހަރު އެހުމުން ވެސް ސިފައިންގެއިން ރަސްމީ ޖަވާބެއް ނުދެ އެވެ.