ޖެހިޖެހިގެން ދެ އަހަރު، އޭޝިއަން ސާފިން ޗެމްޕިއަންޝިޕްގެ ކާމިޔާބު ދެ މުބާރާތް ނިންމާލުމަށް ފަހު، 2026 ވަނަ އަހަރު މި އަށް ވުރެ ބޮޑު މުބާރާތެއް ރާއްޖޭގައި ބޭއްވުމަށް މަސައްކަތް ކުރަމުން އަންނަ ކަމަށް މޯލްޑިވްސް ސާފިން އެސޯސިއޭޝަން (އެމްއެސްއޭ)ގެ ރައީސް މުހައްމަދު ސޮބާހް (ޗޭ) ވިދާޅުވެއްޖެ އެވެ.

މިދިޔަ އަހަރާއި މި އަހަރު އޭޝިއަން ސާފިން ޗެމްޕިއަންޝިޕް ކ. ތުލުސްދޫގައި ބޭއްވިގެން ދިޔައީ، އެ ރަށުގެ ރައްޔިތުންގެ ބޮޑު އެހީތެރިކަމާއެކު ގައި ކަމަށާއި، ހާއްސަކޮށް މޯލްޑިވްސް ސާފިން އެސޯސިއޭޝަނަށް ތުލުސްދޫ އިން ދިން އެއްބާރުލުން ސޮބާހު ފާހަގަކުރެއްވި އެވެ.

"އަދަދު ސްޕޯޓްސް" އަށް ދިން ހާއްސަ އިންޓަވިއުއެއްގައި ސޮބާހު ވިދާޅުވީ، އަންނަ އަހަރު ރާއްޖޭގައި ބައިނަލްއަގުވާމީ މުބާރާތެއް ބޭއްވުމުގެ ވިސްނުން ނުގެންގުޅޭ ކަމަށެވެ. އޭގެ ބަދަލުގައި، އަންނަ އަހަރު ސާފިން އެސޯސިއޭޝަންގެ ވިސްނުން ހުރީ ޖޫނިއާ ސާފިންގެ ފެންވަރު ރަނގަޅުކޮށް ޔޫތު ޑިވޮލޮޕްމެންޓް ޕްރޮގްރާމްތައް އިތުރުކޮށް އިތުރު ކުދިން ނެރުމަށް ކަމަށް ސޮބާހު ވިދާޅުވި އެވެ.

"ރާއްޖޭގެ މާލީ ހާލަތު ހުރިގޮތުން އަންނަ އަހަރު ދެން ކުޑަ ބްރޭކެއް ނަގާނީ. އަޅުގަނޑަށް ހީވަނީ އެއީ އެންމެ ރަނގަޅު ގޮތްހެން. އެކަމަކު، 2026 ވަނަ އަހަރު މި ފަދަ އެހެން މުބާރަތެއް ރާއްޖެ އަށް ގެނެވޭތޯ އަޅުގަނޑުމެން މަޝްވަރާ ކުރަމުން މިހާރުވެސް މި ދަނީ" ސޮބާހު ވިދާޅުވި އެވެ.

ސާފިން އެސޯސިއޭޝަނުން 2026 ވަނަ އަހަރު ރާއްޖޭގައި ބާއްވަން މަސައްކަތް ކުރަމުން އަންނަނީ ޖޫނިއާ ވޯލްޑް ޗެމްޕިއަންޝިޕްގެ ޓުއާ އެކެވެ. މި މުބާރާތުގެ ސަބަބުން ރާއްޖޭގެ ޒުވާން ސާފަރުންނަށް ބައިނަލްއަގްވާމީ އިތުރު ތަޖުރިބާތަކެއް ލިބިގެންދާނެ އެވެ.

މި މަހު ތުލުސްދޫގައި ކުރިއަށް ގެންދިޔަ އޭޝިއަން ސާފިން ޗެމްޕިއަންޝިޕްގެ ޖޫނިއާ ބައިގައި ރާއްޖޭގެ ސާފަރުން ވަނީ ބޮޑެތި ކުރިއެރުންތަކެއް ހޯދައިފަ އެވެ. އެގޮތުން ބައިނަލްއަގްވާމީ ބޮޑު މުބާރާތެއްގެ ޖޫނިއާ ކެޓަގަރީގެ ސެމީ ފައިނަލުން ފުރަތަމަ ފަހަރަށް ރާއްޖޭގެ ކަޔާން ޒަކީ ވަނީ ޖާގަ ހޯދައިފަ އެވެ. މި މުބާރާތުގެ ޖޫނިއާ ބައިގެ ކުއާޓާ ފައިނަލުގައި، ރާއްޖޭގެ ތިން ސާފަރުން ވާދަކޮށްފައިވެ އެވެ.