ސަރުކާރުގެ ޑޮލަރު ރިޒާވް އިތުރު ކުރަން ބައެއް ގާނޫނުތައް އިސްލާހުކޮށް، ބައެއް ޓެކްސްތައް ޑޮލަރުން ދައްކަން ޖެހޭ ގޮތް ހަދަން ކެބިނެޓުން ނިންމައިފި އެވެ.

މިގޮތަށް ނިންމީ ގައުމީ ބޭންކު، ބޭންކު އޮފް މޯލްޑިވްސްގެ ރުފިޔާ އެކައުންޓުތަކުން ޑޮލަރުން މުއާމަލާތް ނުކުރެވޭ ގޮތް މިއަދު ހެދުމާ އެކު އެވެ.

ކެބިނެޓު ބައްދަލުވުމަށް ފަހު ބޭއްވި ނޫސްވެރިންގެ ބައްދަލުވުމުގައި ބަންޑާރަ ނައިބު އަހުމަދު އުޝާމް ވިދާޅުވީ ޑޮލަރުން އާމްދަނީ ލިބޭ ކުންފުނިތަކުން ކޯޕަރޭޓް އިންކަމް ޓެކްސް އާއި، އިމްޕޯޓު ޓެކްސް ޑޮލަރުން ދައްކާ ގޮތަށް ގާނޫނުތަކަށް ބަދަލު ގެންނާނެ ކަމަށާއި އަދި ޑޮލަރުން މުސާރަ ދޭ ކުންފުނިތަކުން ޕެންޝަން ވެސް ޑޮލަރުން ދައްކަން ޖެހޭ ގޮތަށް ޕެންޝަން ގާނޫނަށް ބަދަލު ގެންނާނެ ކަމަށެވެ.

"ކެބިނެޓުން އަޅުގަނޑުމެންނަށް މިއަދު ނިންމުނީ ޑޮލަރުން އާމްދަނީ ލިބޭ ކުންފުނިތަކުން ދައުލަތަށް ފައިސާ ދައްކާއިރުގައި މިހާރު ބައެއް ހާލަތްތަކުގައި ރުފިޔާއިން އެބަ ފައިސާ ދައްކާ. މިސާލަކަށް ކޯޕަރޭޓް އިންކަމް ޓެކްސް އެ ކުންފުނިތަކުން މީރާއަށް ދައްކަނީ ދިވެހި ރުފިޔާއިން. އެހެން ނަމަވެސް ސަރުކާރުން ގާނޫނަށް އަދި ގަވާއިދުތަކަށް ގެންނަން ޖެހޭ އިސްލާހުތައް ގެނެސްގެން އަޅުގަނޑުމެން މިކަން ބަދަލުކުރާނަން،" އުޝާމް ވިދާޅުވި އެވެ.

އެ އިސްލާހުތައް ކުރިއަށް އޮތް ދެ ހަފުތާއެއްގެ ތެރޭގައި މަޖިލީހަށް ފޮނުވާނެ ކަމަށް އުޝާމް ވިދާޅުވި އެވެ.

ބީއެމްއެލްގެ ރުފިޔާ ކާޑުތަކުން ޑޮލަރުން އެއްވެސް މުއާމަލާތެއް ނުކުރެވޭ ގޮތް ހެދުމަށް ފަހު، އެ ނިންމުން މިއަދު ހަވީރު ވަނީ ކުރިން އޮތް ގޮތަށް އިޔާދަކޮށްފަ އެވެ.

މިއަދުގެ ނޫސްވެރިންގެ ބައްދަލުވުމުގައި އިކޮނިމިކް މިނިސްޓަރު މުހައްމަދު ސައީދު ވިދާޅުވީ ސަރުކާރުގެ މެޖޯރިޓީ ހިއްސާ އޮންނަ ބީއެލްއެލްގެ ބޯޑުން، ދިވެހި ރުފިޔާ ކާޑުން ޑޮލަރު މުއާމަލާތްތައް ސަސްޕެންޑުކުރީ ރައީސް ޑރ. މުހައްމަދު މުއިއްޒުގެ ލަފައާ ހިލާފަށް ކަމަށެވެ.

ނަމަވެސް ރައީސް މުއިއްޒުގެ އެ ލަފާ ދެއްވީ ކޮން ބަޔަކަށް ކަމެއް އޭނާ ވިދާޅެއް ނުވެ އެވެ.