ޕީޖީ ޝަމީމަށް ހަމަލާދިން ކަމަށް ތުހުމަތު ކުރާ މީހުންގެ ތަހުގީގު މަރުހަލާ ނިންމައި ދައުވާ ކޮށްދިނުމަށް އެދި ޕްރޮސެކިއުޓާ ޖެނެރަލްގެ އޮފީހަށް ފޮނުވައިފި އެވެ.

މީޑިއާތަކަށް ފުލުހުން މިއަދު ފޮނުވި މެސެޖެއްގައި ބުނީ އެ މައްސަލައިގެ ތަހުގީގު ނިންމައި ޕީޖީ އޮފީހަށް ފޮނުވީ މިދިޔަ އާދީއްތަ ދުވަހު ކަމަށެވެ.

ޝަމީމަށް ހަމަލާދިނީ މިއަހަރުގެ ޖެނުއަރީ 31، ގައި ސައިކަލު ޕާކު ކޮށްފައި އޭނާ ދިރިއުޅޭ ގެއަށް ވަންނަނިކޮށެވެ. މަރުތޭލައަކުން ދިން އެ ހަމަލާ އަމާޒުވީ ޝަމީމުގެ ވައަތުގެ މުލައްދަނޑިއަށެވެ.

އެ ހަމަލާގައި ޝަމީމުގެ ވައަތު މުލައްދަނޑީގެ ކަށިގަނޑެއްގައި ރެނދެއް ލުމުގެ ސަބަބުން އޭޑީކޭ ހޮސްޕިޓަލުގައި އޭނާއަށް ފަރުވާ ދިނެވެ.

އެ މައްސަލައިގައި ހަތް މީހުން ފުލުހުން ހައްޔަރު ކުރި އެވެ. ނަމަވެސް ފުލުހުން ފުރަތަމަ ބުނީ ޝަމީމަށް ހަމަލާ ދިނީ މޫނު ނިވާކޮށްގެން ތިބި ދެމީހުން ކަމަށެވެ.

އެ ހަމަލާއަކީ ވަރަށް ދުރާލައި ރޭވިގެން ދީފައިވާ ހަމަލާއެއް ކަމަށް އެކަމާ ގުޅިގެން ފުލުހުން ބޭއްވި ނޫސްވެރިންގެ ބައްދަލުވުމެއްގައި ބުނެފައިވެ އެވެ. އެ މައްސަލައިގައި ހައްޔަރު ކުރި ހުރިހާ އެންމެން ވެސް ތިބީ ޝަރީއަތް ނިމެންދެން ބަންދުކޮށްފަ އެވެ.

ޝަމީމަށް ހަމަލާދިން ކަމަށް ފުލުހުން ބުނި ދެމީހުންނަކީ މާލޭގެ ގޭންގަކަށް ނިސްބަތްވާ ބައެއްކަން އެނގިފައިވެ އެވެ. ހަމަލާ ދިނުމަށްޓަކައި އެ މީހުން ތިބީ ސައިކަލްގެ ނަން ބޯޑު ބަދަލުކޮށް، މޫނު ނުފެންނަ ގޮތަށް ހެލްމެޓުގެ އިތުރުން މާސްކެއް ވެސް އަޅައިގެން ކަމަށް، އެކަމުގެ މައުލޫމާތު އެނގޭ މީހަކު އަދަދު ނޫހަށް ކިޔައި ދިނެވެ.