މިވަގުތު ސަރުކާރަށް މާ ގިނަ ޗޮއިސްއެއް ނެތް ކަމަށާއި ރާއްޖޭގެ އިގްތިސާދީ ހާލަތު މިހާރު އޮތް ގޮތުން ހަރުކަށި ފިޔަވަޅުތަކެއް ނާޅައި ރާއްޖެ ސަލާމަތް ނުވާނެ ކަމަށް މަހިބަދޫ ދާއިރާގެ މެންބަރު އަހްމަދު ތޯރިގު ވިދާޅުވެއްޖެ އެވެ.

ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހަޅާފައިވާ އާބަން ޑިވެލޮޕްމަންޓުގެ ބިލަށް ބަހުސް ކުރައްވަމުން ތޯރިގު ވިދާޅުވީ އަސާސީ ހިދުމަތްތައް ރައްޔިތުންނަށް ފޯރުކޮށްދިނުމަށް ގާނޫނުތަކުން ސަރުކާރަށް މަތިކޮށްފައިވާ ކަމަށެވެ.

އެކަމުގެ ސަބަބުން 200 މީހުން އުޅޭ ރަށެއްގައި ވެސް ހުރިހާ ހިދުމަތެއް ދިނުމަށް އެއިރެއްގައި ހުންނަ ރައީސުލްޖުމްހޫރިއްޔާއަށް މަޖުބޫރުވާ ކަމަށް ތޯރިގު ވިދާޅުވި އެވެ. ރާއްޖެއަށް ލިބޭ އާމްދަނީއަށް ވުރެ އިތުރަށް ކޮންމެ އަހަރެއްގެ ބަޖެޓު ފާސްކުރަމުންދާތާ އެތަކެއް އަހަރުތަކެއް ވެފައިވާ ކަމަށް ވެސް އޭނާ ވިދާޅުވި އެވެ.

"މިއަދުގެ ސަރުކާރަށް މަޖުބޫރު ފިޔަވަޅުތަކެއް އަޅަން. ރާއްޖޭގައި, ހާއްސަކޮށް 2026 ވަނަ އަހަރު ދިވެހި ދައުލަތުން ރާއްޖޭން ބޭރަށް ދައްކަން ޖެހޭ ބިލިއަނެއްހާ ޑޮލަރު ރާއްޖެއަށް އެއްކައިރި ކުރެވޭނެ ނިޒާމެއް މިހާތަނަށް ފެންނަން ނެތް," ތޯރިގު ވިދާޅުވި އެވެ.

ރާއްޖޭން 2026 ގައި ދައްކަން ޖެހޭ ބޮޑު ދަރަނި ދެއްކުމަށް ދޮޅު އަހަރު ދުވަސް ވެސް ނެތް ކަމަށާއި އެއީ 2020-2021 ގައި އެމްޑީޕީގެ ސަރުކާރުން ވިއްކާފައިވާ ސުކޫކަށް އެއްފަހަރާ 400 މިލިއަން ޑޮލަރު ދައްކަން ޖެހޭ އަހަރެއްކަން ތޯރިގު ވިދާޅުވި އެވެ.

ރާއްޖޭގެ ރިޒާވު ދަށްވި އެއް ސަބަބަކީ ސޮވެރިން ޑިވެލޮޕްމަންޓު ފަންޑުގައި ހުރި ޑޮލަރު ރުފިޔާއަށް މާރުކޮށް އިންވެސްޓު ކުރުން ކަމަށް ތޯރިގު ތުހުމަތު ކުރެއްވި އެވެ.

"ސަރުކާރަށް މިހާރަކު ނެތް މާ ގިނަ ޗޮއިސެއް. އަޅުގަނޑުމެންނަށް އޮތީ ހަރަދު ކުޑަކޮށްފައި ލިބޭ އެއްޗަކުން ހަރަދު ކުރުން. ރައްޔިތުންނަށް ވެސް ވިސްނައިދޭން ޖެހެނީ, ޒަމާން ވެގެން މިދިޔައީ ސަބްސިޑީތަކާއި ފޮތް ފަންސޫރު ހިލޭ ލިބޭނެ ނިޒާމެއްގައި," ތޯރިގު ވިދާޅުވި އެވެ.

ޑިމޮކްރަސީއަށް ރާއްޖެ ފުރޮޅިގެންދިޔައިރު އޭރު ވެރިކަމުގައި ހުންނެވި މައުމޫން އަބްދުލްގައްޔޫމަށް ޕްރެޝަރު ކުރުމުގެ ގޮތުން ސަރުކާރުން ހުރިހާ އެއްޗެއް ހިލޭ ދޭން ޖެހޭ ކަމުގެ ފަލްސަފާއެއް ގެންގުޅުނު ކަމަށް ތޯރިގު ވިދާޅުވި އެވެ.

"ރާއްޖޭގެ ހާލަތު މިހާރު އޮތް ގޮތުން ހަރުކަށި ފިޔަވަޅުތަކެއް ނާޅައި ރާއްޖެ ސަލާމަތް ނުވާ ހިސާބަށް މި ދަނީ،" އޭނާ ވިދާޅުވި އެވެ.

ވެރިކަންކުރާ ޕީއެންސީގެ ޕާލިމަންޓަރީ ގްރޫޕުގެ ނައިބު ލީޑަރު ކަމުން ދާދިފަހުން ތޯރިގު ވަނީ އިސްތިއުފާ ދެއްވާފަ އެވެ. އޭނާ އެ މަގާމުން އިސްތިއުފާ ދިނީ އަމިއްލަ ކަންކަން ހުރިގޮތުން އެ މަސްއޫލިއްޔަތު އަދާކުރުމަށް ވަގުތު ދެވެން ނެތުމުގެ ސަބަބުންނެވެ.