ރާއްޖޭގެ އެންމެ އުންމީދީ ބެޑްމިންޓަން ތަރި، އުމުރުން 22 އަހަރުގެ، ނިބާލް އަހުމަދު، އަށް މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ދިން ޕެރިސް އޮލިމްޕިކްސް ސްކޮލަޝިޕްގެ ފައިސާ އާއި ނިބާލް އަށް އެކި ގޮތްގޮތުން، ލިބެންޖެހޭ ފުރުސަތުތަކަށް ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) އިން އިހުމާލުވެފައިވާ މައްސަލަތަކެއް ފެންމަތިވެއްޖެ އެވެ.

ދާދި ފަހުން، ކޮމިޝަނާ އޮފް ސްޕޯޓްސް، މުހައްމަދު ތޮލާލް ވަނީ ބެޑްމިންޓަން އެސޯސިއޭޝަންގެ ހިންގުން ސްޕޯޓްސް ކައުންސިލާ ހަވާލުކޮށްފަ އެވެ. މި ނިންމުން މި ގޮތަށް އައިސްފައިވަނީ، ބެޑްމިންޓަން އެސޯސިއޭޝަންގެ އެންމެ ފަހުގެ ހިންގާ ބޯޑުގެ މުއްދަތު ހަމަވިތާ ފަސް މަސް ފަހުންނެވެ.

މި ފަސް މަސް ތެރޭ، ސްޕޯޓްސް ކޮމިޝަނަރު ތޮލާލް، ތަކުރާރުކޮށް ދިން މުހުލަތުގައި ވެސް ބެޑްމިންޓަން އެސޯސިއޭޝަނުން، ކަންކަން ނިންމާފައިނުވާތީ، އެންމެ ފަހުން، އެ އެސޯސިއޭޝަން ސްޕޯޓްސް ކައުންސިލް ދަށަށް ގެނައީ އެވެ.

އެ ނިންމުމަށް ތާއީދުކޮށް، ސޯޝަލް މީޑިއާގައި ޝޫއުރުފާޅުކުރި އެއް ކުޅުންތެރިއަކީ، ގައުމީ ބެޑްމިންޓަން ޓީމުގައި ހިމެނިގެން ވޭތުވެދިޔަ އަހަރުތަކުގައި އެންމެ ބޮޑު ކުރިއެރުމެއް ހޯދަމުން އައި ނިބާލް އެވެ.

ނިބާލް ލިޔުނު ޕޯސްޓެއްގައި ބުނެފައިވަނީ، ބެޑްމިންޓަން އެސޯސިއޭޝަންގެ އެންމެ ފަހުން އޮތް، މުއްދަތު ހަމަވެފައިވާ ކޮރަޕްޓް، ހިންގާ ކޮމިޓީ މަގާމުން ދުރަށް ދިއުމަކީ މިހާރުން މިހާރަށް ކުރަން ޖެހޭ ކަމެއް ކަމަށެވެ. އެއީ، ބެޑްމިންޓަނުގެ ރަނގަޅަކަށް ކުރަން ޖެހޭ ކަމެއް ކަމަށާއި މިހާރު ރާއްޖޭގެ ބެޑްމިންޓަންގެ ހާލަތު ވެއްޓިފައި ހިސާބަށް ބަލާއިރު، އެ ކުޅިވަރަށް އެންމެ ބޮޑު ގެއްލުމެއް ދިނީ، އެސޯސިއޭޝަންގެ އެ ހިންގާ ކޮމިޓީން ކަމަށް ނިބާލް ވަނީ ބުނެފަ އެވެ.

ނިބާލް، ސޯޝަލް މީޑިއާގައި ކޮށްފައިވާ ޕޯސްޓް.

އޭގެ ފަހުން، "އަދަދު ސްޕޯޓްސް" އަށް ދިން އިންޓަވިއުއެއްގައި، ނިބާލް ވަނީ ބެޑްމިންޓަން އެސޯސިއޭޝަނުން އޭނާގެ އެކި ކަންކަމުގައި ވެފައިވާ އިހުމާލުތަކުގެ ވާހަކަތައް ހިއްސާކޮށްފަ އެވެ.

އޮލިމްޕިކްސް ސްކޮލަޝިޕާއި އެެހެނިހެން ފުރުސަތުތައް ނިބާލަށް ލިބިގެންދިޔަ ގޮތް

މޯލްޑިވްސް އޮލިމްޕިކް ކޮމިޓީން، ޕެރިސް އޮލިމްޕިކްސް ސްކޮލަޝިޕް ލިބުނު އެތުލީޓުންނަށް އެ އެވޯޑް ކުރީ 2022 ވަނަ އަހަރު އެވެ. އެ ސްކޮލާޝިޕް ހަަމަޖެހުމުން، ނިބާލް ވަނީ، 2022 ވަނަ އަހަރު މެއި މަހު ދުބާއީ އަށް ޓްރެއިނިން އަށް ގޮސްފަ އެވެ.

އެ ފަހަރު، ހަ މަސް ދުވަހު، ދުބާއީގައި ޓްރެއިނިން ކުރިއަށްގެންދިޔަ، ނިބާލް، ގައުމީ މުބާރާތްް ކުޅެން އައިސް، ޖެހިޖެހިގެން ތިން އަހަރު ގައުމީ ސިންގަލްސް ފައިނަލުން ބަލިވެފައި އޮތުމުގެ މާޔޫސްކަމުން އަރައިގަނެ، ގައުމީ ތަށި ހޯދި އެވެ.

އެ ކާމިޔާބީ އަށް ފަހު، ނިބާލް ވިސްނައިގެން ހުރީ އަނެއްކާ ވެސް ރާއްޖޭން ބޭރުގެ ޓްރެއިނިން އަށް ދިއުމަށެވެ. އެއީ، އޭނާ ހުރީ، މަހަކު 1500 ޑޮލަރު ލިބޭ، ޕެރިސް އޮލިމްޕިކްސްގެ ސްކޮލަޝިޕެއްގައި ކަމަށްވާތީ އެވެ.

ބެޑްމިންޓަން އެސޯސިއޭޝަންގެ ކުރީގެ ނައިބު ރައީސް ޝާކިރު (ކ) އާއި ނިބާލް (މ) އަދި އޮލިމްޕިކް ކޮމީޓީގެ ރައީސް ސައްތާރު، ނިބާލްގެ ޕެރިސް އޮލިމްޕިކްސް ސްކޮލަޝިޕްގައި ސޮއިކުރަނީ.--- ފޮޓޯ: އަދަދު ފައިލް ފޮޓޯ

ކޮންމެ ހަތަރު މަހަކުން، އޮލިމްޕިކް ކޮމިޓީން އޮލިމްޕިކްސް ސްކޮލަޝިޕްގެ ފައިސާ (1500 ޑޮލަރުގެ މަގުން، 6000 ޑޮލަރު) އެސޯސިއޭޝަނަށް ޖަމާކުރުމުން، އެސޯސިއޭޝަނުން ބަރާބަރަށް ކުޅުންތެރިޔާގެ ކަންކަން ރާވަން ޖެހޭ ގޮތަށް އެއްބަސްވުމުގައި އޮވެ އެވެ.

އެކަަމަކު، 2022 ގައި ދުބާއީ ޓްރެއިނިން އަށް ފަހު، ރާއްޖެ އައި ފަހުން، ނިބާލް އަށް ވަކިން، ރާއްޖޭން ބޭރުގައި އެއްވެސް ޓްރެއިނިން އެއް ނުލިބެ އެވެ.

ނިބާލަކީ، މިދިޔަ އަހަރުން ފެށިގެން، މިދިޔަ ސަރުކާރުން ދޭން ފެށި ކުޅިވަރު ސްކޮލަޝިޕް، "އަރުތަ" ވެސް ލިބިފައިވާ އެތުލީޓެކެވެ. އަދި އޭޝިއަން އޮލިމްޕިކް ޕްރޮޖެކްޓް (އޭއޯޕީ)، ސްކޮލަޝިޕްގައި ވެސް ހިމެނޭ ކުޅުންތެރިއެކެވެ. އެއީ، އޭޝިއާގެ އަރަމުން އަންނަ 20 އެތުލީޓަކަށް ދޭ ސްކޮލަޝިޕެކެވެ.

މި ހުރިހާ ކަމަކަށް ބަލާއިރު، ސުވާލަކީ، ތިން ސްކޮލަޝިޕް ހަމަޖެހިފައި އޮތް އެތުލީޓެއް، ކެރިއަރުގައި ކުރިއަށްދާން ބޭނުންވާ ދުވެލީގައި ނުދެވި، ހުއްޓިފައި އޮތް ސަބަބު ދެނެގަތުމެވެ.

ދިމާވަމުން އަންނަ ކަންކަމުގެ މައްސަލަ ބޮޑުވާން ފެށީ، ބީއޭއެމް އިން ނިބާލަށް އެންމެ އެކަށީގެންވާ ގޮތަށް މައުލޫމާތު ނުދީ ކަންކަން އޮޅުވާލަން ފެށުމުންނެވެ. އެކަން، އެންމެ ބޮޑަށް ހިނގަން ފެށީ މިދިޔަ އަހަރު ތެރޭގަ އެވެ.

އެ ގޮތުން، 2023 ވަނަ އަހަރު ޖެނުއަރީ މަހު، ބެޑްމިންޓަން އެސޯސިއޭޝަނުން ބައްދަލުވުމެއް ބާއްވައި، ނިބާލަށް ރާއްޖޭން ބޭރުން، ސްކޮލަޝިޕްގެ ތެރެއިން، ޓްރެއިނިން ހާއްސަކޮށްގެން ދިނުމުގެ ބަދަލުގައި، ނިބާލް ވެސް ހިމެނޭ ގޮތަށް، ހުރިހާ ކުޅުންތެރިންނަށް އެންގީ، މިދިޔަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އާއި އޭޝިއަން ގޭމްސް އަށް އަމާޒުކޮށް، ދެކުނު ކޮރެއާ އިން ފެންވަރު މަތީ ކޯޗެއް ގެންނަ ކަމުގެ ވާހަކަ އެވެ.

މިދިޔަ އަހަރުގެ ދެ ގޭމްސް އަށް ކަމަށް ގެނައި ކޮރެއާގެ ކޯޗު، ޖަންގް ކީ ޔޫން އަދިވެސް ހުރީ ގައުމީ ޓީމުގަ އެވެ. ކޯޗު ކީ ޔޫން ގެނައީ، ސްޕޯޓްސް މިނިސްޓްރީން ވެސް މުސާރަ ހަަމަޖައްސައިދޭ ގޮތަށް ކަމަށް މީގެ ކުރިން، އެސޯސިއޭޝަނާއި މިނިސްޓްރީން ވެސް ބުނެފައިވެ އެވެ. އެކި މަސްދަރުތަކުން ލިބިފައިވާ މައުލޫމާތުތަކަށް ބަލާއިރު، ކޯޗުގެ މުސާރަ 5000 ޑޮލަރަށް ވުރެ ބޮޑެވެ.

އެކަަމަކު، ފެންނަން ހުރި ކަންކަމަށް ބަލާއިރު، އުސޫލާ ހިލާފަށް ނިބާލްގެ ސްކޮލަޝިޕް ފައިސާ ވެސް ކޯޗުގެ މުސާރަ ދޭން ބޭނުންކޮށްފައިވެ އެވެ.

ނިބާލް ބުނީ، ދިމާވި މައްސަލަތަކާ މެދު ވިސްނައި، ހިނގަމުން އަންނަ އޮޅުވާލުވުމުގެ ކަންކަމުގެ ފުންމިން އޭނާ އަށް އެނގުނުއިރު، އެސޯސިއޭޝަނުން ވަނީ ގިނަ ގޯސްތަކެއް ހަދާފައި ކަމަށެވެ.

އެ ގޮތުން، އެއް ކަމަކަށް، "އަރުތަ" އާއި އޮލިމްޕިކްސް ސްކޮލަޝިޕުން ވެސް ލާރި ނަގައިފައިވާކަން އެނގިގެންދިޔަ ކަމަށް ނިބާލް ވަނީ ބުނެފަ އެވެ.

"މި އަހަރު، ލަންކާ އަށް ދާން ވެސް، އެކޮމަޑޭޝަން ކަންކަމަށް އެދުނީ، އެސޯސިއޭޝަން ކައިރިން މި އެހީ، އޮލިމްޕިކްސް ސްކޮލަޝިޕް ލިބިފައި އޮއްވައި އަރުތައިގައި އަމިއްލަ ހަރަދުގައި ދާން ތިބުނަނީ ކީއްވެހޭ. އެހެން އެޕްރޯޗްކުރީމަ ބުނީ، ފުރަތަމަ ބުނީ، އޮލިމްޕިކް ކޮމިޓީން ލާރި ނުދެޔޭ، ދެން އޮލިމްޕިކް ކޮމިޓީން މައުލޫމާތު ހޯދީ، ހޯދީމަ ބުނީ ހަތަރު މަހުން ހަތަރު މަހުން ފައިސާ ދޭ ކަމަށް،" ނިބާލް ކިޔައިދިނެވެ.

"ދެން، އެ ވާހަކަ އެސޯސިއޭޝަނަށް ހިއްސާކުރީމަ، މި ބުނީ، ކޯޗަށޭ މި ހަރަދުކުރަނީ އެ ފައިސާ އިން، ދެން ނިބާލް ބުނިން، މިއީ ކޮންޓްރެކްޓްގައި އޮންނަ ގޮތެއް ނޫނޭ، ކޯޗަށް ހަރަދުކުރެވޭނީ ވަކިން ނިބާލް އަށް ކޯޗުކޮށްދޭނަމައޭ. ދެން އެސޯސިއޭޝަނުން ބުނީ، މިނިސްޓްރީން ވަކިވަރެއް ލާފައި، ނިބާލްގެ ފައިސާ އިން ވަކި ވަރެއް ލާ ގޮތަށޭ މި ހަދަނީ،"

ބެޑްމިންޓަން އެސޯސިއޭޝަނުން ރާއްޖޭގައި ބޭއްވި އިންޓަނޭޝަނަލް މުބާރާތެއްގެ ކުރިން އޮތް ނޫސްވެރިންގެ ބަައްދަލުވުމެއްގެ ތެރެއިން ނިބާލް ވާހަކަ ދައްކަނީ،--- ފޮޓޯ: އަދަދު ފައިލް ފޮޓޯ

ބެޑްމިންޓަން އެސޯސިއޭޝަނުން ދައްކާ ވާހަކަތައް އެކި ފަހަރު އެކި ގޮތަށް، ދެކޮޅު ނުޖެހޭ ގޮތަށް ހުންނާތީ، ނިބާލް ވަނީ، އޭނާ އަށް ސްކޮލަޝިޕް ހަމަޖެހުނު ހިސާބުން ފެށިގެން، އެހާތަނަށް ކުރި ހަރަދުތަކުގެ ތަފްސީލް ހޯދުމަށް މިދިޔަ އަހަރު ފަހުކޮޅު ނިންމައިފަ އެވެ. އެހެންވެ، އެ ކަމަށް އެދި ސިޓީއެއް އެސޯސިއޭޝަނަށް ފޮނުވި އެވެ.

ފުރަތަމަ، ބެޑްމިންޓަން އެސޯސިއޭޝަނުން އެ ހަރަދުތަކުގެ ތަފްސީލް ދޭން ދެކޮޅު ހެދީ، އެސޯސިއޭޝަން އޮޑިޓް ކުރަމުން އަންނަ ދުވަސްކޮޅު ކަމަށް ބުނެ އެވެ. އެކަމަކު، ތަކުރާރުކޮށް، ނިބާލް، އޭނާ އަށް ހައްގުވާ މައުލޫމާތުތަކެއް ހޯދަން އެދުމުން، އެސޯސިއޭޝަނުން ދޫދިނުމަށް ފަހު، އެ ހަރަދުތަކުގެ ޝީޓް ނިބާލްއާ ހިއްސާ ކުރި އެވެ. އެ ޝީޓް ހިއްސާކުރަން ވެސް ދެތިން މަސް ހޭދަވި އެވެ.

އެ ހަރަދު، ޝީޓުން ފެނުނު މަންޒަރަކީ، އަވަސް އަރުވާލަން ހަދައިގެން، ފޮރުވަން އުޅެ، ނުފޮރުވި ހުރި، އެތައް އިހުމާލުތަކެކެވެ.

އެ ޝީޓްގައި ހުރި މައުލޫމާތުތައް ނިބާލް ވަނީ، "އަދަދު ސްޕޯޓްސް" އަށް ހިއްސާކޮށްފަ އެވެ.

އެސޯސިއޭޝަނުން ދިން ޝީޓްގައި ގިނަ މައްސަލަތަކެއް

- އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގެ މަހެއްހާ ދުވަސް ކުރިން މޮރިޝަސް މުބާރާތަކަށް ދިޔައިރު، ގައުމީ ޓިމުގެ އެކޮމަޑޭޝަން، އެންޓްރީ ފީ، ކެއުން، އަދި 14 އިވެންޓަށް 3270 ޑޮލަރު ހަރަދުކޮށްފައިވަނީ، ނިބާލްގެ ޕެރިސް އޮލިމްޕިކްސް ސްކޮލަޝިޕް ފައިސާ އިން.

- އެފްރިކާގެ ތިން މުބާރާތަށް، ޒެމްބިއާ، ބޮޓްސްވާނާ އާއި ދެކުނު އެފްރިކާ އަށް ނިބާލް ދިޔައިރު، އެސޯސިއޭޝަނުން ޓިކެޓް ނަގައިދިނީ, ތިން މުބާރާތުގެ ހަރަދުތައް "އަރުތަ" ސްކޮލަޝިޕާއި އޮލިމްޕިކްސް ސްކޮލަޝިޕް އަށް ވެސް ލާފައިވޭ، ދެ ކަމަށް ވެސް އެސޯސިއޭޝަނުން ފައިސާ ނަގާފައިވޭ.

- ގައުމީ ބެޑްމިންޓަން ޓީމުގެ ކޯޗު، ދެކުނު ކޮރެއާގެ ކީ ޔޫން އަށް 2023 ޖެނުއަރީން ފެށިގެން، މި އަހަރުގެ މާޗްއާ ހަމަ އަށް ކޮންމެ މަހަކު، 584 ޑޮލަރުގެ ގޮތުގައި، ކޯޗަށް 8176 ޑޮލަރު ހަރަދުކޮށްފައިވޭ. އެއީ، ނިބާލް، ރިވައިވަލް ސްޕޯޓްސް ކްލަބާ ގުޅުމާ ހަަމަ އަށް. ގައުމީ ކޯޗު، ވަކިން އެއްވެސް މުބާރާތަކަށް ނިބާލްއާ އެކު ގޮސްފައިނުވާއިރު، ވަކިން އޭނާ އަށް ހާއްސަ ޓްރެއިނިންތަކެއް ކުރިއަށް ނުގެންގޮސް، މުޅި ގައުމީ ޓީމަށް ޓްރެެއިނިން ދޭން ގެނެސްފައި ހުރި ކޯޗަކަށް ނިބާލްގެ ސްކޮލަޝިޕް ފައިސާއިން ހަރަދުކުރުން ރަނގަޅެއް ނޫން.

މީގެ އިތުރުން، ނިބާލް ބުނީ، އޭޝިއަން އޮލިމްޕިކް ޕްރޮޖެކްޓް (އޭއޯޕީ)، ސްކޮލަޝިޕްގެ ތެެރެއިން އަހަރަކު އޭނާ އަށް ހަމަޖެހިފައިވާ 3000 ޑޮލަރު ހޯދަން އެސޯސިއޭޝަނުން ބެޑްމިންޓަން އޭޝިއާ އަށް ލިޔެކިޔުން ހުށަހަޅަން ވާހަކަ ދެއްކި ކަމަށެވެ.

އެކަމަކު، އޭގެ މައުލޫމާތެއް ވެސް އެސޯސިއޭޝަނުން ހިއްސާކޮށްފައިނުވާ ކަމަށެވެ.

"އޭއޯޕީގެ އެ ފައިސާ ވެސް ކްލެއިމް ކޮށްފިއްޔާ ލިބޭނެ، އެ އަށް ހެދި ގޮތެއް ވެސް ނޭނގޭ،" މޯލްޑިވްސް ސްޕޯޓްސް އެވޯޑްސް އިން 2022 ވަނަ އަހަރު ހޮވި އެންމެ އުންމީދީ އެތުލީޓު، ނިބާލް ބުންޏެވެ.

އޮލިމްޕިކްސް އަށް ކޮލިފައިނުވެވުނީ އެސޯސިއޭޝަންގެ އިހުމާލުން: ނިބާލް

ނިބާލް ބުނީ އޮލިމްޕިކްސް އަށް ކޮލިފައިވުމަށް އެސޯސިއޭޝަނުން އޭނާއާ އެކު، ޕްލޭނެއް ހަދައިގެން، މަޝްވަރާތަކެއް ކޮށްފައިވަނީ، 2022 ވަނަ އަހަރު އޭނާ ދުބާއީގައި ހުއްޓައި ކަމަށެވެ. އޭގެ ފަހުން، އޮލިމްޕިކްސްއާ ދެމެދު މިވީ ދޮޅު އަހަރެއްހާ ދުވަހު، ޕްލޭނެއް ހަދައިގެން މަޝްވަރާތަކެއް ކުރެވިފައިނުވާ ކަމަށެވެ.

މިދިޔަ އަހަރަކީ އޮލިމްޕިކްސް ކޮލިފިކޭޝަންގެ އެންމެ މުހިންމު އަހަރު ކަމަށްވާއިރު، ޕްލޭނެއް ނެތުން އެއީ، ނިބާލަށް އޮލިމްޕިކްސް އިން ފުރުސަތު ނުލިބުނު މައިގަނޑު ސަބަބެވެ.

އޮލިމްޕިކްސްގެ ފުރުސަތަށް ރާއްޖޭން ނިބާލްގެ އިތުރުން ދެން ވާދަކުރީ، ގައުމީ ޓީމުގެ، ފާތިމަތު ނަބާހާ، އައިމިނަތު ނަބީހާ އަދި ރިވައިވަލް ސްޕޯޓްސް ކްލަބްގެ ޒަޔާން ޒަކީ ކަމަށެވެ. މީގެ ތެެރެއިން، ނަބާހާ އާއި ނަބީހާ އަދި ޒަޔާން ވަނީ ރާއްޖޭގައި ބޭއްވި އިންޓަނޭޝަނަލް ދެ މުބާރާތް ނުލައި، އިންޓަނޭޝަނަލް 10 މުބާރާތް ކުޅެފަ އެވެ. އެކަމަކު، ތިން ސްކޮލަޝިޕް އޮތް ނިބާލް އަށް ރާއްޖޭގެ އިންޓަނޭޝަނަލް މުބާރާތްތައް ލައިގެން ވެސް 10 ހަމަނުވެ އެވެ.

"ނިބާލް އަތުގައި އޮލިމްޕިކްސް ސްކޮލަޝިޕް، އަރުތަ، ދެން، ބެޑްމިންޓަން އޭޝިއާ ސްކޮލަޝިޕެއް، ތިން ސްކޮލަޝިޕް އެއްކޮށް އޮތްއިރުގައި ރާއްޖޭގައި ކުޅުނު ދެ މުބާރާތް ނުލައި، ހަ މުބާރާތް ކުޅުނީމަ މީގެ އެބަ އެނގޭ މަސައްކަތް ނުކުރެވޭކަން،" ނިބާލް ބުންޏެވެ.

"އޮލިމްޕިކްސް އަށް ކޮލިފައިވެވެނީ ވެސް 10 މުބާރާތް މަދުވެގެން ކުޅެގެން، އެހެންވީމަ، ނިބާލް އަށް ރާއްޖޭގެ ދެ މުބާރާތް ލީމަ ވެސް މި ވަނީ އަށް މުބާރާތް، ލާރި ހަމަޖެހިފައި ހުރެ، އެސޯސިއޭޝަނުން އެކަން ނުކޮށްދިން،"

މީޑިއާގައި މި ވާހަކަތައް ހިއްސާކުރުމުގައި ނިބާލްގެ ބޮޑު މަގުސަދުތަކެއް އެބައޮތެވެ.

އެއް ކަމަކީ، އޭނާ އަށް އޮލިމްޕިކްސްގެ ފުރުސަތު ނުލިބުނީ، އޭނާ އެކަށީގެންވާ ވަރަށް މަސައްކަތް ނުކޮށްގެން ކަމަށް އެސޯސިއޭޝަނުން ކުރާ ތުހުމަތަށް ޖަވާބުދާރީވުމެވެ. ނިބާލް ބުނީ، ތަކުރާރުކޮށް، އޭނާގެ ބައްޕައާ އެކު، އެސޯސިއޭޝަނުން ބޭއްވި ބައްދަލުވުންތަކެއްގައި ނިބާލް މަސައްކަތްނުކުރާ ކަމަށް ދައްކުވައިދޭން އެސޯސިއޭޝަނުން ވާހަކަ ދައްކާފައިވާ ކަމަށެވެ.

ރާއްޖޭގައި ކުރިއަށްދިޔަ މުބާރާތެއްގެ ތެރެއިން ނިބާލް ބޯޅަ ފޮނުވާލަނީ.--- ފޮޓޯ: އަދަދު ފައިލް ފޮޓޯ

ދެ ވަނަ ކަމަކީ، ކުޅިވަރުގެ ސްކޮލަޝިޕް ލިބޭ އެތުލީޓުންނަށް، މި ލިބޭ މި ފަދަ ގެއްލުމާ ގުޅޭގޮތުން ހޭލުންތެރިކުރުމުގެ ގޮތުންނެވެ.

"އޮލިމްޕިކް އަށް ކޮލިފައިނުވީ ހަމައެކަނި ނިބާލްގެ މައްސަލައަކުން ނޫންކަން ބުނެދެން ބޭނުންވަނީ، ކުޅުނު ވަރާ ބަލާއިރު އޮލިމްޕިކް ވައިލްޑްކާޑް ލިބުމާ ފުދޭ ވަރަކަށް ކައިރި އަށް ވެސް ދެވުނު، ދެ ވަނަ ވައިލްޑްކާޑް ލިބުނު ކުއްޖާއާ، 1000 ޕޮއިންޓްގެ ތަފާތު އިނީ، 1000 ޕޮއިންޓަކީ ހަގީގަތުގައި ރާއްޖޭން ބޭރުގައި މި ކުޅޭ މުބާރާތްތަކުން ދެ މޮޅު، އެ އަސްލު، އެހާ ކައިރި އަށް ދެވިފައި، މުބާރާތް މަދުން ކުޅުނީމަ އަސްލު ވަރަށް ބޮޑު ކަމެއްގައި އެސޯސިއޭޝަނުން މި އޮތީ އިހުމާލުވެފައި،" ނިބާލް ބުންޏެވެ.

ނިބާލް ބުނީ، މިހާރު އޭނާގެ އަމާޒުހުރީ އެމެރިކާގެ ލޮސް އެންޖެލްސްގައި 2028 ވަނަ އަހަރު ބާއްވާ އޮލިމްޕިކްސް އަށް ކޮލިފައިވުމެވެ. އެ އަމާޒުގައި މަސައްކަތް ކުރުމަށް، އޭނާ ވަނީ ރާއްޖޭގެ އެންމެ ޕްރޮފެޝަނަލް، ބެޑްމިންޓަން ކްލަބް، ރިވައިވަލް ސްޕޯޓްސް ކްލަބާ ގުޅިފަ އެވެ.

ދެން، އޮތް އޮލިމްޕިކްސް އަށް ކޮލިފައިވާން ނިބާލް މަސައްކަތް ފަށާފައިވާކަން، ބެޑްމިންޓަން އެސޯސިއޭޝަނާއި އޮލިމްޕިކް ކޮމީޓީ އަށް ވެސް އެންގި އެވެ. އަދި ނިބާލް ވަނީ، މި އަހަރު އޮގަސްޓްގެ ނިޔަލަށް އޭނާ އަށް އޮލިމްޕިކްސް ސްކޮލަޝިޕްގެ ތެރެއިން ލިބެން އޮތް ފައިސާ ހަަމަޖައްސައިދޭން އެދިފަަ އެވެ.

އެ ގޮތުން، މި އަހަރުގެ ފުރަތަމަ ހަތަރު މަހުގެ ފައިސާ މި މަހު ކުރީކޮޅު، ބެޑްމިންޓަން އެސޯސިއޭޝަނަށް އޮލިމްޕިކް ކޮމިޓީން ވަނީ ޖަމާކޮށްދީފަ އެވެ. އެއީ، މަހަކަށް، 1500 ޑޮލަރުގެ މަގުން، 6000 ޑޮލަރެވެ. އެ ފައިސާގެ ތެރެއިން، އެސޯސިއޭޝަނުން ނިބާލަށް ދީފައިވަނީ، 1700 ޑޮލަރެވެ. ބާކީ، 4300 ޑޮލަރު ރީއިމްބާސްކޮށްފައިވަނީ، ނިބާލަށް ކުރި ހަރަދުގެ ގޮތުގައި އެސޯސިއޭޝަންގެ ބަޖެޓަށެވެ.

އެކަަމަކު، ނިބާލް ދެކޭގޮތުގައި، މި ފަހުން ލިބުނު ފައިސާއާ މެދު އެސޯސިއޭޝަނަށް އެހެން އަމަލުކުރެވޭނެ ރަނގަޅު އުސޫލެއް އޭނާ އަށް ފޮނުވި ހަރަދުތަކުގެ ޝީޓުން ފެންނާކަށެއް ނެތެވެ. އަދި އެ އަށް ވުރެ ބޮޑަށް އެސޯސިއޭޝަނުން ވަނީ ނިބާލްގެ ފައިސާ އާއި ލިބެންޖެހޭ ފުރުސަތުތަކަށް އިހުމާލުވެފަ އެވެ.

ބެޑްމިންޓަން އެސޯސިއޭޝަންގެ ކަންކަމާ މި ވަގުތު ހަވާލުވެފައިވާ، ސްޕޯޓްސް ކައުންސިލަށް ނިބާލް ވަނީ، ކަންބޮޑުވުންތައް ހިއްސާކޮށް ސިޓީއެއް ފޮނުވައިފަ އެވެ. އެ ސިޓީގައި ނިބާލް ވަނީ، ސްކޮލަޝިޕުން ލިބެން ޖެހޭ ފައިސާ އަށް ބަރޯސާވެގެން މި ވަގުތު ވެސް މެލޭޝިއާގައި ޓްރެއިނިން ހޭދަކުރަމުން އަންނައިރު، އެ ނުލިބި ހޭދަވާ ކޮންމެ ދުވަަހަކީ، އޭނާގެ ކެރިއަރަށް އޭގެ ސަބަބުން ނޭދެވޭ އަސަރުކުރާނެ ކަމެއްގެ ގޮތުގައި ފާހަގަކޮށްފަ އެވެ.