ރައީސުލްޖުމްހޫރިއްޔާ އައްޔަންކޮށްފައިވާ ސިޔާސީ މަގާމުތައް ސަރުކާރުގައި އަދާ ކުރާ މީހުން ވެސް ބޭންކުތަކުގެ ބޯޑަށް އައްޔަން ކުރެވޭ ގޮތަށް ބޭންކުތަކުގެ ކޯޕަރޭޓް ގަވަނަންސް ރެގިއުލޭޓް ކުރާ ގަވާއިދު މޯލްޑިވްސް މަނިޓަރީ އޮތޯރިޓީން އިސްލާހުކުރުމާ ގުޅިގެން މަޖިލީހަށް ހުށަހެޅި މައްސަލަ މާލިއްޔަތު ކޮމިޓީއަށް ފޮނުވުމުން އެ މައްސަލަ ނުބަލައި ގަވާއިދު ކޮމިޓީއަށް ފޮނުވައިފި އެވެ.

ބޭންކުތަކާއި, އިންޝޫރެންސް ކުންފުނިތަކާއި މާލީ އިދާރާތަކުގެ ކޯޕަރޭޓް ގަވަނެންސް ގަވާއިދަށް ގެނައި އިސްލާހާ ގުޅޭގޮތުން މޯލްޑިވްސް ފައިނޭންޝިއަލް ސާވިސަސް އެސޯސިއޭޝަނުން ވަނީ ރައްޔިތުންގެ މަޖިލީހާ ކަންބޮޑުވުންތަކެއް ހިއްސާކޮށްފަ އެވެ.

އެ އެސޯސިއޭޝަނުން ފޮނުވި މައްސަލަ މަޖިލީހުގެ އިދާރާއިން ފޮނުވީ މާލިއްޔަތު ކޮމިޓީއަށެވެ. އެ މައްސަލައާ މެދު މަޝްވަރާ ކުރުމަށް ފެނިވަޑައިނުގަންނަވާ ކަމަށް ހުށަހެޅުއްވީ ކެލާ ދާއިރާގެ މެންބަރު އަބްދުالله ޝަރީފް އެވެ. އެ ހުށަހެޅުމަށް ތާއިދު ކުރެއްވީ ފުނަދޫ ދާއިރާގެ މެންބަރު މުހައްމަދު މަމްދޫހެވެ.

އެ ހުށަހެޅުމަށް ފަހު ކޮމިޓީގައި މާލިއްޔަތު ކޮމިޓީގައި އެމްޑީޕީ ތަމްސީލު ކުރައްވާ ހުޅުމާލެ ދެކުނު ދާއިރާގެ މެންބަރު ޑރ. އަހްމަދު ޝަމްހީދު ހުށަހެޅުއްވީ އެ މައްސަލަ އެ ކޮމިޓީން ބެލުމަށެވެ.

"މިފަދަ ޕްރޮފެޝަނަލް އިންސްޓިޓިއުޝަންތައް ސިޔާސީ ކޮށްލުމަކީ އެއްގޮތަކަށް ވެސް ކޮށްގެން ވާނެ ކަމެއް ނޫން. ބަޔަކު ހުށަހަޅައިގެނެއް ނޫން މިކަން ބަލަން ޖެހެނީ. ކޮމިޓީން އިސް ނަގައިގެން ބަލަން ޖެހޭ ކަމެއްގެ ގޮތުގައި ދެކެނީ," އޭނާ ވިދާޅުވި އެވެ.

އެ ހުށަހެޅުމަށް ހަނިމާދޫ ދާއިރާގެ މެންބަރު އަބްދުލްޣަފޫރު މުސާ ތާއިދު ކުރެއްވި އެވެ. އެމްއެމްއޭއަކީ ވަރަށް މިނިވަންކަމާއެކު ހިނގަން ޖެހޭ ތަނެއް ކަމަށާއި ހުރިހާ ތަނެއް ހިންގުމަށް ވެރިކަމަށް ފަހިވާ ގޮތަށް ބަދަލުތައް ގެންނަން ނުޖެހޭ ކަމަށް ޣަފޫރު ވިދާޅުވި އެވެ.

"ފަސް އަހަރުވާ އިރަށް ބަދަލުވަނީ. މި ބަދަލުވަމުންދާ އޮއެވަރުގެ ތެރެއަށް ބޭންކުތަކާއި ސެންޓްރަލް ބޭންކު ވެއްދީމާ ކަމަކު ނުދާނެ. ކަންކަން ގޯސްވެގެންދާނީ. ސެންޓްރަލް ބޭންކަކީ ސީދާ މި ކޮމިޓީގެ މެންޑޭޓުގެ ތެރޭގައި އިންނަ ތަނެއް. އެތަނަށް ބަދަލު ގެންނަ އިރު ވާ ނުވާ ވަރަށް ސާފުވާން ޖެހޭނެ," ކަންބޮޑުވުން ފާޅުކުރައްވައި ޣަފޫރު ވިދާޅުވި އެވެ.

ކޮމިޓީގެ މެންޑޭޓުގައި އެމްއެމްއޭ ހިމެނުނު ނަމަވެސް އެއީ ގަވާއިދަކަށް އައި ބަދަލަކަށް ވާތީ ބަލަން ޖެހޭނީ ގަވާއިދު ކޮމިޓީން ކަމަށް މުގައްރިރު ގާސިމް އިބްރާހިމް ވިދާޅުވި އެވެ.

ޝަރީފްގެ ހުށަހެޅުމަށް ފަސް ވޯޓު ލިބުނުއިރު ޝަމްހީދުގެ ހުށަހެޅުމަށް ލިބުނީ ދެ ވޯޓެވެ. އެހެންވެ އެ މައްސަލަ ވަނީ ގަވާއިދު ކޮމިޓީއަށް ފޮނުވާފަ އެވެ.

ގަވާއިދަށް ގެނައި ބަދަލުތައް

ބޭންކުތަކުގެ ކޯޕަރޭޓް ގަވަނަންސް ރެގިއުލޭޓް ކުރާ ގަވާއިދުގައި ކުރިން ބުނެފައިވާ ގޮތުގައި، ސަރުކާރު ނުވަތަ ސަރުކާރުގެ ޑިޕާޓްމަންޓަކަށް ރައީސުލްޖުމްހޫރިއްޔާ އައްޔަންކޮށްފައިވާ އެއްވެސް މީހަކު ބޭންކު، އިންޝުއަރެންސް ނުވަތަ ފައިނޭންސް ކުންފުންޏެއްގެ ބޯޑަށް އައްޔަން ނުކުރެވޭނެ އެވެ.

ނަމަވެސް އެމްއެމްއޭއިން މިދިޔަ ބުރާސްފަތި ދުވަހު އެ ގަވާއިދު އިސްލާހުކޮށްފައިވާ ގޮތުން ބޭންކުތަކުގެ ބޯޑަށް ނުލެވޭނީ ސަރުކާރުގެ މިނިސްޓްރީއެއް ހިންގަވާ އެންމެ އިސް ފަރާތް ނުވަތަ ކެބިނެޓުގެ މެންބަރަކަށެވެ.

ބޭންކުތަކުގެ ކޯޕަރޭޓް ގަވަނަންސް ރެގިއުލޭޓް ކުރާ ގަވާއިދު އެމްއެމްއޭއިން އިސްލާހުކޮށްފައި މި ވަނީ އެ އިދާރާގެ ގަވަރުނަރުގެ މަގާމަށް އަހުމަދު މުނައްވަރު އައްޔަން ކުރެއްވުމާއެކު ގެންނަމުންދާ ބޮޑެތި ބަދަލުތަކުގެ ތެރެއިންނެވެ.

އެމްއެމްއޭއަށް ގެންނަ އެންމެ ބޮޑު ބަދަލަކީ އެސިސްޓަންޓް ގަވަރުނަރުގެ މަގާމު އުވާލައި، މެނޭޖިން ޑިރެކްޓަރުންގެ މަގާމު އުފެއްދުމެވެ. އެމްއެމްއޭއިން ބުނީ އެ މަގާމަށް ފަސް މީހަކު އައްޔަން ކުރާނެ ކަމަށެވެ. މެނޭޖިން ޑިރެކްޓަރުންގެ ދައުރަކީ ފަސް އަހަރެވެ.