މިހާރު ކުރިއަށްދާ މާކަންޓައިލް އޮފީސް/ކޮމްޕެނީ ވޮލީބޯލް ޗެމްޕިއަންޝިޕް 2024 ގެ ފައިނަލުގެ ފަހު ޖާގަ މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ހޯދައިފި އެވެ.

އެމްއެންޑީއެފް އިން ފައިނަލަށް ދަތުރުކުރީ އިއްޔެ ހަވީރު ކުޅުނު ސެމީ ފައިނަލް މެޗުގައި، މިދިޔަ އަހަރުގެ ރަނަރަޕް، ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އަތުން 3-1 ސެޓުން މޮޅުވެގެންނެވެ.

މިދިޔަ އަހަރުގެ ސެމީގައި ވެމްކޯ އިން ވަނީ އެމްއެންޑީއެފް ބަލިކޮށްފަ އެވެ. އެކަމަކު، މި ފަހަރު، އެމްއެންޑީއެފް އިން މި ވަނީ ކުރިހޯދައިފަ އެެވެ.

ހުޅުމާލެ ޕާކް ވޮލީ ކޯޓުގައި ކުރިއަށްދާ މި މުބާރާތުގެ ސެމީ ފައިނަލުގައި ކުޅުނީ ލީގު ބުރުގެ ދެ ވަނަ އާއި ތިން ވަނަ އެވެ.

އިއްޔެ ހަވީރު ކުޅުނު ސެމީ ފައިނަލް މެޗުގެ ފުރަތަމަ ސެޓު، ސިފައިންގެ ޓީމުން ގެންދިޔައީ 25-22 އިންނެވެ. ދެ ވަނަ ސެޓުގައި، ވެމްކޯ އިން ކުޅުން ރަނގަޅުކޮށް، 23-25 އިން މި ސެޓު ގެންދިޔަ އެެވެ. ތިން ވަނަ ސެޓު ފޯރިގަދަކޮށް ދިޔައިރު، ސިފައިން މި ސެޓު ގެންދިޔައީ، 26-24 އިންނެވެ. އަދި ފަހު ސެޓުގައި، ވެމްކޯގެ ފަރާތުން ދަށް ކުޅުމެއް ފެނުނުއިރު، ސިފައިން މި ސެޓު، 25-14 އިން ގެންގޮސް މެޗުން މޮޅުވީ އެވެ.

ސެމީ ފައިނަލް މެޗުގެ މޮޅު ކުޅުންތެރިއަކީ، ސިފައިންގެ ޓީމުގެ ހުސެއިން ޔޫސުފް (ޓޯއި) އެެވެ.

ފައިނަލް މެޗު މިރޭ، 20:30 ގައި ކުޅެން ހަމަޖެހިފައިވާއިރު، ސިފައިން ނުކުންނާނީ މިދިޔަ އަހަރުގެ ޗެމްޕިއަން، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާ ދެކޮޅަށެވެ.