ތ. ވޭމަންޑޫގައި ފުލުހުންގެ ބަޔަކު މީހަކަށް އަނިޔާކުރި ކަމަށް ބުނާ މައްސަލައެއް ތަހުގީގު ކުރަން ފަށައިފި އެވެ.

ސޯޝަލް މީޑިއާގައި މީގެ ތިން ގަޑިއިރު ކުރިން ލައިވުކޮށްފައިވާ ވީޑިއޯއަކުން ފެންނަނީ ޒުވާނުންތަކެއް ވޭމަންޑޫ ޕޮލިސް ސްޓޭޝަނަށް އެއްވެ އެ ރަށު މީހަކު ހައްޔަރު ކުރަން އުޅުމުގެ ތެރޭގައި ފުލުހުން އަނިޔާކުރި ކަމަށް ބުނެ އަޑު ގަދަ ކުރާ މަންޒަރެވެ.

އެ ވީޑިއޯއާ ގުޅޭ ގޮތުން ސުވާލު ކުރުމުން ފުލުހުން މިރޭ ބުނީ ފުލުހުން މީހަކަށް އަނިޔާކުރި ކަމަށް ބުނެ ސޯޝަލް މީޑިއާގައި ދައުރުވަމުންދާ ވީޑިއޯއާ ގުޅިގެން ފުލުހުން ބަލަން ޖެހޭ ކަންކަން ބަލަމުންދާ ކަމަށެވެ.

ފުލުހުންގެ އެފަދަ މައްސަލަތައް އެތެރެއިން ތަހުގީގު ކުރުމަށް ޕްރޮފެޝަނަލް ސްޓެންޑާޑްސްގެ ނަމުގައި ޔުނިޓެއް ވެސް އޮވެ އެވެ. އާންމުކޮށް ފުލުހުންނަށް ތުހުމަތުވާ މިފަދަ މައްސަލަތައް ބަލާނީ އެ ޔުނިޓުންނެވެ.