ތައިލެންޑްގެ ޑިޕާޓްމަންޓް އޮފް އިންޓަނޭޝަނަލް ޓްރޭޑް ޕްރޮމޯޝަން (ޑީއައިޓީޕީ) އާއި ތައި ޓްރޭޑް ސެންޓާ ގުޅިގެން ބާއްވާ ތައިލެންޑް-މޯލްޑިވްސް ބިޒްނަސް މެޗިން ފޯރަމް އަންނަ އާދީއްތަ ދުވަހު ހޮޓެލް ޖެންގައި ބޭއްވުމަށް ނިންމައިފި އެވެ.

ހެނދުނު 10:00 އިން ފެށިގެން ހަވީރު 04:00 ޖަހަން ދެން ކުރިއަށް ގެންދާ އެ ފޯރަމްގައި ރަޖިސްޓްރީވުމުގެ ފުރުސަތު މުޅިން ހިލޭ އޮތީ ހުޅުވާލައިފަ އެވެ.

"މި ފޯރަމުން ތައިލެންޑުން ކާބޯތަކެތި، ފެޝަން އަދި ކޮސްމެޓިކްސް ބޭރުކުރާ ތައި އެކްސްޕޯޓަރުންނާއި ރާއްޖޭގައި ވިޔަފާރިކުރާ ފަރާތްތަކާ ގުޅުވާލަދެވޭނެ. އެއާއެކު ތައި އެކްސްޕޯޓަރުންނަށް ރާއްޖެއަށް އެކި ސާމާނު އެތެރެކުރަން ފަސޭހަވެގެންދާނެ،" ފޯރަމް އިންތިޒާމު ކުރާ ފަރާތުން ބުންޏެވެ.

ފޯރަމްގައި ރާއްޖޭގައި ހަރަކާތްތެރިވާ ކުންފުނިތަކާއި، ތައި އެކްސްޕޯޓަރުންގެ އިތުރުން އެކި ވިޔަފާރިވެރިން ބައިވެރިވުމަށް ވަނީ ހަމަޖެހިފަ އެވެ.

ތައިލެންޑް-މޯލްޑިވްސް ބިޒްނަސް މެޗިން ފޯރަމް އިންތިޒާމުކުރާ ފަރާތުން ބުނީ މި ފޯރަމްގެ ސަބަބުން ވިޔަފާރިތަކަށް އާ ފުރުސަތުތަކެއް ތަނަވަސް ވެގެން ދާނެ ކަމަށެވެ.

މިދިޔަ އަހަރު ވެސް މި ފޯރަމް ވަނީ ކާމިޔާބުކަމާއެކު ބާއްވާފަ އެވެ. އެ ފަހަރު ވެސް ގިނަ ބަޔަކު ފޯރަމްގައި ބައިވެރިވި އެވެ.

ރާއްޖޭގެ ވިޔަފާރިވެރިންނާއި ބޭރުގެ ވިޔަފާރިވެރިން ގުޅުވުމަށް މިފަދަ ފޯރަމްތައް މީގެ ކުރިން ވެސް ކުރިއަށް ގެންގޮސްފައިވެ އެވެ.