ރާއްޖެއިން ތައިލެންޑަށް ކަނޑައަޅުއްވާފައި ހުންނަވާ ސަފީރުގެ މަގާމަށް އިލެކްޝަންސް ކޮމިޝަނުގެ ކުރީގެ ރައީސް، ފުއާދު ތައުފީގު އަދި ނޭޝަނަލް އިންޓެގްރިޓީ ކޮމިޝަން (އެންއައިސީ) ގެ މެންބަރުކަމަށް މަރިޔަމް އިންޝާ ފައިސަލް އައްޔަނު ކުރަން ފެންނަ ކަމަށް މަޖިލީހުން މިއަދު ފާސްކޮށްފި އެވެ.

ތައިލެންޑަށް ރާއްޖެއިން ކަނޑައަޅުއްވާފައި ހުންނަވާ ސަފީރުގެ މަގާމަށް ފުއާދު ތައުފީގު އައްޔަނު ކުރުމަށް ވެސް އަދި، އެންއައިސީގެ މެންބަރުކަމަށް އިންޝާ އައްޔަނު ކުރަން ފެންނަ ކަމަށް ވެސް މަޖިލީހުން ފާސްކުރީ ވޯޓުގައި ބައިވެރިވި 58 މެންބަރުންގެ އިއްތިފާގުންނެވެ.

ތައިލެންޑުގެ ސަފީރުކަމަށް ފުއާދު އައްޔަނު ކުރަން ފެނޭތޯ ބެލުމަށް އޭނާގެ ނަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަޖިލީހަށް ފޮނުއްވީ ނޮވެމްބަރު 25، ގަ އެވެ. އިންޝާގެ ނަން މަޖިލީހަށް ފޮނުއްވީ ނޮވެމްބަރު 24، ގަ އެވެ.

އިލެކްޝަންސް ކޮމިޝަނުގެ މެމްބަރު ކަމަށް ފުއާދު އައްޔަނު ކުރީ ނޮވެމްބަރު 24، 2019 ގަ އެވެ. ރައީސް މުއިއްޒު މާލެ ސިޓީގެ މޭޔަރުކަމުގެ އިންތިހާބާއި ރިޔާސީ އިންތިހާބު ކާމިޔާބު ކުރެއްވިއިރު އީސީގެ ރައީސަކަށް ހުންނެވީ ފުއާދު އެވެ.

ފުއާދަކީ މީގެ ކުރިން ވެސް އެ ކޮމިޝަނުގެ މެންބަރުކަމުގައި ހުންނެވި ބޭފުޅެކެވެ. އެގޮތުން 2008 ވަނަ އަހަރު އެންމެ ފުރަތަމަ މަލްޓި ޕާޓީ ރިޔާސީ އިންތިހާބު ބޭއްވިއިރު ވެސް ފުއާދު އެ ކޮމިޝަނުގައި ހުންނެވި އެވެ.