ސަރުކާރު ބަންދު ކުރަން ނިންމުމުން ސިވިލް ކޯޓާއި ކްރިމިނަލް ކޯޓުގައި މިއަދު އަޑުއެހުމެއް ތާވަލުނުކުރަން ނިންމައިފި އެވެ.

ސިވިލް ކޯޓުގެ ރަސްމީ އެކްސް އެކައުންޓުން ކުރި ޕޯސްޓެއްގައި ބުނީ "ސިވިލް ކޯޓު ރަސްމީކޮށް މިއަދު ނުހުޅުވާނެ" ކަމަށެވެ. އެ ކޯޓުގެ ރަޖިސްޓްރާ އަބްދުއްސަލާމް ވިދާޅުވީ ކޯޓު ބަންދު ކުރަން ނިންމީ، ކޯޓުގައި އެއްވެސް މައްސަލައެއް މިއަދު ކުރިއަށް ނުގެންދާ ގޮތަށެވެ. އެހެންވެ އަޑުއެހުމެއް ތާވަލުކޮށްފައެއް ނުވެ އެވެ.

ކްރިމިނަލް ކޯޓުން ބުނީ ވިއްސާރައިގެ ސަބަބުން ކޯޓުގެ އިމާރާތަށް ފެނުގެ އަސަރު ވެސް ކޮށްފައިވާ ކަމަށާއި އެހެންވެ މިއަދަށް ކޯޓުން ތާވަލުކޮށްފައިވާ މައްސަލަތަކުގެ އަޑުއެހުންތައް ކެންސަލް ކޮށްފައިވާ ކަމަށެވެ. ނަމަވެސް ބަންދާ މެދު ގޮތެއް ނިންމުމުގެ އަޑުއެހުންތައް އޮންނާނެ ކަމަށް ކޯޓުން ބުންޏެވެ.

ސަރުކާރު ބަންދު ދުވަހެއްގެ ގޮތުގައި މިއަދު ކަނޑައެޅީ، މިދިޔަ ތިން ދުވަހު ރާއްޖޭގެ ހުރިހާ ކަންކޮޅުތަކަށް ކުރި ވިއްސާރާގައި 20 އަށް ވުރެ ގިނަ ރަށުގައި ފެން ބޮޑުވެ ދިރިނޫޅެވޭ ވަރަށް ބައެއް ގެތަކަށް ގެއްލުން ލިބުމުންނެވެ. އޭގެ ބޮޑު އަސަރެއްކުރީ މާލެއާއި ހއ. އަތޮޅުގެ މީހުން ދިރިއުޅޭ 14 ރަށަކަށެވެ.