ޖުމްހޫރީ ޕާޓީގެ ލީޑަރު، އަދި މާމިގިލީ ދާއިރާގެ މެންބަރު ގާސިމް އިބްރާހިމްގެ ދައުވަތަކަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ސަން އައިލެންޑަށް ވަޑައިގެންފި އެވެ.

އަބްދުއްރަހީމް ސަން އައިލެންޑަށް ވަޑައިގަތީ އިއްޔެ އެވެ. އެމަނިކުފާނަށް މާމިގިލީ އެއާޕޯޓުން މަރުހަބާ ދެންނެވީ ގާސިމް އެވެ.

މި ދަތުރުގެ ވާހަކަ ރައްޔިތުންގެ މަޖިލީހުގެ އިދާރާއިން ހާމައެއް ނުކުރެ އެވެ.

ގާސިމް އަދި އަބްދުއްރަހީމްއާ ވެސް ގާތް ގުޅުމެއް އޮންނަ ބޭފުޅަކު ވިދާޅުވީ ގާސިމް، އަބްދުއްރަހީމް އަށް ދައުވަތު ދެއްވީ ރައްޔިތުންގެ މަޖިލީހުގެ ކުރީގެ ރައީސެއްގެ ހައިސިއްޔަތުން ކަމަށެވެ.

"މަޖިލީހުގެ ކުރީގެ ރައީސްގެ ހައިސިއްޔަތުން، މިހާރުގެ ރައީސްއަށް އިހުތިރާމު އަދާކުރެއްވުމުގެ ގޮތުން ދެއްވި ދައުވަތެއް އެއީ. މިއީ ސިޔާސީ ކަންކަމުގެ ރީތި ނަމޫނާއެއް،" އޭނާ ވިދާޅުވި އެވެ.

"ގާސިމް އަކީ އަދި އަބްދުއްރަހީމް އަކީ ވެސް އެފަދަ ބޭފުޅުން. އެހެންވެ، މިފަދަ މެހްމާނުދާރީއެއްގެ ހާއްސަކަން އިތުރުވޭ."

ފަސްތަރީގެ ރިސޯޓުގައި ހަފުތާ ބަންދު ހޭދަކުރެއްވުމަށް ފަހު މަޖިލީހުގެ ރައީސް މާލެ ވަޑައިގަންނަވާނީ މާދަމާ ކަމަށް، އަދަދު ނޫހާ ވާހަކަ ދެއްކެވި ބޭފުޅުން ވިދާޅުވި އެވެ.