ފެނަކަ ކޯޕަރޭޝަނުން ހއ. ދިއްދޫއިން ކޮންޓްރެކްޓަށް ނަގާފައި ތިބި 54 މުވައްޒަފުން ވަކިކޮށް، ރައްޔިތުންގެ މަޖިލިސް އިންތިހާބާ ދިމާކޮށް އޭގެ ތެރެއިން 22 މީހަކު އަނެއްކާ ވެސް ކޮންޓްރެކްޓަށް ނެގުމަށްފަހު މި މަސް ނިމުމުން ވަކިކުރަން ނިންމައިފި އެވެ.

"އަދަދު" އަށް އެނގިފައިވާ ގޮތުގައި އެ 22 މުވައްޒަފުންގެ ކޮންޓްރެކްޓް މިދިޔަ މަހު ހަމަވެފައިވާއިރު ފެނަކައިން ނިންމާފައިވަނީ އެ މުވައްޒަފުންގެ ކޮންޓްރެކްޓް އާ ނުކޮށް ދޫކޮށްލުމަށެވެ.

"ވަކިކުރި މުވައްޒަފުންނަށް މަޖިލިސް އިންތިހާބާ ދިމާކޮށް ދިނީ ތިން މަހުގެ ކޮންޓްރެކްޓެއް. ވައްދާފައި ބުނީ ކޮންޓްރެކްޓް ވެސް އާކޮށްދޭނަމޭ. މިދިޔަ މަހު ކޮންޓްރެކްޓް އާކޮށްދޭނެތޯ ސުވާލު ކުރުމުންވެސް އާކޮށްދޭނެ ކަމަށް ބުނި. ނަމަވެސް މި އެންގީ އާނުކޮށް ވަކިކުރާކަން،" ދިއްދޫ ފެނަކައިން ވަކިކުރި ޒުވާނަކު ބުންޏެވެ.

މުވައްޒަފުން "އަދަދު" އާ ވާހަކަ ދައްކަމުން ބުނީ ޕޯޑިއަމްތަކުގައި އެ ކޮމިޓްމަންޓްތައް ދިން މީހުން މިއަދު ޓައި އަޅައިގެން އޮފީހަށްދާ ކަމަށާއި ނަމަވެސް އާދައިގެ ނިކަމެތި މުވައްޒަފުން މިއަދު މިވަނީ ގޮތެއް ނެތި މަގުމަތިވެފައި ކަމަށެވެ.

ދިއްދޫގެ ފެނަކަ އިމާރާތަށް ބޭނުންވާ ސާމާނު ފޮނުވަމުންދާކަން ފާހަގަކޮށް އެ މުވައްޒަފު ބުނީ ކުއްލިއަކަށް މިގޮތަށް ވަކިކުރާނެ ކަމަށް ހީވެސް ނުކުރާ ކަމަށާއި މަސައްކަތް މެދުނުކެނޑި ކުރިއަށް ގެންދާ ގޮތަށް ނިންމާފައިވާ ކަމަށް ކުރިން މައުލޫމާތު ދީފައިވާ ކަމަށެވެ.

"މި ސަރުކާރު ވެރިކަމަށް އައިސްގެން ފެނަކަ އެމްޑީ ރަށަށް އައި. ޕްރޮޖެކްޓް ކުރިއަށްދާނެ ކަމުގެ ޔަގީންކަން ވެސް ދިން. އުންމީދުގައި ހުއްޓާ ކުއްލިއަކަށް ވަކިކުރީމަ ވަރަށް ބޮޑު ގެއްލުމެއް މި ލިބުނީ. ފަސް ކުދިންގެ ބައްޕައެއް އަޅުގަނޑަކީ. އަޅުގަނޑު ލޯނެއް ވެސް ނަގައިގެން ފައިސާ ދައްކަމުން މި ދަނީ. ލިބޭ ފައިސާގެ މައްޗަށް ބަރޯސާ ވެގެން ދިރިއުޅެމުން މިދަނީ،" އިތުރު މުވައްޒަފަކު ބުންޏެވެ.

މި ސަރުކާރު ވެރިކަމަށް އައި ފަހުން މިދިޔަ ނޮވެމްބަރު މަހު ފެނަކައިން ވަކިކުރި މުހުމޫދު ޝަފީގު (މަންޑޭ)، 30، ބުނީ އޭރު ވަކި ކުރުމަށް ފަހު މަޖިލިސް އިންތިހާބާ ދިމާކޮށް ގޮތެއް ހޯދައިދޭނެ ކަމުގެ ޔަގީންކަން ދިން ކަމަށާއި އެހެން ނަމަވެސް މިއަދާއި ހިސާބަށް ވެސް ވަޒީފާއެއް ނުލިބި އުޅޭ ކަމަށެވެ.

ވަޒީފާއިން ވަކިކުރުމުގެ ލިޔުމެއް އަދި ވަކިކުރި މަހުގެ މުސާރައެއް ވެސް ދީފައި ނުވާ ކަމަށް އޭނާ ބުންޏެވެ.

ފެނަކައިގެ ހަރަދު ކުޑަކުރުމުގެ ގޮތުން ކަމަށް ބުނެ އެ ކުންފުނީގެ އެކި މަޝްރޫއުތަކަށް ނަގާފައިވާ 731 ކޮންޓްރެކްޓް މުވައްޒަފުން މި މަހަށް ފަހު ވަކި ކުރަން ވަނީ ނިންމާފަ އެވެ.

ފެނަކައިގެ މެނޭޖިން ޑިރެކްޓަރު މުއާޒް މުހައްމަދު ރަޝީދު "އަދަދު"އަށް ވިދާޅުވީ މިވަގުތު މަޝްރޫއުތަކަށް ކޮންޓްރެކްޓަށް މުވައްޒަފުން ނަގައިގެން ކުރިއަށް ދެވެން ނެތް ކަމަށާއި ވިސްނުމަކީ އެ މަޝްރޫއުތައް ބިޑަށް ލައިގެން ކޮންޓްރެކްޓް އުސޫލުން ޕްރައިވެޓް ކުންފުނިތަކަށް ދިނުމަށް ކަމަށެވެ.

ސަރުކާރުން ގިނަ އަދަދެއްގެ ސިޔާސީ މުވައްޒަފުން ނަގައި، އެ މުވައްޒަފުންނަށް ބޮޑު ހޭދައެއްކޮށް، ސަރުކާރު ހިއްސާވާ ކުންފުނިތަކުން އާދައިގެ މުވައްޒަފުންނާ ގުޅޭ މިފަދަ ނިންމުންތައް ނިންމާތީ ގިނަ ބަޔަކު އަންނަނީ ނުރުހުން ފާޅުކުރަމުންނެވެ.