ފެނަކައިގެ ހަރަދު ކުޑަކުރުމުގެ ގޮތުން ކަމަށް ބުނެ އެ ކުންފުނީގެ އެކި މަޝްރޫއުތަކަށް ނަގާފައިވާ 731 ކޮންޓްރެކްޓް މުވައްޒަފުން މި މަހަށް ފަހު ވަކި ކުރަން ނިންމައިފި އެވެ.

"އަދަދު" އަށް އެނގިފައިވާ ގޮތުގައި ދިއްދޫގައި މުޒާހަރާ ކުރަމުންދަނީ އެ ރަށުގެ ފެނަކަ އިންހައުސް އިންޖީނުގެ އަދި އޮފީސް އިމާރާތް ކުރުމުގެ މަޝްރޫއަށް ނަގާފައިވާ 21 މުވައްޒަފުން މި މަހަށް ފަހު ވަކިކުރަން އިއްޔެ ނޯޓިސް ދިނުމާ ގުޅިގެންނެވެ.

"ހުރިހާ ރަށަކުން ވެސް އެބަ ދޫކޮށްލަން ކޮންޓްރެކްޓަށް ނަގާފައި ތިބި މުވައްޒަފުން. މި ހަފްތާ ތެރޭގައި ހުރިހާ މުވައްޒަފުންނަށް އެކަން އަންގާ ނިމޭނެ. ޖުމްލަ 731 މުވައްޒަފުން އެބަ ދޫކޮށްލަން،" ފެނަކައިގެ އެމްޑީ މުއާޒް މުހައްމަދު ރަޝީދު ވިދާޅުވި އެވެ.

މުއާޒް މި ނޫހާ ވާހަކަ ދަައްކަވަމުން ވިދާޅުވީ މިވަގުތު މަޝްރޫއުތަކަށް ކޮންޓްރެކްޓަށް މުވައްޒަފުން ނަގައިގެން ކުރިއަށް ދެވެން ނެތް ކަމަށާއި ވިސްނުމަކީ އެ މަޝްރޫއުތައް ބިޑަށް ލައިގެން ކޮންޓްރެކްޓް އުސޫލުން ޕްރައިވެޓް ކުންފުނިތަކަށް ދިނުމަށް ކަމަށެވެ.

މަޝްރޫއުތައް ހުއްޓިފައި ވަނިކޮށް އެ މަޝްރޫއުތަކަށް ނަގާފައި ތިބި މުވައްޒަފުންނަށް މުސާރަ ދޭން ޖެހޭތީ އުނދަގޫތަކެއް ދިމާވާކަން ފާހަގަކުރައްވާ މުއާޒް ވިދާޅުވީ އެ މުވައްޒަފުންނަށް ހަތް މިލިއަނާއި ނުވަ މިލިއަން ރުފިޔާއާ ދެމެދުގެ އަދަދަކަށް ފައިސާ ހަރަދުވާ ކަމަށެވެ.

ސަރުކާރުން ގިނަ އަދަދެއްގެ ސިޔާސީ މުވައްޒަފުން ނަގައި، އެ މުވައްޒަފުންނަށް ބޮޑު ހޭދައެއްކޮށް، ސަރުކާރު ހިއްސާވާ ކުންފުނިތަކުން އާދައިގެ މުވައްޒަފުންނާ ގުޅޭ މިފަދަ ނިންމުންތައް ނިންމާތީ ގިނަ ބަޔަކު އަންނަނީ ހިތްހަމަނުޖެހުން ފާޅުކުރަމުންނެވެ.

އެގޮތުން މާލީ ގޮތުން ރާއްޖެއަށް ދިމާވެފައި ހާލަތުން އަރައިގަތުމަށް ސަރުކާރުގެ ހަރަދު ކުޑަކުރުމަށް ސިޔާސީ މުވައްޒަފުންގެ އަދަދު މަދު ކުރުމަށް ވެސް ގިނަ ބަޔަކު އަންނަނީ ގޮވާލަމުންނެވެ.