މޯލްޑިވްސް އެންވަޔަރަމެންޓަލް މެނޭޖްމަންޓް ޕްރޮޖެކްޓް (އެމްއީއެމްޕީ) ގެ އޮޑިޓު ރިޕޯޓު އަލުން ދިރާސާ ކުރަން ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ފޮނުވަން މިއަދު ނިންމައިފި އެވެ.

މާލިއްޔަތު ކޮމިޓީގެ ސަބް ކޮމިޓީން ނިންމީ އެމްއީއެމްޕީގެ 2014 އާއި 2015 ގެ އޮޑިޓް ރިޕޯޓް އަލުން މާލިއްޔަތު ކޮމިޓީއަށް ގެނެސް ދިރާސާ ކުރުމަށް ފަހު މަޖިލީހުގެ ތަޅުމަށް ފޮނުވުމަށެވެ.

އެމްއީއެފްޕީގެ އޮޑިޓުތަކުން ފާހަގަވީ މައްސަލައަކީ ކުނި އުފުލާ ބާޖެއްގެ މައްސަލަ އެވެ. އެ ރިޕޯޓުގައިވާ ގޮތުން އެ ބާޖު ބަންނަން ބޭނުންވާ ފައިސާ ނުހޯދައި އެ މަސައްކަތް ކުރަން އުޅުމާ ގުޅިގެ މަސައްކަތް ނުނިމި ދިގުލައިގެން ގޮސް، ދައުލަތުގެ ބަޖެޓުން އެ މަޝްރޫއަށް ހޭދަކުރަން ޖެހުނެވެ.

ބާޖު ބަނުމުގެ މަސައްކަތް ހަވާލުކުރީ ޓްރޮޕިކަލް އިންވެސްޓްމަންޓާ އެވެ. މިކަމަށް ދައުލަތުގެ ބަޖެޓުން އިތުރަށް ހަރަދުކޮށްގެން ވެސް މަސައްކަތް ނުނިމުނުއިރު، އެ މަސައްކަތަށް މިހާތަނަށް ޖުމްލަ 7.6 މިލިއަން ރުފިޔާ ހަރަދުކޮށްފައިވާ ކަމަށް އޮޑިޓުގައި ފާހަގަކޮށްފައި ވެ އެވެ.

މިފަދަ މައްސަލަތައް ތަކުރާރުވިޔަ ނުދިނުމަށް މުސްތަގުބަލުގައި ޕްރޮޖެކްޓްތައް ހަވާލުކުރާއިރު އެ މަޝްރޫއުގައި ހިނގައިދިޔަފަދަ ކަމެއް ތަކުރާރުވިޔަ ނުދިނުމަށް އެންވަޔަރަމަންޓް މިނިސްޓްރީއަށް އެންގުމަށް އޮޑިޓާ ޖެނެރަލްގެ އޮފީހުން ނެރުނު ރިޕޯޓުގައި ލަފާދީފައި ވެ އެވެ.

އެމްއީއެމްޕީގެ އޮޑިޓުތައް އަލުން ދިރާސާކުރަން ނިންމި ނަމަވެސް، އެ ކޮމިޓީން ދިރާސާކުރި އެހެން ރިޕޯޓުތަކުގައި މައްސަލައެއް ނެތް ކަމަށް ނިންމައި އެ ހުރިހާ ރިޕޯޓުތަކެއް ފައިލްކުރަން ސަބްކޮމިޓީން ވަނީ ނިންމާފަ އެވެ.

އެއީ ޗިލްޑްރެންސް އޮމްބޮޑްސް ޕާސަން އޮފީހުގެ 2021 އާއި 2022 ގެ އޮޑިޓް ރިޕޯޓާއި، އިންތިގާލީ އިންސާފު އޮމްބޮޑްސް ޕާސަން އޮފީހުގެ 2021 ގެ އޮޑިޓް ރިޕޯޓާއި، ހަޒާނާ މޯލްޑިވްސް ލިމިޓެޑްގެ 2016، 2017، 2018 ގެ އޮޑިޓުތަކުގެ އިތުރުން އެމްޑަބްލިއުއެސްސީގެ 2017، 2018، 2019، 2020 ގެ އޮޑިޓުތަކެވެ.